Enkontru Publiku:
Impaktu Libertasaun Maternus Bere nian ba Sistema Judisial

Organiza husi La’o Hamutuk iha Farol, Dili
24 Setembru 2009

Narador

• Fernanda Borges (Komisaun A, Parlamentu Nasional)
• Luis Oliveira (JSMP)   Artigu hanesan ninia presentasaun
• Fernanda Maria Borges Guimaraes (Unidade Direitu Umanus – UNMIT)
• Edio Saldanha (ANTI no Asosiasaun HAK)
• Moderador : Mariano Ferreira, La’o Hamutuk
• Notulent : Max Tahu, La’o Hamutuk

Fernanda Borges, Parlamentu Nasional:

Komisaun A iha kompetensia estadu atu koalia kona ba problema Maternus Bere (MB). Hau koalia nudar Presidente Parlamentu A, laos nudar Presidente PUN. Ohin sei koalia mos kona ba Parlamentu nia papel iha kazu ida nee.

Labele hare kestaun nee hanesan politika. Nee kona ba kumpri lei ka lae, kumpri lei TL kumpri lei Internasionais, nebe Presidente Republika rasik uluk hakarak iha assina lalais. Nee hau koalia hanesan ema estadu ida nebe iha kompetensia atu koalia. Sem duvida, hamosu krize boot iha Timor Leste tanba halakon justisa no estadu de direitu iha Timor-Leste.

Atu kompriende didiak tenki hare prinsipiu estadu de direitu. ED so bele eziste:

• Kumpri Justisa Natural, atu proteze vitima no mos arguidos
• Ema hotu tenki hetan notifikasaun iha prosesu judisial
• Ema hotu iha direitu atu koalia iha Tribunal. Wainhira ita hasau MB husi prozaun ita fo liberdade ba nia maibe ita viola vitima nia direitu atu ba tribunal fo sira nia sasin. MB mos iha direitu atu dehan nia la sala.

Presidente la kumpri justisa Natural, tanba sira la iha kompetensia atu halo ida nee, nee fo empaktu boot ba ita nia sistema judisiariu.

- Sidadaun hotu iha lei nia okos

Artigu 2 Konstituisaun Republika (KR) ezize ida nee: estadu mak orgaun mak soberania hat nee no mos povu. Dala barak haluha tiha povu mos inklui iha laran.
Artigu 6: orgaun haat nee iha atu respeira prinsipiu estadu de direitu.
Artigu 9: wainhira TL atu halao estadu de direitu nia adopta mos prionsipiu internasiona geral ou komum. Se ita laiha, sei tenku hare ba lei internasional.

Nebe ED so eziste kuandu, orgaun de estadu hotu hakruk ba lei. Governu labele dehan lei oin seluk, ami halo oin seluk. ED mos ezize independensia judisiaria, tanba sistema judisiaria mak halo separasaun de poderes de klaru liu tan. Selae laiha laiha tanba ema nebe ba tur iha governu, laiha kompetensia atu hatama ema ka hasai ema iha Tribunal. Selae prevalese fali rezime Soeharto. Tanba nee mak iha prozioneiru politika.

Hau hanoin ita rona karik buat nebe Presidente TR dehan, lee didiak. Iha tan karta ida Presidente TR konfirma katak laos tribunal mak atu foti desijaun atu hasai Maternus Bere. Nee klaru. Definisaun nee mai husi ita nia Konstituisaun, nebe fahe klaru ona atu iha Check and Balance. Se lae ema balu iha lei nia leten, povu iha lei nia okos.

Pontu ida fali, tenki iha asesu ba justisa.
Kazu MB viola artigu 26, ema hotu iha direitu asesu ba sistema judisial. Tribunal la halo rasik, nia rona ba lei nebe lao iha Timor-Leste. Ita laiha lei ida nebe dehan PR bele hasai ema ida huis tribunal.

Desijaun Governu nia ilegal

Viola artigu 2, 6, 26 (Aksesu ba tribunal)
Viola artigu 69: separasaun de poderes
Artigu Codigo Prosedimentu Tribunal Artigu 7 no 8.

Se ita tuir nee, Longuinhos Monteiru ka PNTL ida bele dehan katak sira labele halo buat nebe PM haruka tanba kontra lei. Problema ema sira nebe iha nebe la hatene sira nia kumprimentu ba lei. Chefe Prizaun mos iha poder atu rezeita buat nebe la tuir lei. Ministra Justisa iha responsabilidade mos kona ba ida nee. Ida ne'e bele estraga ita nia sistema legal -- tenki brani atu kolia kontra.

