Buletin La'o Hamutuk Vol.23, No.2. Dez 2022

Timor-Leste sai ona nasaun ida ne’ebé mak depende maka’as ba Fundu Petrolíferu (FP). Ida ne’e determina ita nia ekonomia no futuru. Fundu FP mai husi rekursu mina no gás ne’ebé agora daudaun mai husi de’it kampu ida mak naran Bayu-Undan, no mós investimentu iha merkadu finansiál internasionál. Dezde inísiu to’o Setembru 2022, FP hetan $6.9 biliaun husi retornu investimentu no $24.5 biliaun husi atividade petrolíferu sira.

Reseita husi kampu ne’e hotu ona. Governu uluk promete katak Fundu ne’e sei dezenvolve rai ida ne’e no atu fó moris di’ak ba povu loron ohin no jerasaun tuir mai maibé fundu sei la dura ba tempu naruk se kuandu gasta ho maneira ne’ebé la sustentável.

Rekursu mina no gás hanesan rekursu ne’ebé la renovavel no sei mamuk iha loron ida. Kampu Bayu-Undan mak fó reseita boot liu ba FP, ne’ebé kada tinan iha istória Timor-Leste nian sai fonte prinsipál ba Orsamentu Jerál Estadu (OJE). Kampu ne’e atinje nian másimu produsaun iha tinan 2011, hahú husi 2012 reseita hahú tun no kampu ida ne’e sei remata nia produsaun iha tinan 2022; katak sei laiha tan reseita petrolíferu iha tinan 2023 ba oin.

Konsidera katak kuaze la iha reseita husi produsaun mina no gás, ami observa katak Timor-Leste depende de’it ona ba investimentu FP iha merkadu finanseiru internasionál, ne’ebé vulneravel ba mudansa no xoke ne’ebé ita la bele kontrola. Ita lakon ona biliaun $2.5 resin entre Janeiru to’o Setembru 2022.

Iha tempu hanesan, Timor-Leste falta atu hasa’e reseita doméstika. Reseita doméstika kontribui de’it 8% husi OJE 2023. Tanba ne’e, bainhira FP mamuk ona, Timor-Leste sei hasoru rai-naruk fiskál tanba estadu sei la iha kapasidade atu realiza maioria ninia programa no atividade.

FP oferese ona duni oportunidade úniku ida atu dezenvolve nasaun no ekonomia forte, maibé infelizmente ita seidauk kaer oportunidade atu harii sistema ekonómiku ida ne’ebé produtivu, sustentável no diversifikadu. Aléinde ne’e, ita uza FP ho maneira ne’ebé la sustentável. Rendimentu Sustentável Estimativa (RSE) hatudu montante hira mak bele foti husi FP kada tinan no la hamenus balansu Fundu nian ba tempu naruk. Maibé, levantamentu FP tinan-tinan boot liu duké RSE dezde 2009, ho esepsaun ida iha tinan 2013. Iha tinan 2009-2021, RSE total mak biliaun $7.6, maibé levantamentu total mak biliaun $12.9.

Liu husi kriasaun FP, Timor-Leste espera katak rendimentu husi produsaun mina no gás bele fó benefísiu ba jerasaun sira tuir mai, no evita problema sira ne’ebé nasaun seluk hasoru bainhira iha dependénsia ba mina no gás. Maibé infelizmente Governu nafatin uza riku soin ne’e ho maneira ne’ebé la sustentável, no la konsege dezenvolve alternativu ba setór ida ne’e, ne’ebé bele sai baze ba ekonomia no futuru.

Saida mak Rai-Naruk Fiskál?
(Ho Lian Ingles: Fiscal Cliff)

Rai-naruk fiskál hanesan krize ekonómiku no finansas estadu iha país ida ne’ebé kauza tanba rekursu finansas estadu nian ko’a derrepente. Ne’e bele fó impaktu ba estadu nia atividade tomak, no mós atividade ekonómiku iha setór privadu no publiku ne’ebé depende ba Estadu. Governu Timor-Leste rasik rekoñese se ita kontinua tuir tendénsia despeza atuál, ita sei monu ba rai-naruk fiskál iha tinan 10 tuir mai ka lalais liu. Se kuandu ida ne’e akontese, ita presiza hamenus despeza iha tinan 2034 ho montante 60%, no iha 2035 sei presiza hamenus ho montante 80%.

Realidade situasaun finansiamentu estadu iha perigu nia laran: FP ne'ebé fundasaun ba finansas estadu no ekonomia Timor-Leste bele mamuk iha dékada ida tuir mai. Ukun-na’in balun agora daudaun rekoñese situasaun ida ne’e, maibé seidauk foti asaun efetivu atu rezolve.

Nune’e iha dokumentu proposta Orsamentu Jerál Estadu 2023, Governu oferese senáriu ida ne'ebé bele prolonga vida Fundu Petrolíferu ate 2045, fó tempu tan atu diversifika ekonomia hodi evita krize rai-naruk fiskál. Infelizmente, maske senáriu ne’ebé governu deskreve iha Livru Relatóriu Proposta Orsamentu Jerál Estadu (OJE) 2023 hanoin tenke redús despeza kada tinan 3% to’o 2034, maibé proposta OJE rasik inklui levantamentu FP sei sa’e kada tinan. Nune’e mós despeza liu Fundu Infrastrutura, governu laiha kometimentu atu tuir modelu sustentável, tanba tuir estimasaun sei sa’e dala lima husi 2023 ba 2024. Governu rekoñese nasaun ne’e iha perigu ba monu iha rai-naruk, maibé seidauk halo asaun ne'ebé bele adia ka prevene.

Governu presiza responde ba situasaun ida ne’e ho hanoin ba kurtu prazu no longu prazu. Ba kurtu prazu, presiza implementa planu konkretu atu adia rai-naruk fiskál liu husi ko'a despeza no aumenta reseita. Depois bele uza oportunidade ne’ebé mosu husi prolonga vida Fundu Petrolíferu nian, hodi dezenvolve setór ekonomia ne’ebé sustentável liu hanesan agrikultura no prosesamentu produtu agríkola.

