La’o Hamutuk

Bulletin  |  Surat Popular  |  Topic index  |  Reports & Announcements  |  Updates
Reference  |   Presentations  |  Mission Statement  |  LH Blog  |  Search  |  Home

Kurríkulu Nasionál ba Pre-eskolár no Ensinu Báziku

15 Fevreiru 2018. Atualiza 23 Abril 2018.

Link to this page in English.   Link para esta página em portuguęs.

Konteúdu

Ita-nia labarik sira nia esperiénsia iha eskola ohin-loron sei iha impaktu boot ba ita-nia nasaun nia futuru – labarik sira ne’ebé ohin-loron estudante, aban bainhira sei sai inan-aman, to’os-na’in, peskadór, manorin (mestre ka mestra), ema médiku, ema tékniku no ita-nia lideransa. Triste atu haree katak diskusaun públiku barak kona-ba asuntu ne’e nakonu ho liafuan politizadu sira envezde nakonu faktu no informasaun forte. La’o Hamutuk fó sai pájina ida-ne’e hodi ajuda ema atu bele envolve iha prosesu halo desizaun, fó opiniaun no halo polítika bazeia ba evidénsia ka faktu.

Foin daudaun ne’e, iha asaun husi Ministériu atu muda elementu importante balu husi kurríkulu pre-eskolár no ensinu báziku. Nune’e mosu pergunta sériu oioin kona-ba prosesu halo lei edukasaun nian no hatudu nesesidade ba diskusaun luan hodi asegura katak lei no polítika sira sai sustentável, inkluzivu no suporta susesu eskolár labarik HOTU. Lei no polítika sira tenke bazeia ba realidade lokál no prátika di’ak liu, la’ós ba objetivu polítiku ka opiniaun indivíduu husi lider balu.

Saida mak kurríkulu nasionál? Kurríkulu nasionál mak matadalan báziku ba:

  • Saida mak manorin sira sei hanorin (konteúdu)

  • Oinsá sira sei hanorin (metodolojia no oinsá uza lian sira)

  • Tempu ba hanorin (karga oráriu)

  • Oinsá sira sei hatene se estudante sira aprende duni ka lae (avaliasaun).

Kurríkulu nasionál sei iha impaktu boot ba aprendizajen no matenek ba kada estudante iha Timor-Leste.

Durante tinan tolu liubá, Ministériu Edukasaun implementa kurríkulu foun ba pre-eskolár no Ensinu Báziku síkulu dahuluk no daruak (to’o klase 6) tuir pasu neineik sira. Manorin sira hetan formasaun kona-ba prinsípiu, metodolojia, no oinsá uza gia ba profesór no livru sira ba estudante. La’o Hamutuk mak organizasaun lokál ida ne’ebé envolve iha konsultasaun liga ho kurríkulu, no hamutuk ho sira seluk, ami husu lider polítiku sira atu estuda didi’ak impaktu ba kualkér mudansa ba kurríkulu. Se halo mudansa, tenke asegura mudansa ne’e haforsa susesu husi prosesu hanorin no buka hatene, no la aumenta konfuzaun no inkonsisténsia iha prosesu implementasaun.

La’o Hamutuk espera katak pájina ne’e bele kontribui ba diskusaun sira-ne’ebé informadu liu; nune’e bele iha lei no polítika sira ne’ebé di’ak liu ba Timoroan hotu. Ami hanoin katak labele foka de’it ba asuntu lian, ne’ebé sai politizadu tebes, maibé tenke konsidera asuntu sira seluk ne’ebé liga mós ba susesu edukativu: konteúdu kurríkulu nian ne’ebé tenke relevante ba estudante sira nia moris; materiál didátika, formasaun no suporta ba manorin sira; metodolojia hanorin ne’ebé promove hanoin ne’ebé kritiku no kriativu; jestaun sala nian no eskola nian ne’ebé asegura iha akontabilidade; prioridade orsamentu nian, nst.

Mudansa foun ba Kurríkulu Nasionál?

Iha loron 25 fulan-Janeiru, tinan 2018, loron ida molok Prezidente Repúblika Lu Olo disolve Parlamentu Nasional, Konsellu Ministrus (KM) hala’o Soromutu Estraordináriu. Iha soromutu ne’e, Ministériu Edukasaun no Kultura (MEK) aprezenta proposta atu halo alterasaun ba Dekretu-Lei rua husi 2015 ne’ebé liga ba kurríkulu nasionál pre-eskolár no ensinu báziku nian (to’o klase 6). Proposta ne’e hetan aprova husi Konseullu Ministrus.