Artigu 4, krime nee akontese atu halo libertasaun ilegal. Iha kadeia bele to tinan 2-6.

Sei ida nee halao, ba oin ema seluk bele halo tan no bele halo at liu tan. Se mak iha kbiit atu halo aksaun ba krime nee. Presidente Tribunal Rekursu (TR) dehan nia hakarak atu kontinua prosesa nee. Iha orgaun nebe iha responsabilidade Prokurador Jeral da Republika. Nia iha knaar atu halo ida nee. Ka Prokuradora atu tuir deit.

Artigu 160 – Krime grave desde 1974 to 1999 tenki prosesa ba Tribunal Nasional ka Internasional.

Impaktu seluk:
Povu la fiar ona ita iha estadu de direitu. Ita lakon ita nia dereitu baziku. Ita hetan ona impunidade ho Presidente da Republika no PM. Nee grave teb-tebes, tanba sira rasik viola lei. Nebe oinsa sira atu deside ema seluk tuir lei. Nee ita hare mos wainhira labarik nain hat sunu eskola. Hau preokupa kuandu PM dehan atu husik labarik sira nee. Tanba agora laiha detensaun ba labarik, laos razaun ba PM atu halo desijaun. Tenki hodi ba tribunal, no Juiz mak halo desijaun.

Ba oin, hahalok nebe sala sei la iha justisa. PR no PM halo nakfera valores de sosiedade nebe hanorin katak labele halo krime sei lae sei lori todan Nee mos hatodan ona politiku sira atu la halo tuir lei. Se ema nebe halo Crime Kontra Umanidade la ba kadeia, sira nebe halo korupsaun mos la ba kadeia.

Ikus povu tauk wainhira politika sira ameasa.

Hau hakarak dehan ita bele hasoru ditadura iha Timor-Leste. Hau tauk buat ida “Maun Boot”. Diak liu halakon tiha buat nee. Ita sobu tiha ita nia Unidade. Dala barak ita dehan otonomista sira mak kaer ukun. Ida nee hau la konkorda maibe, se ita hasai ema ida hanesan MB ita hodi povu nia hanoin atu komesa fahe ema hanesan nee.

Solusaun: ita iha direitu atu entrega fali MB. Se lakohi entrega ita husu ONU atu hari Tribunal Internasional. La presija mehi atu PR ka PN atu husu, nee sira nia dever. Tanba wainhira UN tama iha nee sira uja Artigu 7 Konsellu Seguransa nian (nebe parese la uja iha rai seluk).

Ita husu Prokuradora Geral Republika nee nia lian iha nebe tiha ona. Se nia atu hatama sira sira nee ba investigasaun ka lae ba Krime ida nee. Se nia la halo nia la halo nia dever.

Ita halo nee tanba hakarak ema ba kadeia lae? Maibe nee atu restaura prinsipiu de direitu. Se ida nee la halo ita sei moris iha tristeza nia laran, paz iha ita nia rain.

Luis Oliveira, JSMP  (Artigu)

Hau hanoin iha buat barak ona mak kobre ona. Hau hakarak fo hanoin balu atu it abele hetan idea hamutuk, strategia hamutuk. Maski ami iha JSMP kaer knar ida nee, maibe ita rasik hatene problema boot mak vontade Politika.

Prinsipiu Estadu de Direitu.
Iha kontextu ida nee, direitu ba justisa ita labele ignora ho razaun saida deit no sirkunstansia saida deit. Nasaun ida nee moris iha prinsipiu de direitu nia okos. Ita iha obrigasaun moral atu ezize justisa. Situasaun ida nee. Esperiensia ida nee, ita bele hara ezemplu aktu politika nebe hakat liu KR. Estabelesimentu KVA nian, fo perdaun ba ema sira nebe tama ba kadeia seidauk kumpri desijaun tribunal nian, kaze 2006, exemplu violasaun ba KR.

Kazu MB sai ameasa ba ezistensia Estadu nian ba oin. Ita presija halo movimentu Konstitusional ruma atu defende ita nia Konstitusaun ka lae? Hau hakarak reforsa fali ita nia konstituisaun nia haruka kona ba estadu de direitu, no katak ita sira lei internasional nia nebe ita ratifika (konvensaun 7). Kazu MB nia la justu tamba ema balu hetan prosesu, nia la hetan.

