Bobby Boye: Kondenadu, Asesór no Na’ok-teen

22 Outubru 2014. Atualiza 19 Janeiru 2016

Konteúdu pájina ida ne’e

• Bobby Boye hetan kaer no akuzasaun

• Simu responsibilidade - hetan sentenza tinan neen iha prizaun

• Boye halo rekursu kontra julgamentu, komesa ninia sentensa

• Boye nia lala’ok

  • Hetan kontratu hosi Noruega atu servisu iha Dili

  • Servisu ba Timor-Leste ... no nia an-rasik

  • Rejeita sai kulpadu

  • Noruega nia esplikasaun

• Australia fó preokupasaun

• Kobertura media

• Dokumentu sira

Hun

Timor-Leste nudár nasaun ida ne’ebé depende maka’as ba esportasaun petróleu iha mundu, no 95% hosi estadu nia reseita mai hosi kompañia internasionál ne’ebé hetan kontratu hosi Timor-Leste atu supa no fan mina-rai no gas hosi Tasi Timor nia okos. Maski nune’e, hanesan kompañia hotu ne’ebé buka lukru, objetivu primeiru hosi kompañia sira mak atu maximiza sira nia retornu ba sira nia asionista sira. Dalan ida atu maximiza sira nia retornu mak selu taxa no royalty uitoan bainhira sira bele hasees an, hanesan detailladu iha pájina web La’o Hamutuk kona-ba Making the Oil Companies Pay what they Owe (Halo Kompañia Mina-rai sira atu Selu sira nia Tusan).

Iha 2009 nia rohan, Programa asisténsia Noruega rekruta Bobby Boye, ne’ebé hatete nia an nudár peritu ida iha lei taxa petróleu, atu ajuda Timor-Leste hodi simu osan sira ne’ebé loloos direitu Timor-Leste nian. Durante tinan tolu nia laran, nia fó asesória no lohi tiha Ministériu Finansas Timor-Leste, nia detailadu hanesan iha okos.

Bobby Boye hetan kaer no akuzasaun

Iha 19 Juñu 2014, ajente federal EUA (FBI) kaer Bobby Boye iha New Jersey, EUA, ho akuzasaun lohi hodi na'ok osan Timor-Leste liu tokon $3.5. Tuir FBI, Boye "katak nia lohi [Timor-Leste] reprezentativu hodi ajudika kontratu ida ne’ebé lukrativu ba Opus & Best Services LLC, Kompañia legal no kontabilidade falsu ida iha New York ne’ebé, lahó koñesimentu [Timor-Leste], kontrola subasubar hosi Boye. ...
     "Entre Juñu 2012 no Dezembru 2012, [Timor-Leste] transfere ona maizumenus liu tokon $3.5 ba konta cheque negósiu Opus & Best nian iha New York, ne’ebé kontrola hosi Boye. Nia uza osan hirak ne’e atu sosa propriedade haat iha New Jersey ne’ebé nia selu ho osan liu tokon $1.5, karreta luxu tolu (Bentley tinan produsaun 2012 ho folin $172,000, Range Rover tinan produsaun 2012 ho folin $100,983), no Rolls Royce tinan produsaun 2011 ho folin $215,000, relójiu rua ho folin besik $20,000.
     "Akuzasaun [hitu] ba konspirasaun no transfer fraude ne’ebé akuza ba Boye, no kada akuzasaun ne’e bele hetan sentensa másimu tinan 20 iha prizaun laran no multa to'o rihun $250,000 ka multa duplu hosi montante ne’ebé nia hetan ka montante osan ne’ebé lakon hosi ida ne’ebé sai vítima.”

FBI halo dokumentu Keixa Kriminál ho pájina 10 ho tribunal, no media lokál sira fó sai kapturasaun ne’e. Boye detein iha sela Distritál Bergen County, New Jersey.

Hafoin kalan ida iha sela laran, polísia lori Bobby Boye ba hatán iha Juiz Majistradu EUA Mark Falk nia oin. Iha audiénsia durante minutu sanulu, Boye tau nia uma iha Franklin Lakes, New Jersey (iha liman loos) nudár obrigasaun tokon $1.5, no juis fó liberdade kondisionál ba nia. Boye sosa uma ida ne’e iha Janeiru 2012 ho osan tokon $1.9 (hare video ida iha 2011 kona-ba uma ne’e iha YouTube). Boye koko atu fa'an uma ne’e dezde Outubru 2013 ho folin tokon $2.7, maibé ikus mai hasai hosi merkadu iha loron balu nia laran hafoin nia hetan kapturasaun.

Kondisaun liberdade kondisionál molok hala’o julgamentu ba Boye, ne’e hanesan ho T.I.R iha Timor-Leste, inklui prende nia dokumentu viajen nian, hodi labele sai hosi New Jersey lahó lisensa, hela iha uma de’it ekseptu ho razaun espesífiku ruma, husik autoridade sira atu monitor nia pozisaun ho GPS, no labele iha “kontaktu diretu ka indiretu ho ema ruma ne’ebé ka dala ruma vítima ida ka sasin potensiál ida.”

Iha audiénsia iha 2 Jullu, Juiz Majistradu Cathy L. Waldor kontinua (suspende atividade) ba kazu nian ba loron 60 hodi fó dalan ba prokurador no defensór sira atu negosia pledoi ida “ba iha interese justisa nian” no evita kustu ba julgamentu ida nian. La'o Hamutuk hakerek karta ba prokurador Shirley Emehelu iha 21 Jullu, hodi husu nia atu lori kazu ne’e ba julgamentu ho hanoin atu loke informasaun barak tan kona-ba violasaun ba lei Timor-Leste no Noruega nian, no mós atu loke sai se mak dala ruma halo konspirasaun hamutuk ho Boye. Maski nune’e, iha 12 Agostu, Juiz Waldor hanaruk kontinuasaun to’o iha 22 Outubru tanba “Estadus Unidus no ema hetan akuzasaun husu tempu adisionál atu negosia akordu pledoi ida, ne’ebé bele halo kualkér prosedimentu “grand jury” nian no kualkér julgamentu ne’ebé sei tuir mai hosi asuntu ne’ebé la nesesáriu ne’e.  Iha loron 21 Outubru, Juiz Waldor hanaruk kontinuasaun to'o iha 22 Dezembru.  (Kada fulan rua, juiz ida adia prosesu liu tan, hare iha kraik.)

Iha Outubru 2014 nia rohan, Prokurador EUA Paul Fishman, husi divizaun sivíl no servisu hamutuk ho prokuradór Shirley Emehelu, hakerek karta ida ba Juiz Waldor inklui dokumentu suporte sira ne’ebé hatudu katak uma iha enderesu 720 Apple Ridge Road, Franklin Lakes, New Jersey, EUA la bele uza atu garante katak Boye la halai hosi prosesu justisa, tanba uma ne’e la pertense totálmente ba nia. Molok ninia kapturasaun iha Juñu, Boye iha hela prosesu divórsiu ho nia kaben Ediltruda Kalikawes, no Tribunál Família nian haruka ona katak uma ne’e tenke fa’an, no osan rezultadu husi fa’an uma ne’e nian tenke fahe entre nia no nia kaben. Boye nia advogadu defensór, prokuradór no Juiz Waldor konkorda katak Boye tenke fó osan ho montante $500,000 atu garante katak nia la halai hosi prosesu justisa (bainhira uma ne’e fa’an ona, tuir garante hosi Sra. Kalikawes nia advogadu) envés de lakon uma ne’e, no juis halo ona revizaun ba kondisaun sira ne’e ba ninia Termu Identidade Rezidénsia (TIR). Uma ne’ebé refere fa’an duni iha Novembru 18 ho folin $1,850,000. Iha Dezembru 2015, bainhira Boye tama iha prizaun, tribunál fó fila fali ninia osan garantia $500,000 atu “tau iha fundu ba selu ninia obrigasaun fiskál nasionál sira, no mós ba manutensaun Akuzadu nia oan labarik na’in rua.”

