Tratadu Fronteira Maritima entre Timor-Leste no Australia

Timor-Leste manán ona nia vitória boot iha 6 Marsu, bainhira Australia no Timor-Leste asina Tratadu ba Estabelesimentu Sira-nia Fronteira Maritima iha Tasi Timor (mós Ingles) (tuir mai iha artigu ne’e sei bolu Tratadu Fronteira). Hafoin iha okupasaun no luta durante dékada balu nia laran, no hetan ona biliaun lubuk hosi estrasaun petróleu, ikus mai Governu Australia rekoñese direitu soberania ba nia viziñu iha norte hodi iha fronteira bazeia ba lei internasionál daudauk ne’e. Artigu ida ne’e sei ezamina provizaun no implikasaun hosi konkordánsia ida ne’e, nia valor istóriku, no mós saida mak sei bele akontese nudár rezultadu hosi Tratadu Fronteira presedente ida ne'e.

La’o Hamutuk ho ativu halo advokasia ba fronteira maritima ne’ebé justu entre Timor-Leste no Australia dezde nia estabelesimentu iha 2000, no halo kampaña hodi kontra akordu sira iha pasadu nian entre Australia no Timor-Leste (asina iha 2002, 2003 no 2006, ne’ebé ikus mai anula ona hosi Tratadu Fronteira). Maske nune’e, artigu ida ne’e la diskute istória naruk hosi kampaña, manipulasaun, duplisidade no negosiasaun (1970-2006, 2012-2016 ka 2016-2018) ne’ebé lori rai rua ne’e to’o iha akordu foun ne’e; ohin loron ami hare ba saida mak akontese ohin no futuru.

Maske Timor-Leste restaura nia independénsia iha Maiu 2002, maibé dezde tempu naruk nia laran Australia taka dalan ba Timor-Leste atu bele estabelese rai rua ne’e nia fronteira liu hosi dada an hosi mekanizmu ba rezolusaun disputa internasionál nian; defere ka bandu diskusaun fronteira sira iha kada tratadu provizóriu sira kona-ba fahe produsaun nian; no insiste ba argumentu dizatualizadu, ne’ebé serve de’it ba nia interese, ne’ebé bolu prinsipiu “plataforma kontinental”. Prinsipiu ida ne’e bazeia ba pratika tuan tinan 75 liu ba nian no mós okupasaun ilegál Indonézia nian. Durante tinan 14 nia laran, lider Timor-Leste nian rende ba Australia nia ulun toos ne’e liu hosi asina akordu balu ne’ebé atu hadalan ba halo produsaun ba petróleu no gas – fonte prinsipál atu lori osan mai iha nasaun foin sa’e ida ne’e.

Maske nune’e, Timor oan no mós solidariedade internasionál sira barak mak hanoin katak luta ba independénsia seidauk kompletu bainhira fronteira nasaun nian seidauk define. Iha 2004, sosiedade sivíl Timor-Leste harii Movimentu Kontra Okupasaun Tasi Timor (MKOTT), maluk sira iha Australia forma Timor Sea Justice Campaign, no ativista sira iha nasaun barak mak espresa sira nia solidariedade ba Timor-Leste nia direitu sira. Ita nia objesaun prinsipál mak ba Australia nia hahalok hodi dada naruk atu lakohi ko’alia kona-ba fronteira maritima, sira nia negasaun atu halo tuir prinsipiu foun ne’ebé oras ne’e ema hotu rekoñese ho naran “liña klaran” nudár baze ba delimitasaun fronteira atu fahe tasi iha dalan klaran ho distánsia ne’ebé hanesan entre rai rua ne’e, no sira nia rejesaun inflexível ka ulun to’os ba kualkér envolvimentu parte terseiru iha rezolusaun ba disputa liu hosi tribunal ka arbitrajen internasionál ida. Iha inísiu 2013, Governu Timor-Leste aumenta nia diplomasia no rekursu sira ba iha luta popular.