Esforsu hirak ne’e importante tebes konsidera ita nia dependénsia ba importasaun. Timor-Leste importa sasán ho valór kuaze tokon $500 kada tinan, no esportasaun sasán (la inklui mina no gás) maizumenus tokon $20 kada tinan. Kustu sasán barak, liu liu ai-han, sei sa’e iha futuru nudár rezultadu husi mudansa klimátika nia impaktu ba agrikultura. Se FP mamuk ona, sei la iha kapasidade atu sosa sasán barak husi rai li’ur. Se Timor-Leste seidauk iha kapasidade atu hasoru nesesidade povu - liu liu ba ai-han - bele hamosu sofrimentu maka’as iha komunidade. Infelizmente, seidauk iha asaun forte atu implementa solusaun hanesan ne’e, tanba fantasia hetan reseita boot husi setór mina no gás kontinua domina prosesu governasaun.

Maske dependénsia ba reseita husi produsaun mina no gás hamosu situasaun ne’ebé deskreve iha leten, Governu kontinua mehi katak reseita husi setór ida ne’e bele ajuda nafatin Timor-Leste nia ekonomia ba tempu naruk. Evidénsia to’o agora hatudu katak atu investe ba iha mehi ida ne’e bele fó ameasa tan ba Timor-Leste.

Hanesan diskute iha leten, produsaun iha Bayu-Undan sei remata iha tinan ne’e. Opsaun ba kampu seluk seidauk hatudu viabilidade ka evidénsia kona-ba benefísiu mai Timor-Leste.

Rezerva boot mina no gás boot ne’ebé verifikadu ona mak kampu Greater Sunrise ne’ebé deskobre iha 1974. Maske disputa fronteira maritima entre Timor-Leste no Australia rezolve ona liu husi tratadu ne’ebé asina iha tinan 2018, seidauk iha progresu ho dezenvolvimentu kampu Greater Sunrise. Seidauk iha konkordánsia entre parte hotu kona-ba fatin prosesamentu, no sei paradu tanba ema balun iha Timor-Leste insiste katak pipa gás sei dada mai Timor-Leste costa súl atu transforma ba LNG no esporta maske laiha ema ka investidór ida mak prontu atu investe iha opsaun ne’e. To’o agora seidauk iha estudu kredivel ida ne’ebé hatudu kustu, risku, no benefísiu husi projetu ida ne’e. Maske nune’e, Timor-Leste kontinua investe iha projetu Tasi Mane ne’e ho kustu infrastrutura ne’ebé karik bele to’o biliaun $19 - boot liu kompara ho Fundu Petrolíferu tomak.

Husi kampu tasi seluk, Buffalo hatudu rezultadu la komersiál, no projetu ne’e abandonadu. Chuditch sei hala’o hela peskiza no prosesa ba sízmiku, no posibilidade sei laiha tan kampu seluk viavel atu dezenvolve.

La’ós produsaun mina no gás iha tasi okos de’it mak atrai atensaun husi Governu. Timor-Leste foin hahú perfurasaun iha rai maran iha tinan 2021. Konkorrente da uluk ba esplorasaun peskiza mina ne’ebé foun komesa iha tinan 2019 to’o 2022, kompañia hitu konkorre ba bloku neen husi 18 bloku ne’ebé oferese, no kontratu lima mak manán. Bloku hirak ne’e besik area hotu iha bloku tasi laran hamutuk ualu. Kompañia da uluk Timor Resources mak komesa ona perfurasaun peskiza ba posu tolu maibé seidauk fó rezultadu katak deskobre ona mina no gás ho kuantidade komersiál husi posu sira ne’e. (Hare iha kraik.)

Agora daudaun ita labele depende demais ba osan mina-rai tanba karik laiha kampu seluk ida sei sustenta ba Fundu ne’ebé sei hasoru rai-naruk fiskál la to’o tinan 10 nian mai no bele mós sedu liu tan kuandu ita la resolve atu dezenvolve setór la'ós mina-rai no sei kuandu Governu la redús ba despeza ne’ebé iha no la tuir planu ne’ebé sustentável.

Ho realidade ba projetu hirak ne’e, dependénsia ba mina-rai sei la hanaruk Fundu Petrolíferu no sei la prevene rai-naruk fiskál. Ba longu prazu, ita presiza rekoñese mós katak maioria kampu ne’e iha eskala ki’ik no, karik sira la’o duni, nunka bele fó osan hanesan Bayu-Undan. Mehi kona-ba reseita boot husi proposta projetu atu kaptura no rai hela karbonu iha kampu Bayu-Undan (carbon capture and storage), ka husi projetu mineiru seidauk iha serteza no la iha posibilidade atu fó riku soin boot hanesan Bayu-Undan iha pasadu. Realidade mak katak periodu riku soin husi projetu la’ós-renovavel remata ona.

Ita presiza hasoru rai-naruk fiskál ho onestu no esforsu atu komprende didi’ak ninia kauza, hodi la bele repete iha futuru.

Reseita husi hasai mina no gás labele asegura ita nia futuru - so diversifikasaun ekonomia mak bele hamosu kondisaun moris ne’ebé di’ak no sustentável ba povu. Maske produsaun mina no gás fó ona duni benefísiu finanseiru ba estadu Timor-Leste, setór ida ne’e nudár setór ne’ebé kapitál-intensivu la konsege lori benefísiu mai povu hanesan empregu ka seguransa ai-han. Hanesan ami deskreve iha leten, realidade katak setór mina no gás la bele resolve krize finanseiru iha kurtu prazu - maioria projetu iha eskala ki’ik, no kampu boot liu, Greater Sunrise, inserteza hela. Ba longu prazu, ita presiza tau prioridade ba dezenvolvimentu setór sustentável ne’ebé iha kapasidade atu hadi’ak povu nia moris.

Observasaun kona-ba transparénsia iha governasaun durante tinan 2022

Estadu Timor-Leste kuaze hatudu komitmentu lubuk ida atu oinsá promove prinsípiu Boa Governasaun, liu husi promove iha sira nia polítika ho liafuan kona-ba Transparénsia, Partisipasaun, Akontabilidade no kria mós kanál online barak hanesan fonte husi informasaun. Infelizmente, hirak ne’e la hatudu iha konsisténsia atu mantén públiku informadu no atualizadu ho sira nia informasaun no servisu.