Boye ninia atividade sira fó ona impaktu ne’ebé luan liu. Iha 18 Outubru 2014, Polísia Nasionál Timor-Leste kaer sidadaun Portugés Tiago Guerra, asesór, konsultór, emprezáriu no rezidente Dili nian ba tempu naruk ona, nu’udar suspeitu “brankeamentu capital” ba $800,000 ne’ebé nia transfere husi Timor-Leste. Guerra nia fen Chan Fong Fong Guerra mós hetan kapturasaun maibé agora polísia husik ona ho kondisaun labele sai husi Timor-Leste, maski sira na’in rua seidauk hetan akuzasaun legal. Iha rumores barak (maibe faktu konfirmadu uitoan) katak kapturasaun sira ne’e iha relasaun ho sira nia eis viziñu, Bobby Boye. To’o Abril 2015, Guerra dadur iha prizaun ba fulan walu sein oportunidade atu defende nia an. Ninia proponente sira kria ona blog no pájina Facebook ida, ezije atu “nia hetan tratamentu ne’ebé justu no hetan protesaun no garantia ba nia direitu sira.” Iha 15 Juñu 2015, Timor-Leste ninia Tribunál Rekursu fó ona orden ba Guerra atu nia bele sai husi prizaun preventivu no nia tenke ba autoridade sira kada semana tanba akuzasaun sira kontra nia sei pendente hela. To'o 2015 nia rohan, laiha mudansa situasaun.

Prokuradór no juiz Timor oan sira iha kapasidade uitoan liu kona-ba atividade finansiál ne’ebé kompleksu, no sistema judisiál Timor-Leste nian seidauk organiza ho didi’ak. Iha 24 Outubru, hafoin painél arbitrajen Singapura nian deside Timor-Leste lakon iha kazu impostu petróleu balun (balun ne’ebé Bobby Boye mak inísiu bainhira nia servisu ho Ministériu Finansas), Primeiru Ministru Xanana Gusmão konvense Parlamentu Nasionál no Konsellu Ministru atu termina kontratu sira ba juiz, prokuradór no investigadór internasionál sira imediatamente, ho baze forsa maior tanba desizaun Tribunal Arbitrajen ne’e relasiona ho sira nia fallansu. Iha buat barak mak hatete no hakerek ona kona-ba kontroversia ida ne’e, qestaun Konstituisionál ne’ebé levanta, ninia impaktu ba operasaun judisiáriu, Estadu de Direitu, Nasionálizmu, investimentu estranjeiru no relasaun internasionál sira, maibé kestaun ida ne’e asuntu ketak husi kazu Bobby Boye ninian.

Iha 12 Novembru 2014 Bobby Boye deklara ba Juiz Waldor katak nia la iha osan atu selu ninia advogadu. Hafoin audiénsia minutu ida, Juiz nomea K. Anthony Thomas husi Gabinete Defensór Públiku Federál atu reprezenta Boye. Gabinete ida ne’e fornese advogadu sira atu defende ema kbiit laek sira ne’ebé la iha osan atu selu sira nia advogadu rasik. Servisu ne’ebé gabinete ne’e fó, hetan finansa husi osan povo EUA nian. Maibé haree ba Boye ninia istória subar riku-soin no deklara katak nia kiak, ami duvida se nia bele justifika deklarasaun ida ne’e. Iha 16 Janeiru 2015, advogadu Barbara A. Ward tama iha kazu ida ne’e atu reprezenta Governu EUA “ho relasaun ba kestaun konfisku,” prosesu ida ne’ebé repete hikas ona hafoin nia deklara simu nia sala iha Abril.

Iha 30 Dezembru 2014, Juiz Michael A. Hammer adia prosesu ba loron 60 tan atu hein negosiasaun ba akordu pleito (plea bargain), no iha 18 Fevreiru 2015, Juiz Waldor autoriza atu adia dala ida tan, to’o 22 Abril, tanba “argumentu negósiu sira oras ne’e daudaun iha prosesu hela.” Juiz Waldor autoriza tan atu adia ba loron 60 iha 16 Abril. Diferente husi adiamentu dala lima ne’ebé halo uluk ona, ninia autorizasaun ida ne’e indika progresu: “Parte sira ne’e konkorda ona ba akordu pleito no hakarak tempu balun tan atu permite nia rekoñese nia sala, ne’ebé sei fó kualkér prosesu júri nian no kualkér kontinuasaun julgamentu ba kazu ida ne’e la nesesáriu.”

“Ha’u halo konspirasaun atu komete fraude”

[Bele hare Rekoñese sala - Boye tenke selu fila fali tokon $3.5 ba TL.]

Iha 12 Marsu 2015, prokuradór federal sira haruka karta ho pájina walu ba Boye no mós ba ninia defensór públiku, deskreve akordu pleito, no Boye asina karta ne’e semana ida liu tiha ne’e. Iha 28 Abril, Boye halo aplikasaun ba Tribunal atu permite nia rekoñese nia sala ba konspirasaun atu na'ok liu husi transferénsia eletrónika, hanesan akuzasaun iha Prokuradór nia dokumentu “informasaun”. Hafoin Boye nia konkorda atu lakon ninia direitu sira ba akuzasaun formal no julgamentu, Boye konfesa katak nia sala duni iha audiensia durante minutu 40 ho Juiz Freda L. Wolfson iha Tribunál Distritál Federal iha Trenton, New Jersey, EUA. Boye sei hetan ninia sentensa iha 13 Agostu (ne’ebé depois adia fali ba 15 Outubru), no karik nia bele hetan sentensa prizaun ba tinan 20. FBI fó sai komunikadu imprensa ida, no ninia rekoñesimentu katak nia sala duni ne’e relata iha jornál balun hanesan U.S. legal no jornál lokál New Jersey no Bergen County. Governu Timor-Leste fó sai mós komunikadu imprensa ida.

Iha Prokuradór nia material informasaun pájina 10 ida, ne’ebé Boye konkorda, deskreve ninia servisu iha Timor-Leste (bolu ‘Nasaun A’) no mós oinsá nia kria kompañia falsu ne’ebé mak bolu Opus & Best, “kompañia lei no kontabilista multi-nasionál, estabelesidu” (kompañia ida ne’ebé la iha membru seluk, maibé só Boye de’it). Iha informasaun ne’e mós hatete katak entre Marsu 2012 to’o Maiu 2013, Boye “ho koñesimentu no intensionalmente halo konspirasaun no konkorda ho ema sira seluk, koñesidu no deskoñesidu, atu inventa eskema no manobra atu lohi [Timor-Leste] liu dalan fantasia reprezentasaun no promesa sira ne’ebé konkretamente falsu no bosok…” Sira nia objetivu mak “arguidu BOYE no ema sira seluk hariku sira nia an liu dalan fraude atu hetan kontratu konsultóriu sira ne’ebé lukrativu husi [Timor-Leste].” Boye “obriga” ninia kaben (oras ne’e divorsiadu) Ediltruda Kalikawes (ne’ebé la temi ka hetan akuzasaun) “atu kria Opus & Best nia konta email sira, inklui konta ida ba nia parseiru” ‘Dominic Lucas’ (ne’ebé mós la temi ka hetan akuzasaun -- seidauk klaru karik nia eziste ka lae). Boye nia tenderizasaun ba kontratu sira ho Timor-Leste “kompostu deklarasaun falsu lubuk ida no reprezentasaun sira ne’ebé konkretamente falsu ne’ebé ho intensaun atu fó [Timor-Leste] impresaun sala katak Opus & Best ne’e kompañia ida estabelisidu no iha lejitimidade hodi hala'o” operasaun iha kontinente lubuk ida ba tinan barak nia laran ho “talentu advogadu, kontabilista no ekonomista sira ho kualidade klase primeiru.”

Maske nune’e, prokuradór sira hakerek, “Iha realidade, arguido BOYE kria Opus & Best ho objetivu atu hatama dokumentu tender falsu sira. No mós, Opus & Best la iha funsionáriu nein ida aleinde arguido BOYE…” Boye mós “selu nia [kaben] atu kria website ida ba Opus & Best ne’ebé fahe informasaun misreprezentadus lubuk ida …” Boye “esploita ninia filiasaun iha Komisaun ba Revizaun Tender ninian” atu “dirije” kontratu sira ba Opus & Best no depois halo Timor-Leste atu transfere $3,510,000 ba Boye nia konta bankária husi Juñu to’o Dezembru 2012.

Iha Dezembru 2012, Boye kria “Opus & Best Hong Kong”, no, hamutuk ho kompañia advogadu ida iha Hong Kong, koko atu husu $250,000 tan iha Abríl 2013. “Nasaun A la simu proposta ida ne’e, no iha tempu badak hafoin ida ne’e, akuzadu BOYE husik hela Nasaun A.” Iha fulan Maiu nia rohan, ‘Dominic Lucas’ haruka invoice ida mai Timor-Leste husu “pagamentu ikus” ho montante $630,000 maibé Timor-Leste la selu ida ne’e.