Iha loron 30 fulan-janeiru, La’o Hamutuk ho ONG no indivíduu na’in-70 haruka karta preokupasaun ba Prezidente ne’ebé husu nia atu labele promulga alterasaun sira, tanba la haree evidénsia katak mudansa sira-ne’e sei fó benefísiu ba maioria estudante sira. Karta mós temi falta transparénsia no konsultasaun iha prosesu mudansa sira, no husu atu hetan enkontru ho Prezidente. Tuirmai, ami publika ami-nia preokupasaun sira liuhosi komunikadu imprensa no mós husu atu hasoru lideransa iha MEK.

Maski ami, hamutuk ONG sira seluk, halo esforsu barak atu hetan asesu ba dokumentu sira alterasaun nian hodi bele fó komentáriu kle’an, maibé entidade sira-ne’ebé kaer dokumentu sira-ne’e la fó mai ami molok Prezidente promulga. Alterasaun Dekretu-Lei sira hetan publika iha Jornal da República iha loron 14 fulan-marsu. Hare iha kraik atu hetan Akontesimentu foun sira.

Informasaun Antesedente

Iha tinan 2013, bazeia avaliasaun oioin, Ministériu Edukasaun deside atu lanza revizaun ba kurríkulu pre-eskolár no ensinu báziku nian, dahuluk atu halo iha rai-laran. Reforma ne’e ho planu atu hatan estudante sira nia falta boot iha kapasidade lee (2009 EGRA) no mós realidade katak labarik barak repete klase ka husik eskola sedu. Atu hasoru problema boot rua ne’e, Ministériu hakarak kurríkulu ida-ne’ebé bele 1) relevante no liga ho forte ba moris loroloron estudante sira nian no 2) uza metodolojia ne’ebé envolve estudante barak atu sira husu atu buka hatene rasik envezde sira rona no dekor de’it.

Maski kurríkulu husi 2005 temi liafuan hanesan ‘ativu’, ‘sentradu ba alunu’ no ‘inklusivu’, maibé metodolojia atuál ne’ebé uza iha eskola sira mak sentradu ba mestre (manorin), kópia no dekor barak no halo dixiplina ho maneira komandu. Programa pilotajen ne’ebé UNICEF hahú ho Ministériu iha tinan 2009 hatudu katak metodolojia ‘child-friendly’ la’ós de’it bele uza, maibé efetivu tebes. To’o mós mestre, estudante no família gosta tebes. Entaun, reforma 2013 nian inklui Livru Planu Lisaun ba kada área kurrikulár (dixiplina) ba katak klase hodi sai matadalan ba formasaun no implementasaun kurríkulu nian. Ministériu deside atu la halo revizaun ba livru sira estudante nian tanba livru sira-ne’e mak propriedade husi kompańia imprime portugés, entaun halo revizaun no imprime fali sai komplikadu no karun. Nune’e, Ministériu deside atu livru estudante sira bele hetan halo rasik hodi Ministériu bele kontrola ba oin.

Ekipa reforma kurríkulu ne’e ho maizumenus ema na’in-40, no maioria husi sira profesór no profesóra ho esperiénsia no husi parte tomak rai Timor-Leste. Hamutuk ho konsultór(a) sira nasionál no internasionál, sira estuda realidade iha eskola sira, analiza kurríkulu atuál tempu ne’ebá, konsulta ho lider nasionál sira, ho membru sosiedade sivíl no peritu oioin, hodi finaliza Kurríkulu Nasionál ba Pre-eskolár no Ensinu Báziku Siklu Dahuluk no Daruak (mos Port.) iha tinan 2014. Livru rua ne’e sai matadalan oinsá manorin sira presiza hanorin, saida mak estudante sira presiza aprende – inklui valór, kapasidade no informasaun – no oinsá eskola sira bele avalia se estudante sira aprende ho di’ak ka lae?