Transparénsia iha prosesu governasaun mak xave ida ba demokrasia. Ho sistema governasaun ne’ebé nakloke, iha oportunidade barak liu ba públiku atu partisipa iha prosesu demokrátiku, no ba mídia atu promove kompriensaun no debate iha públiku ida ne’ebé informadu.

La’o Hamutuk tau matan ba Governu nia komitmentu ba transparénsia, liu husi hala’o monitorizasaun ba kanál online, no analiza ba rezultadu husi peskiza relevante. Artigu ida ne’e aprezenta rezultadu La’o Hamutuk nia analiza durante tinan 2022.

Ho nune’e hatudu katak liafuan no etapa ne’ebé sira halo seidauk nato’on atu justifika katak sira prátika duni Transparénsia ne’e ho di’ak.

Iha ona sasukat balun ne’ebé ita bele sukat ho nasaun seluk mak hanesan peskiza ne’ebé hala’o husi ajénsia internasionál ida hanaran Parseiru Orsamentu Internasionál (International Budget Partnership) liu husi peskiza ida hanaran Open Budget Survey. Survey ida ne’e sukat nivel transparénsia, partisipasaun husi públiku, no fiskalizasaun iha prosesu no Sistema orsamentál iha nasaun 120 inklui Timor-Leste. Periodu avaliasaun ba prosesu ne’e hala’o kada tinan rua, no avaliadór sira kompostu husi entidade ne’ebé relevante no independente. Maske survey ida ne’e la’o dezde 2006, Timor-Leste rasik hola parte iha survey ida ne’e hahú husi periodu 2015.

Iha nivel transparénsia, avaliadór sira sei sukat husi disponibilidade ba públiku no konteúdu husi dokumentu importante ualu orsamentu nian ne’ebé governu sira tenke públika tuir padraun internasionál. Espesífikamente, ezamina dokumentu no relatóriu sira ne’ebé publika iha online tuir tempu determinadu no fó sai informasaun ida ne’ebé komprensivu no detallu.

Rezultadu ba survey ikus mak fó sai iha Maiu 2022 ne’ebé hatudu mudansa di’ak iha sasukat balu kompara ba iha periodu survey sira liu ba. Bele haree mudansa hirak ne’e, iha gráfiku iha liman loos.

Jerálmente Timor-Leste nia transparénsia aumenta, no ida ne’e di’ak liu kompara ho médiu mundiál. Timor-Leste hatudu mudansa signifikante ba nivel transparénsia, liu husi publika ona livru Orsamentu ba Sidadaun (Citizens Budget) no Relatóriu Tinan ikus (Year-End Report).

Valór transparénsia Timor-Leste nian mak 52 husi 100, menus husi 61 hanesan valór mínimu atu promove debate iha públiku ida ne’ebé informadu, valór ne’e mós hetan pozisaun 48 ne’ebé inklui husi nasaun 120.

Kanál online mak hanesan meius ida atu fornese informasaun xave no dadus atuál ba públiku. Iha potensiál katak kanál online bele ajuda hametin transparénsia, no rezolve problema liga ho disponibilidade informasaun iha formatu hardcopy. Maibé, hanesan inisiativa hotu-hotu, benefísiu husi kanál online sei lakon bainhira ita falta atu halo manutensaun no atualizasaun ne’ebé loos. Kriasaun kanál online la’ós solusaun se la ho komitmentu forte atu promove no atualiza kanál refere ho di’ak. Durante tinan balun ne’e, Governu lansa ona inisiativa balun atu fornese dadus liu husi portal oi-oin, inklui Portal Transparénsia, Portal Aprovizionamentu, no Portal Rezultadu Governu hamutuk ho website ba Ministériu oi-oin.

Website Jornal da Repúblika importante tebes nudár fonte informasaun kona-ba lei sira ne’ebé vigora iha Timor Leste. Ami observa iha progresu di’ak ho publikasaun informasaun iha website ida ne’e, no atualizadu liu duké hanesan iha antes, ho edisaun foun sira barak ne’ebé mak públika ona durante kada semana ida nia laran ba sira nia publikasaun.

Maske website Jornal da Repúblika hatudu mudansa di’ak, ami observa katak website importante balun - inklui website Parlamentu Nasionál no website Ministériu Obras Públika durante ne’e hatudu tendénsia atu la fornese informasaun importante. Di’ak liu website Parlamentu nian bele inklui informasaun sira hanesan ezbosu lei sira, komisaun sira nia relatóriu, no ajenda sira tuir mai. Ho nune’e bele ajuda sosiedade sivíl no públiku atu sai ativu liu iha prosesu Governasaun no hatene desizaun ne’ebé sira nia reprezentante foti hela. Hanesan ho Ministériu Obras Públika, ne’ebé iha knaar importante atu realiza projetu ne’ebé importante ba povu Timor-Leste; website ida ne’e fó sai de’it kona-ba reuniaun ofisiál sira, maibé laiha liu kedas informasaun kona-ba konsultasaun públiku ka informasaun kona-ba projetu espesífiku haktuir ba sira nia mandatu.

Ami observa mós katak, website tomak Ministériu Finansas (MF) nian antes muda hotu durante tinan 2022. Website foun ne’e ladún kompletu no susar liu atu uza. Ligasaun hotu ba dokumentu sira iha website uluk taka ona no ligasaun barak husi website foun lakon ka la funsiona. Labele identifika informasaun foun, no website ne’e uza gráfiku no kódigu barak ne’ebé halo susar atu halo ligasaun ba webpage espesífiku ka atu download iha website ida. Mákina atu buka informasaun (search engines) hanesan Google labele ajuda hetan matéria sira husi webpage ida ne’e, no la bele buka dokumentu espesífiku iha website ne’e rasik. Ami husu ba MF kona-ba frakeza hirak ne’e no sira dehan katak dezeñu foun mak seidauk kompletu; ami hein versaun final bele rezolve frakeza sira no fornese informasaun kompletu ho maneira ne'ebé fasil atu uza.