Prokuradór deskreve oinsá “BOYE manipula” transferénsia osan tokon $3.5 husi Timor-Leste ba Opus & Best “ba nia uzu pesoál,” inklui hodi sosa rai no uma haat, karreta luxu tolu no relójiu (ne’ebé karun tebes) rua. Hanesan parte ba ninia akordu pleito, Boye sei lakon nia direitu ba sasan hirak ne’e, inklui mós “$4,233,015.42, nu’udar total montante nia hetan husi krime ne’ebé nia halo.”

Boye asina deklarasaun hatete: “Ha’u hakarak atu konfesa katak ha’u sala duni tuir akordu pleito ida ne’e.” Nia rekoñese katak nia halo duni konspirasaun atu komete fraude transferénsia, krime ne’ebé iha sentensa másimu tinan 20 iha prizaun hamutuk ho multa valór dala rua hosi montante nia hetan liu dalan ilegál ka montante ne’ebé ninia vítima lakon, konforme ida ne’ebé mak boot liu. “Aleinde ne’e, BOBBY BOYE konkorda atu selu fali osan hotu ne’ebé lakon tanba krime ne’e ka tanba planu, konspirasaun no atividade kriminozu oi-oin ne’ebé liga ho krime ne’e, ba [Timor-Leste] ho valór de $3,510,000.”

La'o Hamutuk hanoin katak “forma husi skema, konspirasaun ka baze ba krime" bele inklui pagamentu sira ba Boye ba servisu hotu ne’ebé nia hetan liu husi bosok sira. Aleinde ne’e karik avaliasaun impostu balun ne’ebé nia inisia hasoru kompañia mina-rai sira ikus mai sai inválidu, Timor-Leste nia despeza legal no gastus seluk halo ba prosesu ida ne’e bele sai mós parte ba forma ida ne’e, inklui funan no/ka kustu legal sira ne’ebé painél arbitrajen sei orden ba Timor-Leste atu selu ba kompañia sira. Boye karik hahú kazu hirak ne’e nudár parte ba ninia manobra atu manán konfiansa husi ulun boot Timor-oan sira, tanba nia hatene katak kompañia sira provavelmente selu uluk molok halo rekursu. Osan ne’ebé sei lakon bele liu fali tokon $3.51, no tenke ezije ba Boye atu selu hotu. Akordu pleito ne’ebé halo la taka kazu administrativu sira ka kazu sivíl sira seluk. Ami hanoin karik iha posibilidade atu bandu Boye atu la bele halo prátika legal ka karik Timor-Leste bele lori kazu sivíl ida hasoru nia.

Maske pena ba konspirasaun atu komete fraude transferénsia bele hetan másimu tinan 20 iha prizaun, akordu pleito klasifika ida ne’e nudár “ofensa nivel 24” tuir Matadalan Sentensas nian, ne’e duni toma mós konsiderasaun katak arguidu “simu ninia responsabilidade.” Bazeia ba Tabela Sentensas ninian, no depende karik sei konsidera mós Boye nia sala iha 2006 ka lae, iha posibilidade nia sei hetan de’it kastigu prizaun ba tinan 4-6. Iha Jullu 8, Juiz Freda L. Wolfson hatán atu adia sentensa ba 15 Outubru (tuku 11:00 dadeer iha Sala Tribunal 5E, US Tribunal Federal EUA, Trenton, New Jersey), atu fó tempu liu tan ba parte sira hodi prepara Relatóriu Pré-Sentensa no fó komentáriu kona-ba ezbosu ne’ebé iha.

Iha 15 Jullu, La’o Hamutuk hakerek karta ba prokuradór sira atu esplika katak tuir loos Boye tenke selu fila fali ba Timor-Leste osan hotu ne’ebé lakon tanba Boye nia krime. Ami nia karta esplika katak se karik painél arbitrajen deside katak tokon $400 hosi tokon $440 avaliasaun taxa mak la válidu, no manda Timor-Leste atu selu funan, penalidade no kompañia sira nia kustu legál sira, buat hirak ne’e bele liu tokon $176, hanesan tuir mai:

Governu Norwegia no Timor-Leste iha informasaun ne’ebé espesífiku liu ba númeru 1,2 no 4. Painél arbitrajen sei deside númeru 5, 7 no 8, nune’e ita bele hatene presizu liu iha futuru. Aleinde lakon finansial, Boye nia konspirasaun estraga Timor-Leste nia lider sira nia naran no efisiénsia, lori violasaun Konstituisaun no mós afeta nasaun nia naran entre investor sira no ema ne’ebé iha planu aat ba Timor-Leste.

Iha 16 Jullu, Juiz Wolfson manda Boye atu fó $4,233,015.42 ba autoridade EU sira, inklui mós propriedade tolu. Boye nia karreta sira no sasán sira seluk sei fa’an atu hetan osan ne’e. Orden ne’e, ne’ebé prokuradór, advogadu defeza sira no Boye rasik konkorda, rezulta iha notísia públiku ne’ebé públika iha 8 Agostu. Ba sé de’it ne’ebé hakarak hato’o sira nia interese iha propriedade hirak ne’e, iha loron 60 atu haruka sira nia petisaun ba Tribunal.

Boye tuir audiénsia iha Juis Wolfson nia oin iha Tribunál Federál Trenton iha 15 Outubru 2015, no nia hetan sentensa prizaun tinan neen, no depois nia hasai, nia sei iha supervizaun durante tinan tolu tan. Nia sei tama iha prizaun iha 30 Novembru, probablemente iha Fort Dix Federal Correctional Institution iha New Jersey, fatin ne’ebé mak uluk uza nudár baze militár Estadus Unidus nian. Média New Jersey nian lubuk ida halo ona reportajen kona-ba sentensa ne’e, maske sira ladún aumenta ba prokuradór nia komunikasaun imprensa. Juiz haruka ona Boye atu selu fila fali tokon $3.51 ba Trezouru Estadus Unidus, hafoin sira sei distribui ba Timor-Leste nia advogadu Pierre-Richard Prosper hosi kompañia legál Arent Fox. Boye tenke halo pagamentu ne’e imediatamente, maibé mós bele kria oráriu pagamentu atu selu uitoan-uitoan. Tribunál la husu Boye atu selu interese (ne’ebé bele han tokon $1 ka liu), no mós ignora La’o Hamutuk nia esplikasaun katak Boye nia krime sei kustu Timor-Leste mínimu dala lima-nulu liu tan duké tokon $3.5. La’o Hamutuk mós públika ona blog kona-ba sentensa ne’e.

Iha 27 Outubru, prokuradór sira públika Notifikasaun ne’ebé deskreve propriedade tolu ne’ebé Boye konkorda atu lakon: 25 Crescent Hollow Court, Ramsey, NJ; 36 Rosewood Court, North Haledon, NJ; and 140 Grove Street, Elizabeth, NJ. Ema seluk ne’ebé reklama propriedade hirak ne’e tenke protesta antes fulan rua liu ona. Iha Dezembru, avogadu Zahid Quraishi fo hatene ba tribunal katak Boye tenki selu $166,861 ba Crescent Hollow Condominium Association iha ligsaun ba 25 Crescent Hollow Court, husi estraga bainhira pipa tohar no halo inundasaun ba vizinhu nia uma iha Fevreiru 2015, bainhira uma Boye nian mamuk hela.

Iha 7-8 Maiu 2015, média Dili nian públika artigu balun ne’ebé konfuza, dehan katak Prokuradór-Jerál hatete katak ninia gabinete loke ona investigasaun kontra estranjeiru na’in rua, “DG” (ka “TG”) ho “MF” (ka FF) relasiona ho Boye nia rekoñesimentu katak nia sala duni. Ami la hatene se ida ne’e refere ba Tiago Guerra no Fong Fong. Maski iha pedidu hosi públiku atu loke investigasaun kontra sidadaun Timor oan sira, inklui ofisiál públiku ne’ebé karik hola parte iha Boye nia konspirasaun, prokuradór temi estranjeiru sira de’it.

Boye halo rekursu kontra julgamentu, komesa ninia sentensa

Iha 16 Novembru 2015, Boye hili advogadu Michael Confusione atu reprezenta nia, no hapara ninia defensór públiku K. Anthony Thomas. Boye esplika katak Thomas la responde ba ninia hakarak atu halo rekursu kontra julgamentu finál, no nia presiza tempu tan atu buka osan atu selu ba advogadu privadu. Confusione husu hanaruk tempu ba loron 30 duke tempu normál ne’ebé tuir lo-loos tenke halo rekursu. Iha 18 Novembru, Boye selu impostu rekursu $505 ba tribunál.