Australia nia mudansa iha polítika foin lalais iha importánsia ne’ebé kle’an ka profundu liu duké razaun katak la iha dalan polítiku seluk ka kampu mina-rai sira ne'ebé maran ona, ka nesesidade atu hamenus sira nia ipókrita bainhira sira bele hatete ba China atu halo tuir lei internasionál iha kazu Tasi China Súl. Maibé hosi perspetiva ema barak nian iha Timor-Leste no Australia, mudansa ida ne’e nia valor signifikante, tanba mai hosi luta naruk, no nudár vitória ida tanba povu Timor manán tiha Australia. Ami espera katak mudansa ida ne’e marka era foun ida ne’ebé “ita nia nasaun rua sei hetan benefísiu hamutuk bainhira ita nia relasaun ne’e bazeia ba igualdade, inklui rekoñese tomak direitu kada povu no soberania nasionál nian”. ^[1]

Liña metan iha mapa reprezenta Tratadu Fronteira Tasi Okos entre Australia-Indonézia iha 1972. Fronteira ne’e besik liu ba Indonézia (no ba Timór-Leste) duke ba Australia, no kontinua vigora. “Timor Gap” iha liña ne’e (area kinur ne’ebé daudauk ne’e bolu nudár Area Konjunta ba Dezenvolvimentu Petróleu) tanba Portugal dada an hodi partisipa iha negosiasaun sira, no tratadu 1972 rekoñese katak pontu ikus Gap ne’e sei ajusta bazeia ba futuru negosiasaun ho Timór Portugés ka nia susesor.

Area kinur iha mapa mak Area Konjunta ba Dezenvolvimentu Petróleu (JPDA), ne’ebé nia retornu fahe 50-50 entre Indonézia no Australia hosi 1991 to 1999, no muda ba 90-10 entre Timor-Leste no Australia dezde Tratadu Tasi Timor 2002. Tuir Tratadu Fronteira besik area nee tomak sai tiha 100% Timor-Leste nian, maske Australia sei la selu fali biliaun $2.4 ne’ebé nia foti hosi kampu mina-rai no gas sira iha area ne’e dezde 1999. (Timor-Leste simu ona maizumenus biliaun $21.4.) JPDA ne’e atu delimita zona ida atu fahe reseita petróleu, la’ós territóriu nasionál, maske liña ikus hosi JPDA ne’e besik liu ba liña klaran entre Australia no Timor-Leste.

Area matak lakan no roza mak “Area Unitizasaun Sunrise” ne’ebé defini iha “Akordu Unitizasaun Internasionál” (IUA) iha 2003 entre Australia ho Timor-Leste. Tuir Tratadu 2002, Timor-Leste sei hetan 18% hosi reseita estrasaun Sunrise (“upstream”); ne’ebé sa’e ba 50% tuir Tratadu CMATS 2006 (ne’ebé ikus mai revogadu iha tinan kotuk), no ba 70% ka 80% (depende ba kadoras ne’e atu dada ba ne’ebé) tuir Tratadu Fronteira.

Tratadu Fronteira troka tiha Tratadu Tasi Timor no Akordu Unitizasaun Sunrise, ne’ebé hamutuk ho CMATS tau ona iha fatin lixu. Maske nune’e, Tratadu ne’e inklui artigu balu atu prienxe funsaun sira ne’ebé mai hosi akordu sira ne’ebé agora atu mate ona, kobre governasaun, fahe reseita no lei aplikavel sira no tópiku seluk.

Hein to mina-rai maran

Iha 2004, depois liu dékada ida nia laran enfrenta negosiasaun ne’ebé difisil, Australia no Nova Zelándia asina tratadu fronteira maritima ne’ebé bazeia ba prinsipiu liña klaran. La’o Hamutuk husu ba ambassador Nova Zelándia nian iha ne’e katak saida mak nasaun ida ne’e bele aprende hosi Nova Zelándia nia susesu iha negosiasaun ho Canberra. Nia hatán –“lalika iha mina-rai iha tasi okos” – profétiku ne’ebé provadu. Agora Buffalo, Elang-Kakatua no Kitan taka ona, no liu 97% hosi reseita Bayu-Undan nian foti hotu ona, Australia aseita Timor-Leste nia reklamasaun ba soberania ba besik area tomak ne’ebé uluk tama iha area dezenvolvimentu “konjunta.” Iha area ne’e nia parte leste, Laminaria-Corallina besik atu maran – no Australia sei husik ne’e mai Timor-Leste bainhira kampu ne’e laiha ona valor ekonómiku. Laiha deskobrevimentu foun ida mak halo ba area kontestadu ida ne’e.