Alende ne’e, TimorGAP nudár kompañia petrolíferu estadu nian ne’ebé simu ona subsídiu públiku ho valor kuaze to’o dolar biliaun ida, foin lalais ne’e implementa dezeñu foun ba ninia website. Maioria husi informasaun sira antes ne’e iha, agora lakon, no website foun ne’e disponivel iha lian ingles de’it. Informasaun kona-ba sira nia finansas, tenderizasaun, kontratu, konsultasaun públiku, no komunikasaun imprensa sira laiha hotu ona.

Website ofisiál seluk, inklui Primeiru Ministru nian no Autoridade Nasionál Petroleum no Minerais (ANPM) sei kontinua la’o, maibé dala ruma lori fulan balun atu atualiza no publika informasaun sira. ANPM nian laiha lingua Tetum; ne’e bele sai obstákulu ida ba kapasidade públiku no sosiedade sivíl atu asesu no uza informasaun.

Se ita haree ba portal sira ne’ebé Governu estabelese, klaru katak Portal Transparénsia no Portal Transparénsia Ajuda Externa mak reliável liu no atualizadu liu. Nune’e liu husi Portal Transparénsia Orsamental, públiku bele asesu ba informasaun kona-ba alokasaun no ezekusaun orsamentál tinan ne’e no iha pasadu. Portal Transparénsia Ajuda Externa fornese informasaun kona-ba apoiu husi parseiru dezenvolvimentu. Portal rua ne’e bele sai ezemplu di’ak ba portal sira seluk ne’ebé la funsiona.

Portal Aprovizionamentu iha objetivu atu fornese informasaun kona-ba sasán, servisu no obra ne'ebé Governu Timor-Leste hakarak atu sosa. Transparénsia kona-ba prosesu sosa ne’e importante atu prevene korrupsaun, maibé infelizmente portal nafatin la fornese informasaun kompletu no susar atu uza. Aleinde ne’e, Portal Rezultadu Governu iha objetivu atu hatudu informasaun kona-ba programa no projetu sira husi Governu Timor-Leste, hanesan deskrisaun, progresu finanseiru no fízika no imajen sira. Portal ida ne’e la atualiza dezde tinan sanulu ona. Ho nune’e, laiha mekanizmu ba públiku atu hatene rezultadu husi alokasaun orsamentál.

Agora dadaun ne’e, ajénsia balu mós kontente atu uza media sosiál atu hala’o komunikasaun ho públiku. Maske media sosiál hanesan Facebook mak meius efetivu atu liga ho ema barak ne’ebé uza meius ida ne’e iha Timor-Leste, maibé la signifika katak ida ne’e troka fali importánsia husi website ofisiál no la bele depende ka kompañia media sosiál atu fornese informasaun importante Estadu nian. Informasaun ne’ebé tau iha Facebook la’ós permanente, no labele hetan liu husi Search Engines (ez. Google).

Transparénsia hanesan aspetu importante ida husi prosesu demokrátiku. Iha artigu ida ne’e ami identifika ona oportunidade balun ba Governu Timor-Leste atu hametin transparénsia iha prosesu orsamentál no governasaun, inklui haktuir rekomendasaun husi OBS no hametin kualidade informasaun ne’ebé fornese online. Rezultadu husi OBS hatudu katak maske TL nia valór ba transparénsia iha mudansa di’ak, nafatin menus husi 61 hanesan valór mínimu atu promove debate iha públiku ida ne’ebé informadu.

Setór hotu-hotu iha sosiedade sivíl depende ba fornesimentu informasaun no dadus husi Governu. Mai ita hotu tau matan nafatin ba asuntu importante ida ne’e, no ezije standar transparénsia ne’ebé forte liu tan. Husi diskusaun iha leten, klaru katak ita presiza asegura katak informasaun ne’ebé Governu fornese mak relevante no atualizadu.

Observasaun kona-ba siklu orsamentál ba OJE 2023

Kada tinan, prosesu atu dezenvolve no aprova Orsamentu Jerál Estadu (OJE) oferese oportunidade atu diskute no deside ba nasaun nia prioridade, no oinsá mak ita bele uza ita nia rekursu ho maneira ne’ebé sustentável, justu, no ekitável. Siklu orsamentál ba tinan 2023 mak dala-uluk la’o no realiza bazeia ba Lei Enkuadramentu Orsamentál (LEO) ne’ebé promulga iha tinan 2022.

Haktuir prosesu ne’ebé estabelese husi LEO, Governu aprezenta Lei Opsaun Planu Prinsipál Sira iha fulan Maiu nudár baze ba orsamentu. La'o Hamutuk fahe karta aberta ba Deputadu/a hotu iha Parlamentu Nasional ho komentáriu ruma kona-ba proposta Lei Opsaun Planu Prinsipál Sira. Ami nota katak prosesu orsamentál foun ida ne’e, liu husi obrigasaun atu publika Lei Opsaun Planu Prinsipál Sira, kria oportunidade atu estabelese planu integradu no loke dalan atu hadi’ak implementasaun no impaktu husi Governu nia programa.

Ho etapa ida ne’e iha siklu orsamentál, PN no mós públiku bele diskute atividade no programa saida mak presiza sai prioridade iha OJE tuir mai. Ne’e importante hodi bele evita aloka osan ba programa ho maneira ne’ebé arbiru, ka la iha estratéjia. Infelizmente, proposta Lei ne’e sita medida 263, no versaun finál ne’ebé hetan aprovasaun husi PN iha medida 275. Ne’e signifika katak proposta lei ida ne’e falta atu identifika “Opsaun Prinsipál”, maibé inklui lista medida barak lahó indikasaun medida ka programa saida mak sei hetan prioridade ka alokasaun boot liu. Hein katak iha siklu orsamentál tuir mai, Governu bele tuir rekomendasaun husi LH no Komisaun C (Finansas Publika) iha Parlamentu Nasional hodi bele inklui informasaun kona-ba proposta alokasaun ba medida sira.

Se Governu konsege inklui informasaun xave ne’e, signifika katak PN no mós sosiedade sivíl bele sai ativu liu hala’o diskusaun kle’an kona-ba prioridade orsamentál. Konsidera katak ita nia Fundu Petrolíferu limitadu tebes, ita presiza uza ho kuidadu. Prosesu dezenvolve no diskute Lei 8/2022 - Opsaun Planu Prinsipál Sira bele sai meius ida atu asegura katak Governu uza Fundu Petróleu hodi fó benefísiu másimu ba povu.