Tribunal hetan notifikasaun kona-ba Boye nia rekursu iha loron 16 Novembru, no iha loron 21 Dezembru rona argumentu kona ba Boye nia pedidu ba hanaruk tempu ne’ebé aloka ba hatama rekursu, no Juiz Wolfson konkorda iha loron 12 Janeiru 2016. Audiensia ida tan sei hala’o iha Juiz Wolfson nia oin loron 18 Fevreiru 2016.

Iha tinan 2015 nia rohan, Boye komesa ninia sentensa fulan 72 iha Fort Dix Correctional Institution (prizaun), New Jersey, EUA. Se nia la kria problema, governu bele hamenus ninia sentensa fulan 10 ba “tempu komportamentu di’ak” no sei hasai hosi prizaun iha loron 18 Fevreiru 2021.

Iha loron 8 Dezembru, tribunal kansela Boye nia "númeru rekoñesimentu”, no iha loron 17 Dezembru tribunal manda katak ninia osan obrigasaun $500,000 sei “tau iha fundu ba selu obrigasaun fiskál nasionál no ba manutensaun Akuzadu nia oan labarik na’in rua.” Tanba ne’e, osan ne’e la bele inklui iha reparasaun ne’ebé nia tenke selu fali ba Timor-Leste.

La’o Hamutuk halo kompilasaun ba dokumentu xave relasiona ho prosedimentu kriminál federal ohin loron ba Boye, ne’ebé ami sei kontinua atu atualiza bainhira kazu ne’e la’o hela. Hare iha okos atu hare dokumentu no relatóriu media nia balu tan.

Buat barak hosi sesaun tuir mai iha (ho kór azúl) ne’e mai hosi artigu ida ne’ebé hakerek hosi Carl Alfred Dahl ne’ebé publika iha 23 Agostu 2014 iha Aftenposten iha lian Noruega, no versaun ida badak liu iha Ingles hafoin loron rua tuir mai. Iha foto balu no ligasaun bali ma hosi Aftenposten, maski La’o Hamutuk aumenta balu tan. Informasaun ne’ebé La’o Hamutuk aumenta mak ho nia kór fundu mutin. Kliik gráfiku sira ne’e atu hare ho boot.