Artigu 69: Separasaun de Poder. PR ka PM mak halo ida nee sira hakat liu ona prinsipiu nee.
Artigu 77: Bainhira PR simu pose ka durante Pose nia laran nia halo juramentu atu tuir LEI INAN no haruka parte seluk halo tuir LEI INAN. Mai buat nebe akontese PR kontra nia promesa.
Artigu 85: Kompetensia PR
Artigu : Kompetensia PM Laiha klauzula nebe temi kona ba sira nia poder iha administrasaun justisa sa tan halo knaar hanesan juiz ida.
118, 119, 121: So tribunal deit mak bele halo desijaun judisial. Desijaun Tribunal nian mak aas liu desijaun sira seluk. Desijaun kona ba MB, hatudu katak PR no PM hakat liu poder nebe sira iha inkonstitusionalmente. Ida nee situasaun nebe grave tebes. Tanba ida nee atake ida ba ita nia konstituisaun.

Iha nee hanesan PR no PM tau sira nia an as liu Konstituisaun. Wainhira sira nia interese sira halo tuir konstituisaun, maibe wainhira lae sira la tuir. Hau hakfodak PR sei brani atu koalia kona ba Konstituisaun iha entrevista iha TVTL wainhira koalia kona ba nia viajen ba liur. Nia sempre uja ameasa atu Mundur. Diak liu ita iha presidente nebe simples maibe lao tuir lei no hatu ezemplu diak ba povu.

Problema mos tanba halo povu lakon konfiansa ba tribunal. Desvaloriza servisu nebe orgaun judisial sira halo ho limitasaun barak nebe sira iha. Presija halo asaun ida atu dudu sira halo tuir lei.

Fernanda Guimaraes, UNMIT Human Rights Unit

Durante tinan hira kotuk ami hare oinsa estabelisemtu judisial nebe nebe independe ho autor sira nebe iha kompetensia i tribunal mos hari iha distritu sira. Nee fundamental ba respeitu direitu umanus. PDHJ mos hasae nia kapasidade foti aksaun atu proteze direitu umanus. Imporatante tanba sira hari eskritoriu Oekuse, Maliana, Baucau, no Maubisse. Nee hanesan dezenvolvimentu pozitivu, maibe desijaun kona ba MB sei fo konsekuensia nebe la diak ba justisa ba krime kontra umanidade.

Desijaun nee kontra Konsellu Seguransa nebe dehan tenku iha Justisa ba krime kontra umanidade. Pojisaun KS nian klaru. Laiha impunidade ba ema nebe halo krime kontra umanidade, genosida, krimi funu nian. Akuntabilidade hanesan fundasaun nebe esensial atu proteze Direitus Umanus. Ida nee lao hatu hari dame nebe rohan laek.

Edio Saldanha, Asosiasaun Nasional ba Tribunal Internasionál (ANTI) no Asosiasaun HAK

Hau hanoin ita nia orador nain tolu nee iha hanoin hanesan. Ba dala uluk ita hanoin katak iha tinan sanulu liu ba ema barak mak halai ba iha igreja Suai. Iha Maternus Bere sai hanesan suspeitu autor nebe oho ema barak iha neba no mos violasaun nebe akontese iha Kodim. Konstituisaun Artigu 29 fo valor as ba ema nia moris.

Hau rona estatementu PR, hateten katak nia ba fatin barak maibe ema la husu kona ba Justisa. Maibe lae karik? Iha Suai sira husu Justisa (nee sai iha Televizaun). Foin lalais mos vitima sira mos halo protestu ba desijaun PR nee.

Karik PR tauk katak ema sei duni ita nia estudante sira, fos la tama, supermi la tama, etc.

Uluk PR ameasa ami katak sei estudante sira ema haruka sai husi Indonesia sira sei mai buka. PDHJ tenki hare se nee viola direitus umanus. PJ mos tenki halo nia knaar.

Ita hakarak hanorin ita nia oan sira atu respeita lei. Ita hakarak atu prevene iha futuru labele akontese bebeik tan.

Realidade hatudu katak ema sira nebe sai autor asasinu iha Lospalos hetan indultu husi PR. Hau hanoin ita antisipa atu iha odiu vingansa. Tanba vitima ida iha Suai dehan, sei buat nee lao bebeik nunee nia dehan, milisia mai ami oho deit. Iha Atabae, ema ida dehan, milisia nee mai ona, nia oho hau nia inan fera tiha kabun, oho hau nia maun tesi tia kakorok. Hau tauk, ikus mai bele hamosu inbrutalidade husi ema sira nebe sente katak laiha justisa ba sira. Hau hein katak ita hamutuk halo took asaun ida. Hein katak PJ Republika halo nia knaar.