Haktuir prosesu orsamentál ne’ebé estabelese iha LEO, Governu submete proposta OJE 2023 ba PN iha loron primeiru fulan Outubru. Hafoin submete, sira konsege publika iha Ministériu Finansas nia website, maibé maioria dokumentu la disponivel iha lian Tetum. Bainhira Governu uza liu lian Portugés, bele sai obstákulu ba públiku, sosiedade sivíl, no mós Deputadu/a PN atu komprende ho di’ak proposta OJE.

Molok diskute konteúdu no implikasaun husi proposta OJE 2023, presiza klarifika katak Governu nia métodu kontabilidade hamosu konfuzaun uitoan kona-ba valór despeza iha proposta orsamentu ida ne’e. Maske Governu dehan proposta OJE 2023 mak biliaun $3.16, realidade mak katak Fundu Kombatentes Libertasaun Nasionál (FCLN) gasta ona biliaun ida liu husi Orsamentu Retifikativu iha tinan 2022, no governu la aloka osan tan iha 2023. [Iha Dezembru 2022, Tribunal Reskursu kansela FCLN tanba viola Konstitutisaun.] No mós no perímetru proposta OJE 2023 inklui transferénsia internu iha sistema seguransa sosiál. Entaun proposta despeza loloos iha 2023 mak biliaun $1.92.

Hafoin debate iha plenária, Parlamentu (ho alterasaun ki'ik balun) iha loron 17 Novembru aprovadu iha finál global, ho votu a favór 42, kontra 21, no abstensaun 2. Infelizmente, debate iha Parlamentu falta atu diskute ho kle’an asuntu fundamentál sira, hanesan sustentabilidade finansas estadu.

Se ita haree OJE nia kompozisaun, klaru katak la iha mudansa ba Timor-Leste nia dependénsia ba Fundu Petrolíferu.

Hanesan gráfiku iha liman loos hatudu, levantamentu husi Fundu Petrolíferu (FP) kontribui diretamente 71% husi OJE. Levantamentu diretamente kompostu husi Rendimentu Sustentável Estimativu (RSE), no levantamentu liu husi RSE. RSE mak montante ne’ebé bele foti husi FP kada tinan, ho la fó impaktu boot ba sustentabilidade Fundu. Infelizmente, levantamentu liu husi RSE kontribui montante boot liu.

Ita bele haree katak empréstimu la mai direta husi FP, maibé sei selu fali iha futuru uza osan husi FP. Tuir mai, kontribuisaun husi ‘saldu’ ne’e mós mai husi FP, tanba transferénsia halo ona iha tinan pasadu. Ho nune’e bele haree katak kontribuisaun husi FP boot liu duké levantamentu direta. Se ita inklui mós kontribuisaun husi Fundu Petrolíferu iha pasadu no futuru, kontribuisaun Fundu nian mak hanesan 86% husi orsamentu tomak.

Governu seidauk identifika meius atu redús despeza ka hasa’e reseita doméstiku no prevene rai-naruk fiskál (precipício orçamental ka fiscal cliff). Nune’e bele konsidera hanesan ameasa sériu tebes ba povu no nasaun – informasaun kle’an liu kona-ba tópiku ida ne’e bele hetan iha leten.

La’o Hamutuk fó ona avizu kona-ba gravidade situasaun liga ho dependénsia ba Fundu Petrolíferu no realidade Fundu ida ne’e bele mamuk iha tinan sanulu nia laran. Governu rasik rekoñese se ita kontinua tuir tendénsia despeza agora, iha tinan 2034 sei presiza hamenus despeza ho montante 60%, no iha 2035 sei presiza hamenus ho montante 80%. Iha proposta OJE 2023, Governu sujere modelu ida atu adia senáriu perigozu iha leten. Modelu refere hatudu katak ita bele prolonga Fundu Petrolíferu to’o 2045, se konsege redús despeza kada tinan 3% to’o 2034.

Infelizmente, iha realidade Governu falta atu uza modelu sustentável ida ne’e nudár baze ba planu orsamentál. Maske sira rekoñese realidade rai-naruk fiskál, falta atu foti asaun no tuir proposta OJE 2023, despeza estadu (no levantamentu husi Fundu Petrolíferu) sei sa’e kada tinan to’o 2027, no laiha informasaun kona-ba tinan sira hafoin 2027.

Alokasaun ba setór sira ne’ebé liga diretamente ba dezenvolvimentu rekursu umanu (edukasaun, saúde, bee moos no agrikultura) nian iha de’it 17% (la inklui FCLN no transferénsia interna ba Seguransa Sosiál). Se ita konsidera OJE 2023 tomak (biliaun $3.16), 11% de'it aloka ba setór haat ne'e.

La’o Hamutuk apresia katak iha dokumentu ofisiál sira Governu rekoñese problema estruturál povu sira nian. Iha proposta OJE 2023, Governu implementa sistema atu hatudu (ho markadór ida) programa no atividade sira ne’ebé kontribui ba objetivu liga ho jéneru, labarik, nutrisaun, klima, no kadeia de valór. Maibé proposta OJE ba 2023, dala ida tan Timor-Leste la uza oportunidade atu redús problema sira. Hanesan ezemplu, maske agora iha “markadór” ba medida sira ne’ebé liga ho asuntu nutrisaun, ne’e la signifika katak Governu konsege promove solusaun ne’ebé integradu no efetivu. Realmente, ami la haree estratéjia atu aumenta produsaun iha produtu, foos, batar no ai-han sira seluk atu redús insufisiénsia ai-han no hadi'ak malnutrisaun.