Australia dada an hosi prosesu rezolusaun disputa fronteira maritima iha fulan rua antes Timor-Leste sai nasaun independente iha 2002 hodi nune’e Australia bele evita an hosi kontabilidade legal. Maske nune’e, sira falla tiha atu nota mekanizmu ida iha Konvensaun ONU nian kona-ba Lei Tasi (UNCLOS, ne’ebé asina iha 1982, ratifika hosi Australia iha 1994 no hosi Timor-Leste iha 2013) ne’ebé durante ne'e nunka uza. UNCLOS Artigu 298 no Anexu V deskreve prosesu konsiliasaun obrigatóriu ida ne’ebé fó dalan ba nasaun ida atu bele lori nia viziñu ida ne’ebé lakohi tuur hamutuk atu negosia ba iha diskusaun fronteira bilateral ne’ebé sei fasilita hosi ekipa peritu “konsiliador” ne’ebé hili hosi nasaun rua ne’e, ho koñesimentu hosi Nasoins Unidas. Konsiliador sira laiha podér atu halo desizaun, maibé sira sei halo servisu hodi enkoraja parte rua atu rona no fó resposta ba malu.

Timor-Leste inísia prosesu ida ne’e iha Abril 2016 no, maske iha inísiu Australia reziste, maibé ikus mai sira simu mekanizmu ne’e iha Setembru. Iha inísiu konsiliasaun, parte hotu halo reklamasaun ba sira nia interese; klaim Timor-Leste nian mak iha ho kór mean iha mapa, no Australia nian mak iha kór laranja. Konsiliador sira servisu hanesan konselleiru kazamentu nian, ne’ebé iha parte ida rona parte ida nia nesesidade no preokupasaun no depois lori asuntu ne’e ba iha parte seluk, enkuantu parte rua ne’e tuur iha kuartu ketak-ketak.

Prosesu ne’e han tinan ida ho balu, no iha sesaun negosiasaun dala 13 iha sidade neen hosi kontinente hat. Iha Agostu 2017, Australia no Timor-Leste konkorda termu jerál ba fronteira ida no lori kompañia petrolíferu atu ajuda hodi deside oinsá bele dezenvolve Greater Sunrise. Maske pergunta ne’e nafatin seidauk resolve, maibé Tratadu Fronteira ne’e asina tiha ona iha Marsu 2018 no hein hela ratifikasaun hosi nasaun rua.

Akadémiku no partisipante sira hosi mekanizmu pasífiku sira ba rezolve disputa internasionál sira haksolok tebes bainhira mekanizmu konsiliasaun ne'ebé nunka uza liu dékada tolu nia laran, ikus mai prova katak iha valor duni. Timor-Leste, dala ida tan, halo istória.

Maske konsiliasaun ne’e hala’o tuir provizaun sira iha UNCLOS no nia rezultadu kumpre Lei Tasi nian, Tratadu Fronteira ne’e la’ós mai hosi desizaun legal ne’ebé halo hosi tribunal ka arbitru ida. Desizaun ne’e mai hosi servisu diplomátika fó-no-simu ne’ebé hala’o hosi kada governu, ne’ebé halo argumenta tuir sira nia preferénsia polítika, legal, ekonómiku no istóriku. Maske Konsiliador sira fasilita negosiasaun sira no enkoraja atu prosesu ne’e tuir ho lei internasionál, maibé desizaun sira ne’e halo hotu hosi governu rai rua ne’e. Kompromisu ikus ba liña fronteira, hanesan hatudu iha liña kór roxo no mutin iha mapa laran, ne’ebé maiorparte tama iha Timor-Leste nia reklamasaun tuir liña klaran ba parte súl hosi fronteira (ne’ebé lori hotu area petróleu sira iha JPDA mai iha Timor-Leste nia territóriu), enkuantu delimita tiha liña ida entre nasaun rua nia reklamasaun iha parte fronteira laterál nia sor-sorin. Ida ne’e delinea kada nasaun nia area tasi okos (“plataforma continental”) no koluna bee nian (“Zona Ekonómiku Esklusivu – ZEE”), maske Timor-Lete nia fronteira koluna bee nian iha parte leste no oeste nian sei kontinua negosia ho Indonézia.