Tuir mai, iha fulan-Juńu tinan 2014, Konsellu Ministrus diskute no aprova Matadalan ba Polítika Edukasaun Pre-eskolár nian no Dekretu-Lei rua ne’ebé estabelese Base Kurrikulár Nasionál to’o klase 6. Ministériu halo diálogu ho Prezidente, hafoin Prezidente promulga Dekretu Lei sira ne’ebé sai iha Jornál da República iha fulan-Janeiru 2015 (Dekretu-Lei N°3/2015 no Dekretu Lei N°4/2015). Implementasaun lei sira-ne’e hetan demora tanba Parlamentu hala’o prosesu apresiasaun ba Dekretu-Lei rua ne’e.

Ministériu Edukasaun hahú implementasaun ba kurríkulu rua ne’e ba klase 1 no 2 iha tinan 2015; ba klase 3 no 4 iha tinan 2016, no ba klase 5 no 6 iha tinan 2017. Mudansa xave tolu mak hetan prioridade durante formasaun iha tinan 2015:

  1. Uza metodolojia hanorin ne’ebé enkoraja estudante sira atu buka aprende, hanoin ho kle’an no halo ligasaun entre saida mak sira hatene ona ba konseitu no kapasidade foun sira. Manorin tenke valorize estudante sira nia esperiénsia, matenek, pergunta sira no kultura; la bele hanoin katak kakutak estudante sira nian mak mamuk no hein enxe de’it. Estudante sira sai sentru prosesu aprendizajen hodi sira mak bele buka no hetan resposta sira rasik liuhosi estratéjia oioin hanesan jogu sira ne’ebé hanorin, prátika sientífiku no entrevista oral. Tékniku sira-ne’e envolve estudante ho di’ak hodi sira la husik eskola sedu, no mós sai efetivu liu atu hanorin informasaun no kapasidade hanoin ho kle’an no krítiku.

  1. Promove dame no hakribi violénsia iha eskola laran no li’ur, liuhosi konteúdu sira lisaun nian no mós estratéjia foun sira oinsá halo jestaun sala hanorin. Liuhosi unidade estudu nian no lisaun sira iha parte kurríkulu tomak, manorin sira hanorin toleránsia, inkluzaun, rezolusaun konflitu no oinsá bele sai pás-na’in. Manorin sira hetan estratéjia foun sira oinsá bele kria ambiente sala hanorin ne’ebé seguru no nakonu respeitu ba ema hotu. Estudu barak hatudu katak violénsia fíziku nu’udar maneira halo dixiplina la ajuda estudante sira atu aprende ho di’ak no mós bele impaktu sira-nia vontade atu mai eskola.

  2. Tetun sai lian dahuluk ba literasia iha klase 1 no 2, ho Portugés hetan introdús ho maneira oral de’it. Hahú iha klase 3, kapasidade sira ba lee no hakerek (Literasia) hetan transferénsia ba Portugés iha maneira ne’ebé klaru no sistemátiku. Tempu uza Portugés nu’udar lian instrusaun aumenta neineik hodi atinje matenek forte iha lian rua antes remata klase 6. Mudansa ne’e bazeia estudu barak kona-ba prosesu aprende lian, oinsá bele atinje susesu eskolár boot liu, no mós haree realidade ho lian iha Timor-Leste: Tuir dadus husi sensus 2015, 30% hosi labarik sira ho idade 5 to 9 ko’alia Tetun nu’udar lian dahuluk, no 0,08% (menus 1/10 husi 1%) hosi labarik sira ko’alia Portugés nu’udar lian dahuluk.

Husi tinan 2014 to’o 2017, Ministériu Edukasaun elabora no prodús livru sira liu atus ida lima-nulu (150), inklui gia sira ba manorin, livru didátika ba estudante, atlas, livru istória barabarak iha Tetun no Portugés hodi haforsa estudante sira nia gosta lee. Dezenvolve mós materiál foun atu hanorin lia-Tetun liuhosi liga letra, sílaba no son sira hodi bele lee no hakerek ho di’ak, no livru gramátika ba Tetun no Portugés. Dezenvolve mós livru sira ho tópiku oioin ne’ebé importante hanesan istória Timor nian molok tempu koloniál, luta nasionál ba independénsia, ambiente naturál no oinsá bele proteje, halo to’os ba futuru sustentável, siénsia no matemátika iha moris loroloron nian, no oinsá bele kria relasaun sira ne’ebé kooperativu no iguál. Material seluk inklui kartáz, knananuk no video sira atu fasilita formasaun. (Ezemplu balu husi materiál ne’e iha kraik ne’e.)