Pergunta no Resposta

Alexandre Xavier de Araujo: Konseleiru Politika PR nian
Hau kontente ho enkontru sira hanesan nee atu tur hamutuk deskute kona ba asuntu sira. Koalia barak kona ba asuntu lei, korupasaun, ditadura, etc. Kona ba "Maun boot" ami toman ona 24 anos, entaun susar atu uja liafuan PM ka PR.

Hau atu husu ba UN, atu husu ba Konsellu Seguransa atu hari TI ida, atu ami iha baze legal ida ba ami kona ba Timor oan nia hakarak. Tanba uluk iha SCU iha naran barak, gasta osan barak maibe depois sei tiha nune deit. Kona ba Korupsaun hau konkorda kona ba nee tamba presija iha akuntabiliade. Kona ba PDHJ, sira nia poder limitadu.

Nico, ANTI
Lideransa nasaun nee nian gosta uja liafuan justisa no rekonsiliasaun. Hau nia pergunta, lolos nee vitima sira iha direitu atu hetan justisa laos sira mak hakilar kona fali ba justisa. Hau nia pergunta saida mak Komisaun A halo kona ba Chega! Kona ba indultu nian, kriteria indultu nian nee oinsa? Kona ba kaer fali MB karik PN bele halo karta ba UN atu kaer?

Rui Viana, HAK
Oinsa UN bele halo buat ruma? Bele ka lae hodi ba TR? Komentariu: hau hanoin fenomena nebe akontese nee, uluk kuandu Pe. Martinho kritika 3A. Agora nee RXKing: Ramos Horta - Xanana – King. Maun boot nee perigu tanba halo presaun psikolojika.

Resposta: Fernanda Borges (PN)
Uluk liu ba Sr. Alex, hau husu atu fo konseleiru karik hare mos ba lei. Hau lee Juramentu Presidente nian. Ami simplesmente ejije PR halo nia knaar atu halo nia juramentu:

Hau hanoin ita soe lia wainhira kona ba ami nebe tinan 24 hat iha nee, toman tiha ona. CNRT hari iha Penice, no ami vota ba atu hili Xanana ba Presidente no Horta ba Vice. Ita respeita sira nudar maun boot maibe sira tenki halo tuir Lei. Uluk RH hetan Nobel da Paz tanba koalia kona ba direitu povu rai nee nian no agora ita husu nia kontinua koalia kona ba nee. Rezolusaun... ezize justisa ba krime kontra umanidade. Tanba nee mak hari SCU. Hau husu UN atu esplika liu tan. Laos ita atu hein deit Konsellu Seguransa, tanba ita asina ona konvensaun barak neebe fo knar mai ita atu halo justisa krime kontra umanidade. Kona ba CVA hari ilegal. CVA mos ezize responsabilidade. Tanba nee mak komisarius CVA nian hare katak laiha fatin atu fo amnestia geral. Forgive and Forget nee iha diskursu PR nian. Laiha baze ba amnestia geral. Komisaun A halo ona nia servisu kona ba Rezolusaun ba CAVR no Chega!.  Maibe Presidente PN la tau ba iha meja, tanba laiha separarasaun de poder. Kona ba kriteriu indultu tenki iha duni. Agora sei iha ema ida iha tribunal nebe hein hela julgamentu. Indonesia la preokupa ho nia no presidente mos la preokupa. Entaun balu iha kadeia, balu laiha kadeia.

Kona ba halo karta, PN laiha kompetensia. PJ mak iha kompetensia.

Kona ba sadik Konsellu Seguransa, sira mak halo rezolusaun nee, entauk ita hakarak hatene saida mak UN atu halo tan ba oin.

Laiha Estradisaun ba MB. Konstitusaun dehan estradisaun nee Tribunal mak bele halo. Estradisaun mos labele hali por motivus politiku.

Fernanda (UNMIT)
Hari TI, primeiru ita tenki fob a nasaun nebe krime nee akontese. Se iha TL laiha julgamentu no Indonesia laiha julagamentu, maka Komunidade internasional sei hare opsaun saida mak foti. Kona ba amnestia no perdaun nian, tenki iha uluk, lia los, akuntabilidade, rekonhesimentu sala, no tenki iha reparasaun ba vitima sira.