Kampu mina-rai no gas tolu ne’ebé komersialmente dezenvolve tiha ona iha JPDA mak: Elang-Kakatua ne’ebé taka ona iha 2007, Kitan ne’ebé taka iha 2015, Bayu-Undan ne’ebé sei iha tinan produsaun 2-3 tan. Kontratu esplorasaun lubuk seluk mak asina hela no abandona ona iha area seluk JPDA nian, no teste perfurasaun hitunulu mak hala’o ona dezde dékada tolu ikus ne’e, tan ne’e susar atu iha posibilidade atu hetan tan rezerva sira mina no gás sira seluk ne’ebé signifikante no iha valór komersiál (aleinde Greater Sunrise).

Reseita tomak ba governu hosi kampu sira iha JPDA sei ba Timor-Leste bainhira tratadu ne’e ratifika ona, ne’ebé bele aumenta tan rendimentu Dili nian maizumenus tokon $100 hosi gas no petróleu Bayu-Undan nian ne’ebé besik atu hotu. Se karik (maske improvavel) atu hahú fila fali produsaun mina-rai iha Kitan ka Elang-Kakatua, ka kampu ki’ik Kuda Tasi-Jahal ne’e, Timor-Leste sei hetan taxa no royalty tomak (hafoin kompañia mina-rai sira rekupera sira nia investimentu kapitál, kustu operasaun no lukru).

Iha sorin osidentál JPDA nian, parte súl hosi (mutin) fronteira laterál nian ne’e halai ba parte oeste hosi JPDA nia ninin. Nune’e, kampu ki’ik Buffalo, ne’ebé uluk konsidera iha Australia nia maritima, agora sai tiha Timor-Leste nian. Buffalo prodús mina-rai barríl tokon 20 hosi 1999 to desmantela iha 2005, no Australia sei mantén nia reseita ne’ebé nia hetan iha tempu ne’ebá. Iha 2016, kontratu foun ida asina ho kompañia Carnarvon, ne’ebé fiar katak bele uza teknolojia modernu atu supa barríl tokon 30 tan. Karik Carnarvon nia estimasaun ne’e loos, Buffalo bele fó osan tokon $500 ka liu ba Timor-Leste iha dékada ida oin mai.

Kampu mina-rai ne’ebé boot liu uitoan, Laminaria-Corallina, ne’ebé fó ona reseita liu biliaun $2 ba Australia no sei kontinua fó produsaun (maibé besik atu maran), nafatin iha Australia nia maritima. Maske nune’e, Tratadu foun fó dalan atu bele dada liña ne’e muda parte norte nian hosi lateral oeste nian ba tan ba oeste hafoin Laminaria-Corallina desmantela ona, ho nune’e bele alina ho futuru liña fronteira maritima entre Indonézia-Timor-Leste. Dala ida tan, osan ne’ebé Australia hetan ona hosi Canberra sei la fó fila.

Iha sorin seluk, parte sentrál hosi JPDA nia parte leste nia ninin dada ba li’ur, hodi halo parte boot hosi Greater Sunrise no parte súl hosi kampu ne’e iha Timor-Leste nia maritima. Ba tempu agora, liña (mutin) dada liu tiha Area Unitizasaun Sunrise, hodi halo 30% hosi parte noroeste hosi kampu ne’e tama iha area Australia, parte seluk kontinua iha Timor-Leste nia area. Tanba kampu ida ne’e kontinua fahe hosi nasaun rua, kampu ida ne’e sei jere hamutuk; Timor-Leste no Australia presiza atu konkorda kona-ba oinsá kampu ne’e sei dezenvolve. Tratadu no Konsiliador sira tenta oferese insentivu sira ba Timor-Leste atu simu katak kadoras hosi Sunrise nian dada ba Australia nune’e bele liga ba Planta LNG ne’ebé lakleur tan la uza ona hodi nune’e bele prosesa gas hosi Bayu-Undan iha Darwin, inklui aumenta Timor-Leste nia parte hosi reseita Sunrise nian hosi 70% ba 80%, maibé polítiku sira iha Dili rejeita maka’as opsaun ida ne’e.

