Komunikadu ba Imprensa JSMP 

Outobru 2009

JSMP Independentemente hatama Keisa Konstitusional ba Tribunal de Rekursu

Iha dia 22 de Outubru JSMP (Judicial System Monitoring Program) hatama ona “Petisaun no Keisa Konstitusional ba Tribunal Rekursu ho kopia ba Orgaun Soberania sira seluk inklui PDHJ. Prosesu ne’e hatama independentemente husi JSMP ne’ebe durante ne’e kaer papel instituisional atu tau matan ka halo monitirizasaun ba funsionamentu sistema justisa formal iha Timor Leste laran tomak. JMSP mos konfirma katak prosesu ne’ebe JSMP aprezenta  nudar asaun propiu husi JSMP, laos asaun koletiva ne’eeb kompostu husi grupu interesadu sira seluk hanesan media komunikasaun sira publika iha iha semana sira liu ba kotuk.

Asaun legal ne’ebe aprezenta ba Tribunal Rekursu bazeia ba Artigu 48 Konstituisaun nu’udar baze legal no hanesan baze legitimidade JSMP nian. Tuir Artigu 48 Konstituisaun defisinia katak: Sidadaun hotu-hotu iha direitu atu aprezenta petisaun, kesar no reklamasaun, mes-mesak ka koletivamente ba orgaun soberania sira eh ba autoriedade seluk-seluk atu defende sira nia direitu, Lei-Inan, lei oan eh ba interese ema hotu nian.

Bazeia ba Artigu 48 Konstituisaun ne’e, JSMP fiar katak JSMP iha lejitimidade konstitusional atu aprezenta, asaun ruma ba orgaun kompetente liu husi Tribunal Rekursu hodi defende Lei-Inan, lei oan no interese públiku tuir espíritu  konstituisaun no prinsípiu jeral sira kona-ba lei, justisa no direitu umanus. Refere ba Artigu ne’e, JSMP konvensidu katak tantu indivualmente ka koletivamente JSMP preinxe no reprezenta  elementu sira husi Artigu 48 Konstitusaun ne’ebe defini katak “mesa-mesak ka koletivamente....!”……….atu defende Lei-Inan, Lei oan, eh interese ema hotu nian……!”

JSMP deside hodi hatama prosesu ba Tribunal Rekursu tanba konsidera katak desizaun Estadu Timor Leste ba  libertasaun Maternus Bere  nu’udar aktu ne’ebe la respeita ka kaer ba norma sira Konstituisaun nian ne’ebe defini kona-ba Estadu de Direitu, Universalidade no Igualidade Perante ba  Lei, Separasaun de Poder, Direitu  Asesu no Garante ba Jutisa no Prinsipiu Independensia Funsaun Tribunal nian. Prinsipiu hirak ne’e hotu-hotu konsagradu iha Konstituisaun da Repúblika.

JSMP konsidera, desizaun Estadu Timor Leste nian ne’e, aleinde viola no hakat do’ok liu regras konstitusional, lei internasional ratifikadu sira, ignora direitu ba justisa vítima sira nian, viola obrigasaun Timor Leste tuir lei internasional nia regras, deskoraza  no dezmotiva servisu autores tribunal nian, haburas impunidade, no desizaun ne’e mos hatudu katak Estadu Timor Leste lakon nia kreatividade diplomasia ka uza maneira diplomátiku atu hatan ba ejijensia Estadu Indonesia ba kazu Maternus Bere.

JSMP preokupa tanba desizaun ne’e, destroi tiha kuadru sistema legal ne’ebe sei iha faze dezemvolvimentu nian laran, no polítika hanesan ne’e la investe ba futuru, sistema judisiariu ne’ebe forte, kredivel independente no nu’udar espíritu ba prinsípiu estadu de direitu, demokrasia no direitus umanuz.

Tanba preokupasaun hirak ne’e hotu, provoka JSMP nia konsenseia moral no institusional atu lori prosesu ne’e ba Tribunal Rekursu no husu ba Tribunal Rekursu atu hola medida sira ne’ebe apropriadu tuir lei no konstitusaun hodi hatan ba kazu Maternus Bere bazeia ba lei, konstituisaun no sensebilidade públiku nian ba justisa hodi hametin no defende konstituisaun nu’udar norma ne’ebe ass liu norma no desizaun polítiku sá deit no husi se deit iha nasuan ida ne’e.

JSMP hein katak Tribunal Rekursu bele uja nia kbi’it institusional no konstitusional tomak atu hola pozisaun ne’ebe klaru no firme ba kazu ne’e, nune’e  la bele kria no fo fatin ba akontensimentu hanesan iha tempu sira tuir mai. Se la’e, ita hotu sei moris iha ambiente estadu de direitu demokrátiku ida ne’ebe hela ho naran ka retorika deit, estadu de direitu ne’ebe la fo justisa no la garante ema nia direitu ba justisa. Sé hanesan ne’e, JSMP rekomenda ba publiku no orgaun soberania sira hotu atu altera tiha titlu Estadu Republika Demokartiku Timor Leste no prinspiu sira ne’ebe iha konstituisaun laran ba fali titlu seluk ne’ebe refleta situasuan ohin loron nian nian. Nune’e la bele halo konfuzaun ba públiku, liu-liu atu koloka públiku iha situasaun ne’ebe la klaru, entre defende norma konstitusional ka emosionalmente tuir ba polítika husi lideransa  sira ne’ebe hakat liu norma konstituisaun.

Atu hetan informasaun liu tan bele kontaktu ba:

Luis de Oliveira Sampaio

Diretur Eksekutivu JSMP

Diresaun e-mail: luis@jsmp.minihub.org

Landline: 3323883