Bainhira deside atu aloka osan ba atividade ka programa ruma, presiza konsidera nesesidade no benefísiu husi atividade refere, no mós kapasidade atu realiza. Iha pasadu, kapasidade Governu atu implementa programa limitadu, no ita presiza konsidera mós kondisaun real katak tinan oin membru Governu no tékniku barak bele sai tanba preokupadu ho atividade liga ho eleisaun jerál. La’o Hamutuk konkorda ho prinsípiu ne’ebé Governu hakerek iha livru OJE katak “kualidade programa importante liu duké kuantidade programa”. Infelizmente, prinsípiu ida ne’e la reflete iha realidade - proposta OJE kompostu husi medida 275 no la iha avaliasaun kona-ba kapasidade. Tuir mai, presiza konsidera benefísiu ba povu tomak - ami kontente atu haree katak Governu la tau planu despeza atu kontinua harii auto-estrada, refinaria no fábrika petrokimika nudár komponente Tasi Mane iha 2023. Maibé, iha nafatin planu atu gasta ba projetu LNG iha Beaçu no baze fornesimentu iha Suai.

Ami observa iha alokasaun ba atividade ida husi MPM atu halo “Estudu de Upstream e Midstream do Regime Greater Sunrise dos Recursos Petroliferos do Mar de Timor.” Konsidera katak seidauk iha evidénsia kona-ba kustu, benefísiu, no risku ho projetu refere, tenke fó prioridade ba estudu ne’e, ho maneira ne’ebé asegura prosesu sira hotu la’o ho independente, duké investe tan iha komponente ne’ebé temi iha leten.

Iha loron 17 Outubru, La'o Hamutuk fahe submisaun ida ba Deputadu/a sira hotu iha Parlamentu Nasional (PN), no fahe mós komunikadu imprensa ida, no realiza konferensia imprensa (foto iha liman karuk).

Mezmu nune’e, ami hare katak oportunidade atu realiza advokasia limitadu, tanba Komisaun sira iha PN la konsidera sosiedade sivíl hanesan parte importante atu ajuda PN ho informasaun, analiza no perspetiva povu nian. Sosiedade sivíl la hetan konvite atu fó testemuña iha audiénsia ne’ebé Komisaun C PN fasilita.

Konsidera situasaun grave ne’ebé ita nia nasaun hasoru hela, importante tebes katak Governu no PN bele foti desizaun tuir aspirasaun husi povu. Bainhira oportunidade ba sosiedade sivíl atu partisipa iha prosesu orsamentál limitadu, hatudu katak ukun-na’in sira sei la rona totálmente perspetiva real povu nian. La’o Hamutuk rasik loke diskusaun iha nivel munisípiu, liu husi realiza enkontru públiku iha munisípiu haat iha fulan Novembru, no mós ajuda mídia atu komprende asuntu importante sira liu husi komunikasaun no konferénsia imprensa, no partisipasaun iha diskusaun no panel balun iha televizaun.

Durante diskusaun proposta OJE, grupu balun inklui estudante sira hatudu sira nia frustrasaun ho alokasaun balun ne’ebé sira haree falta atu lori benefísiu ba povu, liu husi hala’o manifestasaun.

La’o Hamutuk apresia implementasaun sistema orsamentál foun, inklui Lei GOP no orsamentu bazeia ba programa. Ami haree katak Governu simu sujestaun balun, ezemplu iha proposta OJE 2023 uza sistema klasifikasaun internasionál hanesan La’o Hamutuk sujere iha momentu diskute proposta Lei Enkuadramentu Orsamentál.

Relatóriu husi Komisaun Parlamentu nian sira hato’o observasaun no rekomendasaun importante ne’ebé bele ajuda Governu atu hametin prosesu orsamentál. Relatóriu Komisaun C konkorda ho rekomendasaun balun husi La’o Hamutuk nia submisaun, inklui rekomendasaun atu inklui projesaun ba despeza ba tinan haat ba futuru, atu publika livru orsamentál sira iha lian Tetum no Ingles, no nesesidade atu tau matan ba kapasidade Governu nian atu implementa programa sira.

Bazeia ba ami nia observasaun no análize en jerál durante siklu orsamentál ida ne’e, ami nota katak:

Konsultasaun iha perfurasaun mina no gás iha Covalima

Timor-Leste foin hahú fali atu buka mina no gás iha area rai maran depois kuaze tinan barak iha tempu okupasaun Portugeza (maizumenus 1884). No seidauk iha estudu barak hodi hatudu atividade ne’e nian impaktu negativu no pozitivu iha aspetu sosiál, ambientál, saúde, ekonomia no kulturál. Iha tinan 2021, kompañia Timor Resources hahú ke’e ka halo perfurasaun ba mina no gás iha area rai maran hanesan prosesu ida atu hatene rezerva hosi posu refere ba komersiál ka la komersiál. Area sira ne’e, ho nia kontratu PSC TL-OT-17-08. Perfurasaun ne’e akontese iha Munisipiu Covalima no Timor Resources sei halo perfurasaun ba posu lima (Posu Karau/Feto Kamau’s, Liurai/Kumbili, Laisapi, Lafaek no Rai Ketan) ne’ebé konsege halo ona perfurasaun ba posu Feto Kamau’s, no Liurai no fatin ka posu ne’ebé La’o Hamutuk akompaña hodi hatene mekanizmu konsultasaun, sosializasaun, hatene nivel koñesimentu komunidade ba impaktu negativu no pozitivu no ikus liu atu hatene prosesu balun ne’ebé kompañia uza hodi foti no utiliza rai komunidade.

Kompañia Timor Resources ne’ebé hetan fiar hosi governu Timor-Leste halo konsorsiu ho kompañia nasionál Timor-Leste, TimorGAP, E.P. (konsorsiu 50%-50%). Timor Resources hetan lisensa iha tinan 2017 atu sai operadór ba PSC TL OT-17-08 iha Munisipiu Covalima, (Bloku A iha mapa hatudu), depois kompañia foin estabelese iha tinan 2016. Timor Resources hanesan kompañia foun iha asuntu mina no gás, kompañia ne’e rasik mai hosi Austrália no subsidiária hosi kompañia NEPEAN.

Ho konsiderasaun ba aspetu konsultasaun, sosializasaun, no nivel koñesimentu komunidade sira, La’o Hamutuk hanoin katak importante atu halo estudu ida, tanba foin primeira vez akontese perfurasaun iha rai maran dezde tinan 40 resin. Nune’e objetivu hosi LH nia peskiza ida ne’e atu antisipa area foun balun ne’ebé Governu kontinua fó lisensa ba kompañia sira hodi halo perfurasaun, atu bele halo prevensaun no antisipa labele fó impaktu maske ami hanoin katak atividade petróleu no gás hanesan atividade indústria ne’ebé la sustentável no fó risku boot ba ambientál, saúde no sosiál, nune’e tenke hapara no dezenvolve setór produtivu sira seluk.