Hanesan iha parte oeste nian, liña iha parte lateral leste ne’e provisional. Depois Sunrise supa hotu ona no desmantela, liña ne’e sei dada tan ba leste nune’e bele junta ho futuru fronteira maritima entre Timor-Leste ho Indonézia. Iha dékada balu oin mai, area sira tomak Sunrise nian (ida mamuk ona) sei tama ba iha territóriu Timor-Leste.

Tratadu foun ne’e autoriza fila fali ezisténsia “Designated Authority-Autoridade Dezignada” (DA) ne’ebé kria hosi Tratadu Tasi Timor, ne’ebé durante tinan 2002-2009 ho naran Timor Sea Designated Authority (TSDA), sai Autoridade Nasional Petróleu (ANP, 2009-2015), no Autoridade Nasional Petróleu no Minerais (ANPM, 2015 to ohin loron). Ne’e nudár órgaun reguladór ida ne’ebé sei asina kontratu sira no tau matan ba operasaun petróleu iha Timor-Leste no hamutuk administra atividade sira iha rai maran no tasi, nune’e mós enkoraja dezenvolvimentu kampu sira. [2]

Tanba Area Unitizasaun Sunrise sei nafatin iha rai rua nia okos, DA nia servisu iha area ne’e mós hetan tau matan hosi “Governance Board – Konsellu Governasaun” (GB) ne’ebé kompostu hosi reprezentante na’in rua ne’ebé hili hosi Timor-Leste no ida hosi Australia, ne’ebé iha knar hodi deside “asuntu Estratéjiku sira ne’ebé importante liu ne’ebé iha relasaun ho projetu Sunrise. Tanba GB nia desizaun sei bazeia ba konsensu, númeru reprezentativu nian la importante. Karik GB labele konkorda ba asuntu Estratéjiku ida, DA ka kontraktor Sunrise nian bele refere asuntu ne’e ba iha Dispute Resolution Committee – Komisaun Rezolusaun Disputa (DRC) ne’ebé kada rai ida iha nia reprezentasaun ida-idak no membru terseiru ida ne’ebé hili hosi membru ne’ebé reprezenta rai rua nian. [3]

Konsorsiu Sunrise nian (Woodside, ConocoPhillips, Shell no Osaka Gas) daudauk ne’e kaer hela kontratu rua ho Australia no rua ho Timor-Leste ba parte diferente hosi Area Unidade Sunrise. Tuir Tratadu foun, kontratu hat ne’e sei troka ho kontratu ida de’it entre Autoridade Dezignada no Konsorsiu Sunrise (Sunrise Joint Venture SJV). [4]

Oinsá Planu Dezenvolvimentu Sunrise nian sei hetan aprovasaun

Aprova Konseitu Dezenvolvimentu iha diskusaun konfidensiál sira entre Australia, Timor-Leste no kontraktor Sunrise.
Planu submete ba GB no DA
DA rona hosi kompañia sira, halo mudansa no rekomendasaun dentru loron 180.
GB sei konsidera DA nia rekomendasaun, maibé tenke halo tuir Kritéria:
a. Tuir ”Konseitu Dezenvolvimentu ne’ebé aprovadu ona”
b. Suporta kada parte nia polítika, objetivu no nesesidade.
c. Komersialmente viavel no teknikamente posivel
d. Konsiste ho Pratika di’ak Kampu Mina-rai no kompañia sira nia estratéjia sira kona-ba Saúde/Seguru/Ambientál.
e. Fó retornu justu ba Kontraktor, ne’ebé buka hela vantajen komersiál ne’ebé di’ak liu.
f. Kontraktor iha kompeténsia finanseiru no téknika atu hala’o projetu tuir oráriu.
g. Kontratu mak arranja hodi fa'an ka proses gas.
GB aprova planu dentru loron 180 ka GB rejeita planu, ho razaun espesífiku sira.
Karik rejeita, parte ruma bele halo rekursu ba DRC dentru loron 15.
Karik DRC determina dentru loron 90 katak planu ne’e tuir Konseitu no Kritéria Dezenvolvimentu nian, DRC tenke aprova planu ida ne’e.
Maske nune’e, karik DRC hetan katak Planu ne’e la tuir Konseitu no Kritéria Dezenvolvimentu nian, DRC tenke rejeita planu, no fó razaun espesífiku sira.
Desizaun ne’ebé halo hosi GB no DRC ne’e kesi parte sira hotu atu halo tuir.