Luis Oliveira (JSMP)
Iha posibilidade atu lori ba TR ka lae? Too ohin loron ita seidauk iha referensia kazu kona ba atu lori desijaun politika ba TR. Se iha Pengadilan Tata Usaha Negara ita bele tama. Dalan seluk tenki foti. Konstituisaun fo dalan. Orgaun seluk nebe bele halo buat nee mak, PN, PM, PDHJ, PR, PJR. Hau hanoin ita bele koko dalan seluk tanba Tribunal iha pojisaun klaru.

Edio Saldanha (ANTI)
Kona ba Ezijensia Familia Vitima, hau hanoin ita tenki ejize tanba se lae estadu halo nia obrigasaun maibe la tuir ita nia hakarak. UN mos labele fase liman ba buat nebe akontese. Krime nebe akontese iha Timor-Leste nee krime kontra ema mundu nee nian. Hanesan esperiensia iha Kambodia, sira halo akordu ho UN.

Tempo to ona atu halo movimentu atu defende KONSTITUISAUN

Pergunta: Francisca Alves (REDE FETO):
Asaun konkretu saida mak PN halo ona ba kazu MB? Tuir informasaun, katak tama legal, kapturasaun legal, sala iha nebe, los iha nebe PN dehan sei bolu PM no PR maibe realiza ona ka seidauk? Ikus liu: kazu nee tristeza nee ba ita hotu. Tanba prezidente fo indultu ba ema nebe halo crime violensia

Kerry Brogan (Asia Foundation)
Iha ona ka lae resposta husi Presidente ba karta husi Alta Komisariu NU? Iha ona aproximasaun ka karta balu haruka ba Indonesia kona ba MB? Sei iha KS iha fulan hirak nee 23 Oktober, iha oportunidade atu fo hanoin kuandu hakarak.

Ines Martins (La’o Hamutuk)
Iha posibilidade ka lae atu iha Justisa sem liu husi governu? Iha mos mekanismu atu dudu kazu Maternus Bere nian ka lae?

Alexander (Konselleiru Politika PR)
Iha ona ka lae TI iha rai hanesan Kambodia, etc

Resposta II: Fernanda (UNMIT)
Kona ba karta too ohin loron seidauk hetan resposta. Laiha karta ida mak haruka ba Indonesia. UN nia pozisaun klaru katak labele iha impunidade ba violasaun ka krime kontra umanidade. Hau repeta buat nebe hau dehan ona, resposibiladade primaria ba juridiksaun iha nasaun nebe krime akontese. No sei laiha TL no Indonesia, Komunidade internasional sei hare opsaun seluk, inklui TI.

Fernanda Borges (PN)
Aksaun konkreta saida mak PN halo ona kona ba MB. Primeiru hare ba kompetensia, PN iha kompetensia simples rua deit: Halo Lei no Halo Fiskalizasaun. Hanesan kazu agora PN ejize atu halo orgaun estadu kumpri konstituisaun. Aksaun Konkretu: PN hatudu nia la kontente no husu esplikasaun imediata wainhira PR atu sai ba liur. Presidente dehan PN halo intervensaun ba nia servisu, maibe ida nee iha konstituisaun. Se nia obriga atu sai, nia automatikamente lakon nia poder. Prosedimentu nee ketak ida. Depois de nee Presidente tenki husu, maibe presidente la halo. Ema estadu nian tenki humilde.

Segundu Pasu : Bankada Fretilin no KOTA hatama mosaun de Censura. Tanba hatama proposta ba meza atu bolu PM maibe meza la aprova. PN sei husu ba PJR saida mak atu halo ba oin.

Prosedimentu Legal: Serious Crime fo mandatu de kaptura iha 2003 ba Maternus Bere ho ema 13, ba kazu iha Suai, nebe dokumentu nee legal. Nia tama fali mai segunda semana de Agostu iha West Timor. Povu iha neba rekonhese nia no kaer nia, no polisia UNPOL foti nia na detensaun no hatama ba Tribunal Suai. Nia hela iha detensaun preventiva atu nia labele halai no mos labele hetan violensia husi populasaun. Hein hela atu halo julgamentu iha Tribunal husi Juiz internasional ida.

Kona ba PR, presija enkontru ho PN. PM bolu ona maibe la mai, entaun halo mosaun de sensura.

Liga ba informasaun tan kona ba kazu Maternus Bere.
 

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua D. Alberto Ricardo, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: laohamutuk@gmail.com    Web: http://www.laohamutuk.org    Blog: laohamutuk.blogspot.com