Kada tempu feriadu entre tinan 2015 to’o tinan 2017 nia rohan, INFORDEPE (Institutu Nasionál ba Formasaun ba Dosente no Profisionál Edukasaun) hala’o formasaun ba kurríkulu foun ne’e. Tanba material barak ne’ebé xave ba implementasaun seidauk ba eskola tomak ka ba ho kuantidade la nato’on, liuliu ba klase 5 no 6, kurríkulu seidauk implementa ho kompletu.

Durante tinan haat liubá, Timor-Leste iha Ministru Edukasaun haat, no parese mudansa sira iha lideransa no afiliasaun polítiku sai razaun ida ba mudansa sira iha polítika. Kurríkulu 2015 hetan apoiu forte husi Ministru Bendito dos Santos Freitas no Ministru Fernando ‘La Sama’ de Araujo, to’o nia hakotu-iis iha fulan-Juńu tinan 2015. Tuirmai iha tempu Ministru Antonio da Conceiçăo nian, ofisiál balu husi Ministériu hahú atu kestiona kurríkulu. Iha tinan 2017, bainhira eleisaun prezidensiál no parlamentár la’o hela, da Conceiçăo (kandidatu Prezidente tempu ne’ebá) hahú prosesu halo Kongresu Nasionál kona-ba Edukasaun. Lideransa Ministériu atuál temi rekomendasaun sira husi Kongresu ne’e (Port.) hodi justifika mudansa sira-ne’ebé hato’o ona ba Konsellu Ministrus, maibé observadór no partisipante balu kestiona oinsá prosesu prepara no deside rekomendasaun sira-ne’e.

Akontesimentu foun sira (fulan-Marsu no fulan-Abril, 2018)

Hanesan deskreve iha karikatura parte liman loos Demokrasia depende ba asesu ba informasaun (klik atu hare boot liu), La’o Hamutuk no membru sira seluk husi Rede Advokasia ba Edukasaun hato’o karta preokupasaun no husu ba Prezidente atu labele promulga Dekretu-Lei sira-ne’e kona-ba polítika kurrikulár pre-eskolár no ensinu báziku nian molok iha tempu halo avaliasaun independente no konsidera sosiedade sivíl nia hanoin. Iha loron 1 fulan-Marsu, besik fulan ida hafoin karta ne’e sai, funsionáriu husi Palasiu Prezidensiál telefone ba La’o Hamutuk hodi hatán katak Prezidente kontente atu rona husi sosiedade sivíl, no sei la promulga lalais hodi bele estuda alterasaun sira no rona komentáriu ne’ebé tenke ho detaille, katak refere ba artigu ida-idak.

La’o Hamutuk esplika katak sosiedade sivíl la bele fó komentáriu ho detaille bainhira seidauk hetan asesu ba dokumentu ofisiál kona–ba alterasaun sira, maibé pedidu balu la hetan susesu. Ho ida ne’e, funsionáriu iha Palásiu haruka ba eskritóriu Konsellu Ministru sira hodi hetan dokumentu sira. Ami halo pedidu formál ba Konsellu Ministru sira no Gabinete Primeiru Ministru, maibé foin hetan dokumentu kompletu sira iha loron 16 fulan-Marsu, hafoin hatene Prezidente Repúblika promulga tiha semana ida molok iha loron 9 fulan-Marsu 2018, no sira publika ona iha Jornal da Republika iha loron 14 fulan-Marsu 2018.

Hafoin lee ho kuidadu no halo analíza jurídiku no rezumu ba mudansa sira, Rede Advokasia ba Edukasaun prepara petisaun ne’ebé detailladu atu rejeita Dekretu-Lei foun sira no husu partidu polítiku hotu suporta direitu konstitusionál atu Parliamentu atu halo apresiasaun ba Dekretu-Lei sira-ne’e. La’o Hamutuk mós prepara sumáriu husi petisaun boot hodi fahe ba jornál sira.

La’o Hamutuk sei kontinua atu atualiza informasaun iha pájina ne’e no kontente atu simu informasaun husi fonte hotu.

Dokumentu legal no informasaun sira (Iha orden kronolojiku hahu husi uluk ba oin. Hotu iha Tetun maske lingua seluk indika.)

Materiál Kurrikulár

Ezemplu balu husi kurríkulu 2015 nian:

 

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua D. Alberto Ricardo, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: 
info@laohamutuk.org    Web: http://www.laohamutuk.org    Blog: laohamutuk.blogspot.com