Durante prosesu konsiliasaun, parte sira espera atu iha konkordánsia ba Konseitu Dezenvolvimentu Sunrise (nudár liña jerál hodi sai baze ba oinsá Sunrise ne’e atu dezenvolve, inklui fatin atu dada kadoras no planta LNG nian) molok Tratadu Fronteira nian asina, maibé buat ne’e la akontese. Anexu B hosi tratadu, ne’ebé define Rejime Espesiál ida ba Greater Sunrise, refere ba lian fuan “Konseitu Dezenvolvimentu ne’e aprova tiha ona” dala tolu, maibé la esplika oinsá Konseitu ruma ne’e atu aprova. Desizaun ida ne’e, presumivelmente presiza konsentimentu hosi governu rai rua nian no Konsorsiu Sunrise, nudár buat esensiál atu lori projetu ne’e la’o ba oin.

Iha 2008, La’o Hamutuk hakerek livru ida Sunrise LNG in Timor-Leste: Dreams, Realities and Challenges – LNG Sunrise iha Timor-Leste: Mehi, Realidade no Dezafiu sira, buat barak iha livru ne’e sei nafatin pertinente (esklui analiza fiskál). Avaliasaun detailadu kona-ba opsaun ida ne’ebé di’ak liu ba povu Timor-Leste atu dada kadoras ida hosi Sunrise ba iha planta LNG nian ida iha Beaçu no harii komponente sira seluk hosi Projetu Tasi Mane, ne’e la tama iha eskopu ba artigu ida ne’e. Durante ne’e iha kontroversu ne’ebé politizadu, ho akuzasaun no dezinformasaun, ne’ebé la lori asuntu ne’e ba iha diskusaun ne’ebé rasionál.

Maske iha loron ruma bele dezenvolve ona Sunrise, maibé La’o Hamutuk preokupa hela kona-ba promesa as sira katak sei iha reseita no benefísiu ekonómiku ne’ebé sei boot tebes tanba ida ne’e bele hasees ita hosi nesesidade urjente hodi diversifika Timor-Leste nia ekonomia hosi prosesamentu no esportasaun petróleu no gas. Maske bele tuir duni projesaun kredivel sira ne’ebé optimistiku liu, maibé Sunrise sei bele de’it finansia Timor-Leste nia estadu no ekonomia menus hosi jerasaun ida. Ita deve hela ida ne’e ba ita nia oan no bei oan sira atu hanoin ba tempu naruk liu tan.

Molok halo desizaun ida ba Sunrise, Timor-Leste presiza sukat pezu hosi benefísiu finanseiru, ekonómiku, ambientál no sosiál, kustu no risku sira, inklui projesaun ne’ebé realistiku kona-ba kampu servisu ba Timor oan no kontratu subprodutu sira hosi planta LNG ida ho dalan kle’an no objetivu liu, inklui mós analiza insentivu sira ne’ebé rekomenda hosi Komisaun Konsiliasaun. Maske iha estudu barak mak halo ona, maibé laiha relatóriu ida hosi estudu hirak ne’e mak publika ona ne’ebé ita bele hare nia analiza ne’ebé korretu no imparsiál. Ami husu katak Sunrise ne’e dezenvolve atu servi interese di’ak liu povu no nasaun ida ne’e nian, duke fó de’it benefísiu partikulármente ba kompañia petrolíferu, faksaun polítiku, ka rejiaun ida. Desizaun ne’e importante liu atu la bazeia ba konsiderasaun emosional, polítika ka personal ruma.

