Timór-Leste tama ba deve.

Informasaun baziku no analize husi La'o Hamutuk

7 Marsu 2012

Durante 2009-2011, Governu Timór-Leste halo ona asaun lejislativa, diplomatiku no finansial atu lori nasaun ne’e atu deve osan hosi governu no instituisaun husi rai li’ur, hanesan bele akontese durante 2012. Pajina ida ne'e inklui informasaun no eventu sira husi 2012 ba future, bainhira imprestimus akontese. Atu hetan informasaun tuan liu, hili iha ne'e.

La’o Hamutuk fiar katak ida ne’e sei lori risku boot ba nasaun, liu-liu ba jerasaun futuru. Ami oferese ligasaun no analisa hirak ne'e atu ajuda asegura katak desizaun tenki foti ho informasaun ne’ebé kompletu.

	Hili kada grafiku atu hare boot liu.
Mapa ida ne'e hatudu projetu sira iha Orsamentu Jeral Estadu 2012, ne'ebe inklui projeksaun to'o 2016. Maibe dokumentu sira kona-ba OJE seidauk fo informasaun kompletu; tanba ne'e La'o Hamutuk buka informasaun husi instituisaun atu fo imprestimus atu kompleta diak liu. Mapa ida ne'e la inklui projeitu hahu ka kontinua depois tinan 2016.
Grafiku ida ne'e hatudu deve ba projetu sira inklui iha mapa iha leten.
Impretimus balun, hanesan IBRD husi Banku Mundial no OCR husi ADB, tuir merkadu komersial. Taxa funan LIBOR nian bele indika jeralmente taxa funan iha merkadu global.  Ita bele hare katak agora dadaun, funan uituan deit, maibe tinan balu liu ba to'o 15% ka liu.  Iha futuru, LIBOR bele sai aas dala ida tan. Iha grafiku iha leten, ami halu asumsaun katak LIBOR iha tempu naruk 3.8%, hanesan 2003-2007.

Lei Divida Públika hetan ona aprovasaun

Iha Junu 2011, Konsellu Ministru aprova ona (mos Ingles ka Portugese) Polítika kona-ba Dívida Públika "atu hodi estabelese baze ida hodi fasilita hetan empréstimu Esternu entre Governu Timor Leste nian ho institusaun multilaterál no bilaterál sira finansimentu nian, atu suplementa nesesidade finansiamentu nian sira kona-ba Planu Dezenvolvimentu Estratéjiku (PDE)." 

Governo fo proposta lei no exposisaun motivus (Portugese ka Ingles) ba Parlamentu Nasional iha loron 28 Junhu 2011. Parlamentu aprova ona Lei Divida Publika ho alterasaun kiik deit iha loron 24 Agusto. Semana hanesan sira mos aprova revisaun Lei Fundu Petroleu atu fo lisensa atu uza 10% Fundu ida ne'e hanesan garantia ba imprestimos.

Iha Setembru, liu 100 organizasaun Timor-oan no internasional fo sai statementu ida atu ezizi Timor-Leste la deve. Sira konklui katak: "Republika Demokratika de Timór-Leste komesa moris iha 2002 sim deve hosi ema seluk. Ho razaun justisa, prosperiedade no futuru ne’ebé diak liu ba oan sira ohin loron no iha futuru, ita presiza liu dalan seluk atu hetan osan ba dezenvolvimentu."  Organizasaun sira mos iha petisaun iha internet; ita boot bele le'e no asina iha ne'e.

Ami fiar katak imprestimus nudar desizaun atu deve ka la'e krusial no perigu liu ne’ebe governu bele foti, fo naha todan ba jerasaun futuru hodi selu benefisiu politika ka finaseamentu tempu badak nia laran deit, Ida ne’e tenke foti deit ho kuidadu duni, iha planeamentu ne’ebe klaru no realistiku, iha diskusaun ida ne’ebe klean no iha transparansia ne’ebe total kona-ba kondisaun, termus no oinsa atu selu fali divida.

Pajina ida ne'e iha prosesu agora

La’o Hamutuk sei kontinua atu halo peskiza asuntu ne’e no publika informasaun ne’ebé iha.
 

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua D. Alberto Ricardo, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: laohamutuk@gmail.com    Web: http://www.laohamutuk.org    Blog: laohamutuk.blogspot.com