Tanba sá La’o Hamutuk konsidera no presiza tau importánsia ba enkontru konsultasaun no sosializasaun antes halo perfurasaun ba mina no gás? Aleinde La’o Hamutuk preokupa efeitu husi atividade indústria mina no gás, hosi parte governu liu-liu Ministériu Petróleu no Minerais rasik rekoñese, indústria mina no gás hanesan indústria la’ós renovavel no sei la sustentável.^{[Nota 1]} Atividade perfurasaun iha rai maran fó risku boot ba ambiente, saúde públiku no iha aspetu sosiál, ekonomia no kulturál. Nune’e importante tebes bainhira iha enkontru hodi konsulta komunidade no halo sosializasaun ba efeitu pozitivu no negativu hosi indústria mina no gás, komunidade sira konfirmadu. Bazeia ba esperiénsia iha nasaun seluk, atividade petróleu no mina-rai, iha rai maran, dala ruma fó retornu finanseiru, maibé mós fó risku no esperansa mamuk ba komunidade. Timor-Leste, foin primeira vez halo perfurasaun ba mina no gás iha rai maran depois ukun rasik an. Importante tebes komunidade iha nivel rural no komunidade ne’ebé nia rai afeta, iha koñesimentu kona-ba impaktu negativu ba sira nia rai, ambientál, ai-horis, animal inklui mós ba sira nia moris loron-loron nian.

Evita risku negativu iha aspetu ambientál, sosiál no ekonomia hosi atividade perfurasaun mina no gás ba komunidade iha Covalima, iha Suku Debos, Matai no Camanasa importante, liu-liu ba komunidade Nain ba Rai ne’ebé oferese ona rai, ne’ebé iha durante sira nia moris nudár agrikultura. Bazeia ba sensu 2015, hatudu katak kuaze produtu hosi komunidade 67% iha Covalima, inklui Matai, Debos no Camanasa prefere liu hodi konsume duké ba fa’an. Tanba ne’e, enkontru konsultasaun no sosializasaun hanesan espasu importante no direitu fundamental ba komunidade sira atu esklaresidu ho informasaun. No ne’e prinsipiu ida hosi prosesu Avaliasaun ba Impaktu Ambientál (EIA) no komunidade tenke fó konsientimente ho atividade ne’ebé sei la’o iha sira nia fatin ka toos, no iha posibilidade bele rejeita karik la fó vantajen ba sira nia moris, tuir estandarte internasionál sira aplika FPIC (Free, Prior, Informed Consent). FPIC signifika konkordánsia ka konsientimente ne’ebé livre husi presaun, no bazeia ba informasaun kompletu no loloos, molok atividade komesa. Infelizmente, dala ruma prosesu ‘konsultasaun’ la funsiona ho di’ak, no falta atu hakbiit komunidade.

Difisil atu akumula hotu komunidade no sira ne’ebé besik area perfurasaun partisipa iha konsultasaun no sosializasaun maibé, importante atu asegura komunidade iha informasaun apropriadu atu labele hakfodak no sente ignorante iha prosesu dezenvolvimentu. Sosializasaun no konsultasaun iha nivel suku hanesan Matai hetan partisipasaun hamutuk 135 no iha Suku Camanasa hamutuk ema na’in 97. Separasaun komunidade iha prosesu konsultasaun no sosializasaun importante, atu komunidade vulneravel liu (ema ho defisiénsia no kbiit laek sira), bele sente hola parte iha prosesu dezenvolvimentu, no la’ós envolve sira iha prosesu eventual. Infelizmente la akontese, ekipa organizadór hetan orientasaun atu konvida de’it no hetan orientasaun atu identifika komunidade ne’ebé nia rai afeta. Maske iha dokumentu Planu Jestaun Ambientál (EMP) no mós Avaliasaun Impaktu Ambientál (EIA) nia objetivu ida oinsá atu sosializa atividade nia impaktu pozitivu no negativu ba iha sosiedade no dokumentu refere mós ko’alia atu oinsá kria jestaun, prepara kondisaun no mitigasaun.

Separasaun partisipante no aproximasaun ho umanidade, sei enkoraja populasaun vulneravel sira hodi barani hateten sai, posibilidade balun karik sira deskorda ho indústria refere, maibé iha pratika komunidade vulneravel sira maske hela besik area posu Feto Kamau’s maibé la hetan konvida. Iha enkontru nivel munisipiu rasik, envolve mós hosi parte seguransa no forsa armada sira, nune’e komunidade vulneravel balun ne’ebé konsege hetan oportunidade hodi partisipa, laiha korajen atu dehan lae ba atividade refere. Ezemplu sosializasaun Kampu Mina no gás Pualaka (Natarbora), Komandante Polísia hosi Munisipiu tolu, Viqueque, Manatuto no Manufahi, iha tendénsia fó presaun ba komunidade ne’ebé partisipa atu konkorda no iha sira nia esteitmentu hateten katak, “Husu ba joven 1999 atu prontu koopera no lalika halo impedimentu, hakarak ka lakohi, dezenvolvimentu tenke la’o.”^{[Nota 2]}

Iha Covalima, na’in ba rai balun, ne’ebé La’o Hamutuk hasoru, laiha koñesimentu ba enkontru sosializasaun, hatene bainhira kompañia halo kontratu hodi foti no utiliza nia rai. Komunidade balun besik area perfurasaun, laiha koñesimentu, no balun mós la partisipa iha tempu ne’ebá tanba informasaun laiha, sira espresa nia sentimentu hodi hateten “Ita ema ki’ik no beik ne’e, ema la konvida ita”^{[Nota 3]}no sira mós informa katak ema boot sira mai dehan “Projetu mai hosi nasionál no projetu ne’e governu nian”, hodi halo komunidade sira mós laiha korajen atu ko’alia hasoru no dehan lae. Nune’e komunidade la hakfodak no sente bain-bain ona, tanba dala barak la envolve sira no nia lian ema la rona iha prosesu dezenvolvimentu. Ate deskonfia komunidade nia animal balun (manu) mate tanba depois halo perfurasaun no well kick akontese, animal sira konsume mina fo’er ne’ebé nakfakar sai, maibé lakohi informa ba kompañia no autoridade lokál ho razaun, ema sei la fiar.