Diskusaun konfidensiál sira sei kontinua kona-ba Konseitu Dezenvolvimentu Sunrise, no rejime tranzitóriu balu kona-ba kontratu Bayu-Undan no Kitan sira sei implementa.

Molok Tratadu Fronteira ne’e legalmente vigora, tratadu ne’e tenke hetan ratifikasaun hosi nasaun rua. Molok to iha ne’ebá, Australia sei kontinua hodi simu 10% hosi reseita Bayu-Undan nian (maizumenus tokon $4 kada fulan).

Parlamentu Nasional Timor-Leste dissolve ona, no Parlamentu foun seidauk hetan tomada de posse molok Juñu, ho Governu Konstitusional ba dala walu nian iha fulan ida ka rua depois Parlamentu foun estabelese ona. Timor-Leste nia Konsellu Ministru no Parlamentu foun dala ruma bele ratifika Tratadu Fronteira ne’e iha fulan rua depois sira nia tomada de posse, no ami enkoraja atu iha konsulta públiku no analiza sira ne’ebé ho kuidadu hodi nune’e tratadu ne’e bele konsistente ho Lei Timor-Leste nian.

Prosesu iha Australia bele han fulan neen, no presiza iha Inkéritu Parlamentár no audiénsia públiku ne’ebé hala’o hosi Komisaun Permanente kona-ba Tratadu sira. Ami espera katak sira sei la dada naruk ratifikasaun ne’e.

Timor-Leste sei hahú fila fali negosiasaun kona-ba nia fronteira maritima ho Indonézia iha tinan ida ne’e, no ida ne’e sei fasil liu tan ho Australia tanba la iha mina-rai no gás iha area kontestadu potensiál sira. Bainhira fronteira ne’e estabelese ona, Australia no Indonézia sei bele atu halo alterasaun no finalmente ratifika sira nia ezbosu ba tratadu koluna be tasi nian (ZEE) iha 1997, ne’ebé estabelese direitu seguransa no ekonómiku ba sira nia bee leten no peska nian.

Maske nune’e, Tratadu Fronteira foun entre Australia-Timor-Leste la pertuba Tratadu Tasi Okos Australia Indonézia nian ne’ebé vigora hela durante tinan 46. Mezmu iha ema Indonézia balu hanoin katak tratadu tuan ne’e la justu, Australia laiha obrigasaun legal atu renegosia tratadu ida ne’e. Timor-Leste no Australia mantén informa ba Indonézia kona-ba prosesu foin daudauk ne’e, no Jakarta laiha objesaun ba ida ne’e.

Hafoin Timor-Leste no Indonézia estabelese ona sira nia fronteira koluna be tasi no tasi okos, no hafoin petróleu no gas iha area relevante sira ne’e maran ona, liña lateral hosi fronteira maritima entre Australia-Timor-Leste sei ajusta atu alina ho fronteira ho Indonézia.

Artigu 10 hosi Tratadu Fronteira foun hateten katak Timor-Leste labele “halo reklamasaun ba kompensasaun” ba osan sira ne’ebé Australia koleta ona tuir tratadu no akordu tuan sira, ne’ebé nia total maizumenus dolar biliaun lima. Maske nune’e, Tratadu ne’e la prevene Australia atu ho voluntariamente fó fila osan sira ne’ebé sira na’ok ona ba Timor-Leste. Preambulu hosi Tratadu ne’e mensiona “promove Timor-Leste nia dezenvolvimentu ekonómiku” no sai “viziñu di’ak no iha espíritu ba kooperasaun no amizade …. ho hanoin atu atinje solusaun ida ne’ebé equitativu.” Kona-ba espíritu foun ba respeita malu ida ne’e, argumentu ida ne’e apropriadu liu bainhira Australia fó fila saida mak sira foti ona durante besik dékada tolu nia laran dezde nasaun ne’e asina Tratadu Timor Gap atu hetan lukru hosi okupasaun brutal no ilegál Indonézia nian ba Timor-Leste.

[1] Unitizasaun ne’e aplika bainhira kampu mina-rai ka gas ida iha fronteira ida nia klaran nune'e bele evita disputa kona-ba se mak sai na’in ba molekula petróleu ne’e nia matan.