Ministériu Finansas Noruega haruka na'ok-teen ida atu ajuda Timor-Leste Adapta hosi artigu ida ne’ebé hakerek hosi Carl Alfred Dahl, Aftenposten, 23 Agostu 2014 Noruega kontrata na'ok-teen Nigeria-Amerikanu Bobby Boye atu ajuda Timor-Leste, nasaun ida entre nasaun kiak liu iha mundu. Ohin loron, ema ne’e hetan alegasaun hodi na'ok povu nasaun ne’e nia osan dollar tokon $3.51. "Hanesan ita boot bele imajina, Governu Timor-Leste iha pergunta balu atu husu ba Noruega bainhira sira hatene buat ne’ebé afeta ona ba sira." Deklarasaun ida ne’ebé diplomátika hosi Pierre-Richard Prosper (liman karuk), advogadu Amerikanu ida ne’ebé ho naran Governu Timor-Leste hodi hatán ba Aftenposten.		Bobby Boye ne’ebé uluk hetan ona sentensa ba iha prizaun tanba halo fraude iha Estadus Unidus ba halo entrevista ida ho Ministériu Finansas Noruega nian. Hosi entrevista ne’ebá nia hetan servisu nudár asesór atu ajuda Timor-Leste atu jere osan mina-rai nian.
Nasaun ne’e sai independente iha 2002, hafoin okupa hosi Indonézia dezde 1975. Kada ema terseiru hosi Timor-Leste moris iha buat ne’ebé Banku Mundial define nudár pobreza estremu. Maibé ekonomia sai lalais liu tan rezultadu hosi deskobrimentu mina-rai no gas iha tasi okos. Ida ne’e mak oinsá Noruega tama mai. Projetu Oil for Development (Mina-rai ba Dezenvolvimentu) ne’e konsidera nudár símbolu kooperasaun dezenvolvimentu Noruega nian. Timor-Leste dala barak temi nudár projetu ida ne’ebé iha susesu boot tebes. Objetivu hosi asistensia ne’e atu ajuda nasaun ne’ebé iha rekursu mina-rai no gas barak ne’e hodi lori rekursu hirak ne’e atu sai grasa ida duke sai malisan ida. Nudár parte hosi projetu, Noruega finansia asesór to na’in sanulu atu hahú iha 2008, ho redusaun gradual to’o 2013. Iha 2009 fó sai katak Bobby Boye hetan kontratu. Noruega haruka nia mai iha kapitál Dili atu halo Timor oan ne’ebé kiak hodi hamenus sira nia kiak uitoan. Maibé Boye mós halo riku nia an durante nia hela iha Timor, tuir FBI, ida ne’ebé aplika lei federal Estadus Unidus.		Futuru Liurai, liurai oan Haakon Magnus met hasoru malu ho Ministra Finansas Timor-Leste Emilia Pires iha Oslo iha Dezembru 2011. Iha tempu ne’ebá, Bobby Boye servisu iha projetu Oil for Development iha Pires nia ministériu, ho saláriu hosi Noruega. PHOTO: Larsen, Hakon Mosvold
FBI kaer Bobby Boye iha Aeroportu Internasionál Newark fora hosi New York iha 19 Juñu 2014. Ema ho idade tinan 51 ne’e hetan akuzasaun katak nia na'ok osan tokon $3.51 hosi Timor-Leste, montante ne’ebé atu hanesan ho osan ne’ebé Timor-Leste gasta ba saúde durante fulan ida. Boye rejeita akuzasaun ne’e. Aftenposten bele fó sai katak Bobby Boye iha karreira naruk ho problema ho lei. Oinsá nia bele servisu iha Ministériu Finansas Noruega nian?
Ho liurai oan no santu sira Bobby Boye moris iha Nigeria iha 1963. Bobby nia apelidu ne’e dala ruma uza Boye no dala ruma Ajiboye. Rezumu ida hosi Boye nian hateten katak nia hetan nia sertifikadu hodi halo treinamentu no pratika jurista nian hosi Nigeria iha 1987. Iha nia CV, Boye mensiona nia afiliasaun ho Lincoln’s Inn lawyers' society iha Londres no Bacharelatu direitu nian hosi koléjiu prestíjiu ida iha St. John’s College iha Universidade Cambridge. “Ha’u la hetan rejistu ruma hosi Bobby Boye ka Bobby Ajiboye ne’ebé estuda iha St. John’s College, Cambridge,” bibliotekáriu kampus, Fiona Colbert, nia email ba Aftenposten. Ami hetan resposta hanesan mós hosi Lincoln’s Inn. Maske nune’e, universidade rua iha California, konfirma Boye tuir eskola direitu nian ho sira iha tinan noventa nia rohan.		Antigu Alunus St. John nia lista inklui laureadu Nobel da Paz na’in sia, Primeiru Ministru na’in neen, Arkibispu na’in tolu, santu Katólika na’in tolu no Liurai oan William ... maibé laiha Bobby Boye.
Moras krítiku Iha 1998 Boye hetan servisu iha Morgan Stanley ne’ebé subsidiariu Dean Witter iha Woodland Hills, California. Iha ne’ebá, nia hetan alegasaun nia monu ba tentasaun hosi hariku nia an hosi despeza konsumidór no hosi nia servisu fatin. Tuir desizaun komité dixiplinár nian ba Stock Exchange iha Nova York, Boye na'ok tiha asoens no osan hamutuk maizumenus $90,000 hosi nia kliente na’in rua, falsifika asinatura no halo komérsiu laho sira nia autorizasaun. Hafoin ne’e, nia hatete katak nia hetan moras ida ne’ebé ameasa nia moris. Maibé Bobby Boye la husik moras atu hapara nia karreira. Iha loron balu nia laran hafoin Morgan Stanley selu nia lisensa atu sai ba tratamentu nian, nia hetan servisu ida ho auditor jigante KPMG iha San Francisco, bazeia ba nia CV rasik. Hafoin fulan neen tuir mai, Boye aproveita goza osan moras nian husi fatin ida no saláriu hosi fatin seluk. Bainhira nia padraun iha Morgan Stanley deskobre ida ne’e, sira hasai tiha Boye. Iha Jullu 2004, Boye hetan sensura no bandu permanente atu halo atividade iha Stock Exchange iha New York ho nia membru kompañia sira. Hetan restituisaun taxa Iha 2002 Boye hetan kontratu hosi 3D Systems, pioneiru ba dezenvolvimentu impresora 3-D, iha Valencia, California. Boye mak lidera departamentu taxa nian no dala barak halo 3D System selu taxa barak liu duke sira nia obrigasaun ba Canada. Bainhira Canada reembolsa taxa, Boye organiza osan sira ne’e atu ba iha nia konta privadu. Iha dalan ida ne’e, nia na'ok maizumenus $250,000 hosi nia servisu fatin.
Maski 3D Systems selu ba nia liu $100,000 kada tinan ba nia saláriu, Bobby Boye halo pedidu ba falénsia pesoál iha Setembru 2004. Boye la mensiona nia konta ne’e ne’ebé nia rai hela osan reembolsu taxa hosi Canada nian, no Tribunal Falénsia la deskobre ida ne’e. Bainhira Tribunal aprova nia pedidu iha Janeiru 2005, sira husik Boye atu kansela nia tusan maizumenus $100,000, maibé husik nia kontinua mantén nia karreta luxu ho tinan sanulu ona BMW 318 no Jaguar XJS.
Boye hamamuk nia konta bokur ne’e iha loron ne’ebé nia hosi kompañia, iha 2005 nia klaran. Maski nune’e, lasu iha 3D Systems tuir nia. Autoridade sira iha California kaer Boye iha Outubru 2006, no nia hetan akuzasaun iha tribunal iha Los Angeles. Bobby Boye tau nia kartaun sira iha mesa leten. Nia konfesa katak nia na'ok ona minimu liu $150,000 no halo brankeamentu kapitál liu $35,000. Iha tempu ne’ebé hanesan, Boye rekoñese halo falsifikasaun ba pedidu hodi halo kartaun identidade ida iha 1996 ba lisensa kondutór nian iha 2002. Nia halo ona servisu ho naran identidade diferente rua no númeru seguransa sosiál balu. Polísia husu Boye atu hatama teste DNA tolu no karimbu digital ba liman fuan no liman laran nian atu halo konfirmasaun ba ida ne’e. Boye hetan sentensa ba tinan tolu iha prizaun (hela iha sentru restituisaun), tinan tolu iha liberdade kondisionál, no hetan orden atu selu fali $262,128 ba 3D Systems. Nia mós tenke selu $125,252 ba kompañia ne’ebé deskobre fraude. Métodu no montante hirak ne’e konfirmadu hosi Maryellen Sebold, ne’ebé hala’o audit.		Iha 2006, Bobby O. Ajiboye hetan kaer; hodi lori nia ba hatán iha tribunal iha tinan tuir mai. Iha tribunal, nia envolve duni na'ok, brankeamentu kapitál no falsifikasaun. Polísia aprezenta evidénsia sira ne’ebé liga identidade rua Bobby Boye no Bobby Ajiboye hosi ema ida hanesan.
Kontratu hosi Noruega Bobby dala ruma akaba nia sentensa iha inísiu 2009. Hafoin tinan ida, nia buka servisu ida iha Ministériu Finansas Real nian iha Oslo. Ema na’in neen mak aplika, maibé Boye de’it mak bolu hodi ba halo entrevista. Ministériu Finansas Noruega nian entrevista nia iha New York no Oslo. Ministériu Finansas nia staf mós halo entrevista ba nia referénsia na’in haat. Nia referénsia ida uluk iha ligasaun ho kompañia legal ida iha Londres ne’ebé sai ona falénsia iha 2003. Referénsia númeru segundu ne’e uluk hamutuk ho KPMG, ne’ebé Boye servisu ba bainhira iha tempu hanesan simu pagamentu ba moras nian hosi Morgan Stanley. Aleinde ne’e, Boye fó referénsia hosi pozisaun diferente rua ne’ebé servisu ba ajénsia governu Nigeria. Ikus liu nia hateten katak nia servisu ba Nigeria ne’ebé nia ne’e tempu hanesan ho nia tempu sentensa prizaun nian. Nia hetan sentensa iha 2007. Iha nia CV, Boye mós mensiona 3D Systems, kompañia ne’ebé nia sai kondenada iha 2007 tanba envolve iha fraude. Ministériu Finansas la buka hatene referénsia ida ne’e. Boye manán, tuir karta ida hosi Ministériu: “Ho referénsia ba ita boot nia aplikasaun ho loron 1 Dezembru 2009, Ministériu Finansas Noruega ho satisfasaun oferese pozisaun ida nudár asesór ba ta petróleu iha programa Oil for Development iha Timor-Leste.” Tuir kontratu servisu nian, Bobby Boye simu liu $340,000 ba nia saláriu, per diem no alojamentu nian atu kobre tarefa moris iha rai li’ur. Osan hirak ne’e mai hosi osan taxa ne’ebé ema Noruega sira selu.