[2] La’o Hamutuk preokupa katak Artigu 6.2(c) hosi Tratadu Fronteira foun, ne’ebé fó dalan ba DA atu foti pagamentu sira ne’ebé nia koleta hosi kompañia mina-rai sira, ne’e kontradís ho RDTL nia Lei Fundu Petrolíferu No.9/2005, ne’ebé husu katak reseita tomak ne’ebé iha relasaun ho petróleu rai hela iha Fundu Petrolíferu. Ida ne’e konveniente bainhira DA primeiru foin kria molok Lei Fundu Petrolíferu vigora, maibé buat ne’e la apropriadu ka legal ona. Maske teknikalidade kona-ba asuntu ne’e konsidera ona hosi Tribunal Rekursu iha Proc. 01/Const/09/TR, maibé asuntu ne’e bele avalia fila fali molok DA ne’e kria fila fali, ne’ebé halo tuir governasaun di’ak iha petróleu ne’ebé dezigna hosi Timor-Leste nia Fundu Petrolíferu.

[3] Ema ne’ebé sei hetan “komersiál direta ka jurus finanseiru ruma” hosi operasaun projetu Sunrise ka ema ne’ebé hili “atu kria persepsaun ne’ebé razoavel ruma, ka loloos, iha konflitu ba interese ruma” labele sai membru iha Konsellu Governasaun ka Komisaun Rezolusaun Disputa nian.

[4] Kontratu Fahe Produsaun (PSC) daudauk ba Bayu-Undan no Greater Sunrise, ne’ebé asina iha 2003, nunka mais publika. Maske nune’e, tuir Artigu 30.1(a)(1) RDTL nian Lei ba Atividade Petróleu No.13/2005 hateten katak kontratu sira hanesan ne’e tenke sai dokumentu públiku, no PSC tomak ne’ebé asina depois lei ne’e vigora ona bele hetan ona. Estandarte Extractive Industries Transparency Initiative (EITI) ne’ebé Timor-Leste kumpre mós rekere transparénsia kontratu nian.
Iha Outubru 2017, Timor-Leste no Australia troka malu karta ne’ebé hatuur kometimentu atu halo revizaun ba PSC Bayu-Undan no Kitan. Tratadu hateten katak kontratu ba Buffalo sei troka, no PSC foun ba Sunrise sei asina. Kompañia sira no termu fiskál sira iha kontratu sira sei kontinua hanesan kontratu uluk, maske bele iha alterasaun balu atu nune’e bele tuir Tratadu foun no mudansa sira iha lei seluk. La’o Hamutuk preokupa katak transparénsia kontratu la mensiona iha konkordánsia bilateral ruma foin lalais ne’e. Maske Tratadu Fronteira la esplisitamente viola Lei Timor-Leste nian iha area ida ne’e, maibé Tratadu ne’e falla atu hateten ba Australia no kompañia mina-rai sira katak kontratu sira tenke publika sai.
Ema hotu familiar ho Lei Fundu Petrolíferu (inklui kompañia sira ne’ebé partisipa iha EITI) hatene katak transparénsia kontratu ne’e buat obrigatóriu, no ami hein katak kontratu foun ba Bayu-Undan, Greater Sunrise, Kitan no Buffalo nian sei publika. Ne’e sei sai pekadu ida – no mós nudár insultu ida ba soberania nasionál RDTL – karik Artigu 9.2 hosi Tratadu foun (‘laiha efeitu hosi direitu no obrigasaun sira ne’ebé mai hosi Tratadu Tasi Timor no IUA, tanba tratadu rua ne’e mai uluk liu lejizlasaun Timor-Leste nian) ne’ebé uza hodi justifika hodi kontinua viola rekizitus transparénsia nian. Timor-Leste orgullu ho nia sistema transparénsia nian kona-ba jestaun dezenvolvimentu petróleu no reseita nian, no labele fó fatin ba Australia ka kompañia mina-rai sira atu halo sabotajen ba ida ne’e.

Tratadu Fronteira Maritima entre Timor-Leste - Australia