(Hare iha okos atu hare nia saláriu adisionál ne’ebé Timor-Leste selu ba nia no esplikasaun Noruega nia oinsá sira fó kontratu ba nia.) Hanesan hatudu iha pájina web New York State Unified Court System (iha liman los), Boye fou-foun hetan lisensa atu halo pratika legal nian iha Estadu New York iha 2010, hafoin Noruega fó ona kontratu ba nia atu mai Timor-Leste. Nia la tama iha lista nudár advogadu ida iha California, New Jersey ka Connecticut, estadu sira seluk ne’ebé nia mós hela ba. La’o Hamutuk hasoru nia iha Dili iha Jullu 2010; nia dala ruma mai iha Dili iha fulan balu antes.
Iha inísiu 2012, Timor-Leste formalmente foti responsabilidade hodi fó servisu ba Boye, maibé planeia ba Noriega atu selu 60% hosi nia saláriu to'o tinan 2012 nia rohan. “Noruega uluk fó asesór sira ne’ebé halo servisu di'ak. Bainhira Timor-Leste presiza asesór legal ida, Noruega foti knaar hodi identifika no rekruta nia no introdús nia ba autoridade Timor-Leste, " Pierre-Richard Prosper, Porta-voz Timor-Leste hateten ba Aftenposten. Servisu ba Timor-Leste …… no nia an rasik
Iha Dili, Boye halo nia servisu hodi hadi'a kolesaun taxa hosi kompañia mina-rai sira ho deseju boot. Nia identifika lakuna ne’ebé nia hateten kompañia sira esploita ona, troka auditor eksternal ba kompañia sira nia retornu ba taxa nian, no obriga kompañia sira atu mantén sira nia arkivu sira iha Dili, la’ós de'it iha Australia. Nia atividade no rezultadu ne’ebé nia hatudu hosi nia servisu halo Timor oan sira, supervisor Noruega no internasionál no nia kolega barak mak fó fiar ba nia. Ba espesifiku, hare pájina La’o Hamutuk kona-ba Making the Oil Companies Pay What they Owe, pájina ida ne’ebé provoka ConocoPhillips hodi buka hatene Boye nia istória iha 2010. Hamutuk ho Governu Timor-Leste, Boye organiza audit no avaliasaun lubuk ne’ebé nia hateten bele lori reseita adisionál billiaun dolar balun. ConocoPhillips no kompañia sira seluk protesta maka’as ba ida ne’e, maibé sira selu liu tokon $300 ba selu fali tasa ne’ebé sira tenke selu iha 2012 no 2012, ho intensaun atu evita multa no funan ne’ebé sa'e. Iha tempu ne’ebé hanesan, kompañia sira ne’e halo rekursu ba avaliasaun sira ne’e. Tribunal Dili suporta rekursu balu hosi kompañia sira, maibé rekursu barak mak nia desizaun sei pendente hela iha painél arbitrajen iha Singapura hafoin iha 2014. Iha submisaun ida ba Parlamentu Australia nian iha Abril 2013, ConocoPhillips lamenta: “ConocoPhillips no parseiru seluk iha konsorsiu hamutuk iha Bayu-Undan foin daudauk ne’e hetan avaliasaun multi-tipu atu selu taxa ne’ebé viola enkuadramentu fiskál ne’ebé komete hosi Timor-Leste …[no] reprezenta mudansa ida iha interpretasaun no aplikasaun lei taxa Timor-Leste nian. … Ami koko dala barak durante tinan balu nia laran atu rezolve problema sira ne’e liu hosi negosiasaun direta ho governu Timor-Leste maibé la susesu no, nune’e, parseiru sira iha konsorsiu hamutuk buka atu halo rekursu iha Tribunal Distritál Timor-Leste no liu hosi arbitrajen internasionál.” Boye fó konsellu ba autoridade Timor-Leste katak sira nia regulasaun sira kona-ba taxa nian la klaru no iha lakuna barak, no tenke hetan revizaun. Sira simu nia konsellu no husu ba nia atu prepara versaun foun, maibé nia hateten katak ida ne’e presiza servisu ida ne’ebé boot no nia rasik okupadu liu atu halo servisu ida ne’e, nune’e tenke fó kontratu ba ema seluk atu halo. Tanba ne’e, iha Fevereriu no Marsu 2012 Ministériu Finansas loke tenderizasaun atu hetan kompañia legal internasionál sira atu suporta Audit Taxa Petróleu nian no tender atu hakerek regulasaun sira ba taxa petróleu, tender rua ne’e tau Bobby Boye nudár ema ne’e atu kontaktu “ba informasaun ka klarifikasaun tan.” Konvite ba tender ne’e, entre buat seluk nia leet, husu: "profil kompañia nian ida inklui loron estabelesimentu nian, ….servisu hanesan ne’ebé sira halo ona durante tinan lima ikus ne’e … nia kontaktu detaillu ba kliente nia funsionáriu ne’ebé bele husu hodi fó referénsia, …. CV ba funsionáriu sira xave ne’ebé bele halo servisu hodi bele hatudu sira nia kapasidade no kualifikasaun nian .... Halo enunsiadu ida atu deklara keta sira iha situasaun ida ne’ebé iha poténsia ba konflitu ba interese nian.” Iha kompañia barak mak sira nia proposta atu hakerek regulasaun taxa nian, inklui proposta ida aproximadamente osan $350,000 hosi kompañia legal global ida ne’ebé boot, Baker & McKenzie. Maski nune’e, úniku proposta ida de’it mak pasa avaliasaun téknika independente no hetan avaliasaun ba nia istória ne’ebé hala’o hosi Bobby Boye ho nia proposta tokon $2.4 hosi kompañia deskoñesidu ida hosi New York Opus & Best Law Services, ne’ebé hetan kontratu iha Maiu 2012. (Iha Setembru 2014 asesór ida iha Ministériu hateten ba La’o Hamutuk katak prosesu ida ne’e iha hela examinasaun nia laran, no salvaguarda adisionál sei aumenta tan bainhira iha de’it proposta ida mak pasa ba avaliasaun téknika nian.) Ministériu Sírkula esbosu regulasaun foun ne’ebé prepara hosi Opus & Best ba komentáriu públiku nian iha inísiu Juñu, no Ministra Finansas Emilia Pires asina tiha versaun final regulasaun ne’e iha 26 Juñu 2012. Bobby Boye reklama katak regulasaun hirak ne’e mak regulasaun taxa petróleu no gas nian ne’ebé komprensivu no detallu liu iha Ázia. Tuir Portal Transparénsia Aprovisionamentu Timor-Leste, Ministériu Finansas fó kontratu balun ho valor tokon $7.8 ba Opus & Best durante 2012 (iha liman karuk). Timor-Leste selu ona Opus & Best tuir kontratu sira ne’e (pájina liman loos hosi Akuzasaun FBI).
Bobby Boye na'ok hela nasaun foun no kiak liu iha Ázia Sudeste. Kdadalak monetáriu nian ne’e la’o hosi tezoureiru Timor-Leste nian, ba kompañia legal nian ida ho naran Opus & Best, no tuir mai ba konsume ida ne’ebé estravagante hodi benefísiu Bobby Boye. Iha nia Akuzasaun, FBI deskreve hanesan tuir mai: “Husu inísiu 2012, nudár asesór legal ida ne’e konfiavel ba Nasaun A [Timor-Leste], Boye fasilita hodi sai manu talin ba servisu ho folin tokon $3.5 atu hetan asesória legal no taxa nian ho naran Nasaun A. Boye garante Opus & Best – kompañia ida ne’ebé nia mak na'in no kontrola rasik – hodi fó proposta atu hetan kontratu ida ne’ebé lukrativu.” Opus & Best gaba an katak nia iha esperiénsia tinan 30 iha lei taxa internasionál nian, iha jurista, ekonomista no auditor sira, no nia eskritóriu iha 100 Park Avenue, sidade sentrál Manhattan nian (liman karuk). Realidade, nia website no kompañia ne’e foin harii dau-dauk ne’e, no iha de’it ema ida de’it mak servisu iha ne’e (Boye rasik) no nia enderesu bisnis nian iha apartamentu ida iha Queens, New York (liman loos). Boye nunka hateten ba Timor-Leste katak nia iha afiliasaun ho kompañia ne’ebé nia rasik fó kontratu ho folin tokon balu. Kompañia hateten katak laiha konflitu ba interese ba servisu ida ne’e. Realidade, iha ne’ebé iha ligasaun ne’ebé besik liu entre Bobby Boye no kompañia legal ida ne’e tuir Aftenposten no FBI nia fontes informasaun nian.
Opus & Best inkorpora nia an nudár entidade bisnis ida iha 30 Marsu 2012 (liman loos), hafoin sira hato'o proposta ba kontratu ida Timor-Leste no semana balu de’it molok Ministériu Finansas Timor-Leste fó sira kontratu tokon $2.4 atu dezenvolve regulasaun foun ba taxa nian. Aleinde nia saláriu ne’ebé selu hosi Noruega, Timor-Leste mós seluk Bobby Boye $250,000 hosi Fundu Kontijensia durante 2011. Bainhira programa asisténsia Noruega nian sei selu hela nian, La’o Hamutuk husu ba nia no Noruega kona-ba ida ne’e iha Novembru 2012, no Boye fó resposta (rezumu hosi email rua):     “Primeiru Ministru Timor-Leste tuir rekomendasaun hosi Vice Ministru Finansas, Diretór Jerál Reseita no Alfándega, no Diretóra Nasionál ba Reseita Petrolíferu aprova kompensasaun adisionál ba ha'u bazeia ba ha'u nia servisu. Kontratu servisu ho Noruega (remata ona) la taka pagamentu adisionál ne’ebé ha'u simu hosi Governu Timor-Leste ba servisu ne’ebé ha'u halo durante tinan kalendariu 2011. Ha'u iha direitu atu hetan pagamentu ne’e ema labele debate. ...     “Ho onestu ema ne’ebé hakarak atu husu kestaun ne’e tenke ba oin no halo ida ne'e maibé ha'u sei enkoraja sira atu mós hare ba rezultadu servisu ne’ebé ha'u halo iha ne’e. Fora hosi buat intanjivel seluk hanesan harii kapasidade, estrutura iha DNRP, ha'u lori duni ona reseita adisionál liu tokon $300 mai TL liu hosi esforsu mesamesak no ne’e hanesan buat kois uitoan de’it iha inísiu ba reseita adisionál ba TL ne’ebé iha prosesu ona.     “Ha'u gasta maizumenus oras 14 kada loron ida, loron hitu iha semana ida ba saida mak ha'u halo iha ne’e. Ha'u nia talentu ne’e portatil no karik iha ema ruma iha Governu laran ka li'ur hanoin katak sira selu ha'u barak liu, ha'u pronto ona atu sai hosi ne’e ho lalais liu tan, nune’e sira bele hetan ema seluk ne’ebé sira bele selu ho baratu liu.” La duvida katak Boye servisu durante oras naruk nia laran. Aleinde halo servisu ba nia knar nudár asesór, nia mós halo servisu tomak ba nia kompañia legal fiktif iha New York. Iha 2014, asesór ida iha Ministériu fó hatene ba La’o Hamutuk katak Ministériu no Noruega fahe responsabilidade ba saláriu Boye nian, no katak karik Noruega reembolsu Timor-Leste ba saláriu balu ne’e iha 2011. Iha insiu 2012, Boye husik Timor-Leste dala barak ba Singapura no New York, nia hatete ba tanba razaun médiku, no nia la fila ona hafoin 2013 nia klaran.
Karreta luxu FBI hanoin sira tuir dadus ne’ebé liga Boye ho kompañia legal nia email no konta bankária nian. Aleinde ne’e, kompania legal Opus & Best uza Boye nia enderesu uma nian hodi sosa bens imobiliáriu balu. Osan tokon sira ne’e gasta lalais de’it. Hafoin nia servisu ho Ministériu Finansas, Boye no kompañia legal ne’e sosa sasán sira tuir mai: Propriedade ho folin tokon $3, tuir rejistu ofisiál. Karreta lalais nian ho folin liu $490,000, hanesan Bentley ida, Range Rover ida no Rolls-Royce ida, tuir FBI. Relójiu ho folin $20,000, tuir FBI.
Bobby Boye sosa karreta “silver 2012 model Bentley Continental”, ho folin $172,000, ho roda hat no kanu kombustivel ba mákina nian litru 6 ho fiu fleksivel, hanesan ho imajen. FOTO: Denis Balibouse	Bobby Boye sosa karreta kór cinza “2011 model Rolls-Royce Ghost," ho folin $215, 000, ho mákina gazolina litru 6.6, similar ho imajen. FOTO: Sandro Campardo	Bobby Boye sosa karreta kór metan “2012 model Range Rover Luxury,” ho folin $100,983, ho mákina gazolina litre-5, similar ho imajen. FOTO: Mark Lennihan
Kaer iha aeroportu Iha Marsu ka Abril 2013, Bobby Boye arruma nia mala no husik Timor-Leste, hafoin nia falla hodi tenta atu hetan osan barak tan, tuir FBI. Autoridade hosi Timor-Leste, Estadus Unidus no Noruega hahú investiga saida mak akontese. Boye hetan kaer hosi FBI iha 19 Juñu 2014, bainhira nia to’o iha Aeroportu Internasionál Newark hafoin halo viajen ba rai li'ur. FBI prende propriedade haat kompañia Opus & Best nian. Propriedade sira ne’e kompañia nian, maibé iha ligasaun besik liu ba Boye Iha kontratu tolu nian, kompañia fó uma luxu Boye nian nudár enderesu kompañia nian. Iha propriedade ida mak transfere gratuitu ba kompañia iha Marsu 2013. Nia benfeitór ka doadór nia enderesu hanesan enderesu Bobby Boye nian. Bobby Boye oferese nia uma luxu ne’ebé nia sosa iha 2011 ho folin tokon $1.9 nudár garantia. “Timor-Leste la hatene lasu ida ne’e to hafoin Boye husik nasaun ne’e. Ne’ebé dala ruma ita-boot hatene, autoridade sira hakfodak bainhira sira aprende nia istória,” Prosper esplika. Aftenposten labele hetan saida mak Bobby Boye involve iha tempu hafoin nia sai hosi Timor-Leste, no to'o nia hetan kapturasaun.
La'o Hamutuk halo peskiza Google ida iha Setembru 2014 ne’ebé bele hetan kartaun servisu ida iha liman karuk (kliik atu hare nia kontextu), ne’ebé dala ruma Bobby inventa nian an dala ida tan. La presiza atu hateten sai, katak kompañia legal ida iha D.C Arnold & Porter laiha naran Bobby Ajiboye entre nia ema profesionalista na’in 468 iha nia eskritóriu iha Washington.
Iha Asia Sudeste, populasaun Timor oan tokon 1.1 loloos kiak liu uitoan, karik akuzasaun sira FBI nian kona-ba ema ida ne’ebé Noruega haruka atu mai ajuda los duni. Rejeita sai kulpadu Bobby Boye nia advogadu, Joseph P. Rem Jr. hosi Rem Law Group, konfirma ba Aftenposten katak Boye iha prizaun tanba na'ok osan no brankamentu kapitál ne’ebé iha koneksaun ho lasu iha 3D Systems. Oinsá Bobby Boye responde ba akuzasaun sira hosi FBI?     "Nia rejeita buat hirak ne’e.” Posivel atu kontaktu Boye direitamentu?     "Lae. Maski karik ita-boot bele hetan nia, nia sei la responde ita-boot nia pergunta sira. Nia hetan orden ne'ebe nia labele diskuti kazu ida ne'e.” Vice Prokuradora District Shirley U. Emehelu iha New Jersey, hateten ba Aftenposten katak loron ba Bobby Boye atu ba halo julgamentu nian ne’e muda dala barak, foun liu ne’e iha 12 Agostu. Tuir dokumentu tribunal nian, iha ona diskusaun kona-ba posibilidade ba ajustamentu nian, no prosesu legal ne’ebé la'o hela ne’e hakerek iha leten. Bobby hetan TIR no hela iha nia uma luxu. Nia rai ne’e besik rihun metru kuadradu, iha pixina boot ida iha jardim. Dependente ba asistensia Tanba ho esforsu boot hosi Noruega, Fundu Petrolíferu Timor-Leste nian sa’e nafatin. Hosi Abril to Juñu 2014, tokon $850 iha osan foun hosi petróleu mak hatama ba. Too iha 30 Juñu, Fundu liu billiaun $16. Ne’e loloos bele garante nasaun ki'ik no kiak ne’e atu kontinua kreximentu no hadi'a kondisaun moris nian sae no di'ak liu tan ba jerasaun futuru sira. “Timor-Leste ne’e nasaun foun, ne’ebé hahú hosi zero iha 2002, nia populasaun depende maka'as liu ba komunidade internasionál. Autoridade sira ohin loron realiza katak sira tenke hola knaar boot hodi ense servisu asesór ne’ebé nasaun no organizasaun sira seluk haruka mai. Sira tenke mós aprende atu husu pergunta di'ak sira," portavós Governu Pierre-Richard Prosper hateten. Noruega: klaru ne’e lamentavel Departamentu komunikasaun hosi Ministériu Finansas rejeita atu hasoru malu ho Aftenposten ba entrevista ida, maski realidade katak jornál ho Ministériu nia eskritóriu ne’e hafahe de’it ho estrada ida. Ministériu presiza pergunta no resposta liu hosi e-mail. Resposta sira ne’e asina hosi vice diretór departamentu nian Håkon Tandstad no haruka hosi Jestor Komunikasaun Runar Malkenes. Tandstad mak asina kontratu ho Boye.    Timor-Leste fó alerta ba Ministériu Negósiu Estranjeiru [Noruega] iha 2013 nia klaran ba alegasaun fraude. Ministériu Negósiu Estranjeiru ikus mai fó alerta ba Ministériu Finansas [Noruega]. Oinsá ema kondenada ona fraude ida bele hetan servisu iha Finansas?    “Ne’e pergunta lejítimu ida. Ami tuir saida mak ami hanoin la'o tuir prosedimentu rekrutamentu nian, no ami iha extra kuidadu tanba ida ne’e aplikante internasionál ida. Maibé iha kazu ida ne’e, buat ne’e klaru katak la sufisiente di'ak, ne’ebé nee dezafortunadu ida.” Oinsá pozisaun ida ne’e anunsia publikamente?    "Primeiru, iha Juñu 2009, iha Aftenposten no iha ami nia portal empregu nian. Iha ne’ebá laiha aplikante kualifikadu, no ami halo anúnsiu dala ida tan iha The Economist.” Ema na’in hira mak aplika?     "Ema na’in neen mak aplika maibé Boye de’it mak bolu ba halo entrevista. Sira seluk ne’e konsidera la kualifikadu.” Saida mak aplikasaun no CV hateten?     "Boye hateten katak nia iha esperiénsia estensivu iha servisu ho “taxa nivel altu” no iha indústria petróleu internasionál. Iha nia sumariu nia hatete nia edukasaun, ‘lisensa profesional/Afiliasaun’ no nia esperiénsia servisu." Se mak hare nia CV, no oinsá ida ne’e la’o?     "CV ne’e hare hosi funsionáriu balu iha ami nia unidade taxa no rekursu umanu. Ami halo entrevista ema na'in haat ne’ebé sai sasin ba nia. Iha Fevereiru 2010, ami simu konfirmasaun hakerek hosi Tribunal Supremu New York katak Boye “hetan sertifikadu hodi halo servisu di'ak.” Laiha buat ruma mak mosu iha prosesu ida ne’e ne’ebé bele hatudu duvida ba nia kualifikasaun, Tandstad hakerek. La hare referénsia ne’ebé hetan fraude Iha Boye nia CV mós tau 3D Systems, kompañia ida ne’ebé hetan fraude hosi Boye iha 2007. Ministériu Finansas la kontaktu referénsia ida ne’e. Referénsia haat ne’ebé entrevista ne’e iha asosiasaun ho kompañia legal ida iha London (ne’ebé hetan ona falénsia iha 2003), kompañia auditoriu KPMG, no eskritóriu rua hosi Governu Nigeria. Tempu ikus ne’ebé nia hateten katak nia servisu ho Nigeria ne’e iha tempu ne’ebé hanesan ho nia tempu hodi kumpre sentensa prizaun durante 2007.     "Iha ne’ebá ne’e laiha indikasaun ba informasaun eradu iha 2010", Tandstad hakerek. Oinsá entrevista Boye?     "Boye hetan entrevista dala rua iha inísiu 2010, iha New York no Oslo, hosi funsionáriu balu hosi ami nia gabinete. Ami nia atensaun ne’e foka liu ba nia kualifikasaun professional, no entrevista konfirma katak Boye kualifikadu no nia iha matenek luan kona-ba asuntu taxa internasionál." Bainhira no oinsá Ministériu hetan alerta kona-ba Boye nia istória?     Bainhira alegasaun sira ba fraude ne’e mosu, durante Outubru-Dezembru 2013, iha reklamasaun mós katak nia uluk hetan kondenadu. Ami seidauk familiar ho kazu espesífiku ne’ebé fó sai hosi Aftenposten. Ministériu Finansas Noruega deside ona, molok kazu ne’e mosu mai, katak sira labele rekruta ba, ka fó servisu iha, programa ajudu sira ne’ebé hanesan ida ne’e. Fonte sira ba Aftenposten nia artigu mai hosi: Kondenasaun no petisaun hosi Tribunal Superior Los Angeles, Minutas hosi Disciplinary Board of the New York Stock Exchange, dokumentu hosi rejistu propriedade no tribunal iha New York no New Jersey, dokumentu hosi Ministériu Finansas iha Noruega no Timor-Leste.

Fontes adisionál sira ne’ebé La’o Hamutuk uza mak: relatóriu Tribunal Falénsia EUA iha California no Tribunal Distritál EUA iha New Jersey nia rezumu ba PACER, relatóriu FINRA, website Ministériu Negósiu Estranjeiru Noruega, entrevista ho Ministériu Finansas RDTL nian no ajénsia seluk nia funsionariu no nia asesór sira, Portal Aprovisionamentu TL, website Ministériu Finansas RDTL (dokumentu sira ne’e download ona no rai hela iha 2012).

Australia fó preokupasaun

Iha 9 Setembru 2014, artigu ida hakerek hosi Tom Allard iha Sydney Morning Herald fó sai katak ConocoPhillips hatene ona kona-ba istória naruk Boye nian molok Governu Timor-Leste hatene ida ne’e. Kompañia sira nia interese ne’ebé halo sira la kontente iha 2010 hosi artigu ida ne’ebé “estranu loos” ne’ebé publika hosi La'o Hamutuk iha nia pájina web kona-ba fó fali taxa petróleu, no sira nia peskiza ba Boye nia istória pasadu hetan aat balu ne’ebé nia iha. (Maski La’o Hamutuk ko'alia dala balu ho Boye durante tempu ida ne’e, ami simu informasaun hosi fontes públiku, ofisiál no la’ós ofisiál barak). Hafoin Boye hetan kapturasaun, ema sira ne’ebé besik liu ba servisu sistema taxa petróleu nian hateten ba ami katak sira preokupa ona ba Boye no Opus & Best tinan balu liu, maibé tanba nia hetan fiar hosi ofisiáis nivel altu sira hodi prevene sira atu halo asaun tan. Loloos, istória balu iha leten ne’e bele hetan iha internet iha minutu balu de’it.

Iha 10 Setembru, SMH publika artigu seluk ida ne’ebé hakerek hosi Allard hateten sai alegasaun Timor-Leste kona-ba Roger Maguire, asesór ida ba diresaun taxa iha Timor-Leste nia Ministériu Finansas iha 2010-2011. Hafoin Maguire sai hosi Timor-Leste, ConocoPhillips selu nia $120,000 atu ajuda hodi dezenvolve kompañia nia evidénsia iha kazu arbitrajen taxa nian. Advogadu Timor-Leste Pierre Prosper alega katak nia sai ona “espiaun” ba kompañia bainhira nia sei servisu hela ba Timor-Leste.

Ami sei kontinua atu atualiza pájina ida ne’e bainhira ami hetan tan informasaun barak, no bainhira Bobby Boye nia kazu agora la’o hela tuir sistema judisiariu nian. (Hare iha leten atu hatene situasaun atual.)

Kobertura Media (sira ne’ebé foun liu mak uluk liu)

• Mahwah man gets six-year sentence for defrauding tiny Asian Nation (North Jersey.com)
  $3.5M international con game nets NJ man 6 years in prison (NJ.com), 15 October 2015

• Bergen County, New Jersey, Man Sentenced To Six Years In Prison For Defrauding Foreign Nation Of More Than $3.5 Million, US Attorney press release, 15 October 2015

• Mahwah man fleeced tiny developing nation of $3.5M, North Jersey.com, 2 May 2015

• Attorney Admits to Scamming Foreign Nation Using Sham Firm, Law 360, 28 April 2015
  $3.5M scheme bankrolled N.J. lawyer's luxury car buying spree, feds say, NJ.com, 28 April 2015
  Authorities: Bergen County Man Pleads Guilty to Defrauding Foreign Country Out Of $3.5 million, Bergen County Patch, 28 April 2015

• Bergen County Man Admits Defrauding Foreign Nation of More Than $3.5 Million, US Attorney press release, 28 April 2015

• Norway's Link to Graft Claim, Upstream Online, 12 Setembru 2014

• East Timor accuses Australian tax assessor Roger Maguire of being a "mole" for oil companies. Sydney Morning Herald, 10 Setembru 2014

• Big Oil stands by as con man swindles East Timor. Sydney Morning Herald, 9 Setembru 2014

• Timor-Leste thinks Norway should take responsibility for alleged fraud. Aftenposten, 25 Agostu 2014 (mós Øst-Timor mener Norge må ta ansvar for påstått svindel)

• Convicted embezzler, money launderer hired by Norway's government. Aftenposten, 25 Agostu 2014 (mós iha PDF)

• Finansdepartementet sendte svindler for å hjelpe Øst-Timor. (Departamentu Finansas haruka lohidór ida atu ajuda Timor-Leste). Aftenposten, 23 Agostu 2014

• Conoco Phillips Appreciates Dili District Court's Independence on Tax Cases. Independente/ETLJB, 30 Juñu 2014

• Na'ok ona Timor-Leste. La'o Hamutuk nia blog, 23 Juñu 2014 (atualiza iha Agostu)
  Informasaun kona-ba blog ida ne’e publika sai hosi media sira iha Dili no mundu tomak.

• Feds allege Bergen County man defrauded foreign country, bought property, luxury cars. Newark Star-Ledger, 19 Juñu 2014

• Bergen County Man Arrested for Defrauding Foreign Nation of More Than $3.5 Million, FBI nia komunikadu imprensa, 19 Juñu 2014

Dokumentu (hotu iha Ingles)

• Sentencing minutes and detailed judgment, October 2015

• Judge's forfeiture order in U.S. District Court, July 2015
  Corrected version, October 2015

• Prosecutors' information, Plea Agreement and Application for Guilty Plea in U.S. District Court, April 2015

• Material iha relasaun ba kazu krime federal Boye nian, Tribunal Distritál EUA New Jersey, Juñu 2014-Outubru 2015

• La'o Hamutuk nia karta ba prokurador EUA no Timor-Leste, 21 Jullu 2014

• Akuzasaun kriminál hosi FBI iha Tribunal Distritál EUA, 18 Jullu 2014

• Husu atu fan Boye nia uma ba tokon $2.7, Outubru 2013 [hasai ona hosi merkadu no uza nudár nia prizaun ba TIR]

• Lista kontratu ne’ebé ajudika hosi Timor-Leste ba Opus & Best, TL Transparency Portal, Abril-Novembru 2012

• Hakarak atu ajudika kontratu ba revizaun regulasaun taxa ba O&B, Ministériu Finansas, Maiu 2012
  Esbosu regulasuan ne’ebé sírkula ba komentáriu, Ministériu Finansas, Fevereiriu 2013

• Pedidu ba Proposta, serbisu konsultador ba auditor Taxa, Ministériu Finansas, Marsu 2012

• Pedidu ba proposta, servisu konsultador ba Reseita Taxa no Taxa Petróleu Adisionál, Ministériu Finansas, Marsu 2012

• Akordu Programa entre Noruega-TL ba Asisténsia iha Jestaun Rekursu Petróleu, Juñu 2008

• Material sira iha relasaun ba falénsia Ajiboye, Tribunal Falénsia EUA nian, September 2004 - Janeiru 2005

• NY Stock Exchange Hearing Panel nia desizaun 04-8 revoka Boye nia lisensa nudár manu-talin ba merkadu finanseiru nian, Janeiru 2004
  FINRA BrokerCheck report hetan iha Jullu 2014

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua D. Alberto Ricardo, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: laohamutuk@gmail.com    Web: http://www.laohamutuk.org    Blog: laohamutuk.blogspot.com