Alende sosializasaun no konsultasaun iha suku, ekipa komisaun avaliasaun impaktu ambientál ba projetu perfurasaun petróleu iha Covalima, distribui mós broxura ba komunidade iha area besik perfurasaun maibé, la halo esplikasaun no fahe de’it tuir estrada no haruka komunidade akompaña de’it iha radio. Broxura ne’e orienta de’it hodi komunidade akompaña radio Cova Taroman kona-ba papél no servisu hosi komisaun avaliasaun impaktu ambientál no tanba sá tenke halo konsultasaun públiku, no broxura ne’e mensiona Lei sobre lisensa ambientál (Dekretu-Lei 5/2011), maibé laiha esplikasaun ruma, inklui mensiona EMP no EIA maibé laiha esplikasaun. Maske tuir Dekretu-Lei 5/2011, Governu tenke fornese informasaun kle’an iha linguajen ofisiál (Artigu 49, DL 26/2012), no iha mós obrigasaun atu fornese rezumu EIA ho linguajen ne’ebé fasil liu atu komprende.

Atu komunidade laiha duvida no ta’uk bainhira perfurasaun la’o tanba foin akontese, importante atu halo rezumu ka maneira seluk balun ne’ebé komunidade sira komprende tuir kontextu (kapasidade) komunidade bazeia ba dokumentu EMP no mós EIA hateten. Nune’e importante iha sosializasaun no konsultasaun hetan partisipasaun. Komunidade balun ne’ebé iha koñesimentu sente preokupa ho atividade refere, nune’e husu tenke asegura nia risku sira, no garantia bele fó retornu ekonomia ba komunidade Covalima, liu-liu area afetadu hosi projetu.

Iha dokumentu EMP rekoñese projetu perfurasaun ba mina no gás iha Suai, posibilidade sei fó impaktu negativu ba ambiente, no projetu refere kategoriza ba “A” tuir Dekretu-Lei 5/2011. Signifika broxura ne’ebé distribui no enkontru sosializasaun no konsultasaun tenke iha atensaun atu informasaun sobre efeitu ba rai, ambiente, inklui mós posibilidade balun ba efeitu sosiál no saúde, komunidade sira esklaresidu. Iha rai balun mós hatudu atividade perfurasaun mina no gás iha area rai maran, sei fó impaktu ba ambiente no sosiál. Iha enkontru refere, komunidade sira preokupa loos no imajina akontesimentu iha rai Indonézia (Lumpur Lapindo), mina nakfakar sai no okupa kuaze suku 16 hodi destroi uma, plantasaun, eskola, komunidade rihun resin tenke muda nia hela fatin no fó mós impaktu ba saúde, atu labele akontese iha Covalima, no komunidade labele hakfodak bainhira atividade ne’e la’o ona.

Peskiza ne’e hatudu, komunidade sira balun laiha koñesimentu báziku liu ba mina no gás, inklui laiha informasaun ba maki barullu antes hahú halo perfurasaun, inklui is mina dois bainhira well kick/mina nakfakar akontese. Informasaun balun ba komunidade mós la sufisiente no la nato’on ba sira ne’ebé hela besik area perfurasaun, liu-liu Posu Feto Kamau’s depois perfurasaun hahú to’o husik posu ho temporariamente maibé komunikasaun ladún la’o ho efetivu.

Bazeia ba peskiza ne’ebé iha, hatudu katak, atividade konsultasaun no sosializasaun seidauk la’o ho másimu, maske iha pratika kompañia no ANPM esforsu hodi tuir regra legál sira. Komunidade hela besik area perfurasaun laiha koñesimentu no la hola parte iha enkontru sira. Ami hanoin katak importante atu iha duni seriedade hosi kompañia no ANPM rasik bainhira organiza no iha tempu enkontru.

Importánsia hosi konsultasaun parte ida hodi husu opiniaun komunidade kona-ba konkorda ka la konkorda ho implementasaun projetu, maibé iha tendénsia konsultasaun parte ida hodi kumpre rekezitu legál de’it. Envolvimentu parte seguransa no forsa armada iha enkontru konsultasaun no sosializasaun, indiretamente fó hela presaun atu tenke kumpre no tuir kompañia no governu nia interese.

Dalan ba soberania ai-han iha Timor-Leste

Timor-Leste iha poténsia rekursu naturais ne’ebé oin-oin hodi utiliza ba nesesidade moris povu nian mak hanesan rekursu husi tasi no natureza. Husi rekursu sira ne’e, bele atinje soberania ai-han, katak bele halo produsaun ho ninia rekursu rasik hodi prodús ai-han nato’on ba konsumu iha rai laran, hodi nune’e la depende ba nasaun seluk. Ita iha rai agrikultura ne’ebé maioria sei orgánika, maioria populasaun sei halo produsaun ai-han, no populasaun ne’ebé maioria ho idade serbisu.

Foin lalais ne’e, durante pandemia Covid-19 no funu iha Ukraine, ita observa oinsá mak merkadu lokál bele hetan impaktu husi xoke iha ekonomia globál nian no mudansa iha produsaun ka disponibilidade ai-han iha fatin ne’ebé dook husi Timor-Leste. Inflasaun ba presu ai-han no bebida naun-alkoholika, entre Outubru 2020 to Outubru 2022 mak 15.1% (DGE 2021a no DGE 2022). Ita la bele kontrola presu internasionál ne’ebé tun-sai. Timor-Leste sai vulneravel liu ba xoke mundiál sira tanba dependénsia ba importasaun sei aas nafatin. Kada tinan, Timor-Leste importa ai-han ho valór maizumenus tokon $150. Iha tinan 2021, Timor-Leste importa produtu naan nian ho valór liu tokon $29 no modo, ai-fuan ho valór liu husi tokon $5 (DGE 2021b). Liu husi hamenus dependénsia ba importasaun, soberania ai-han de’it mak bele ajuda proteje povu husi xoke sira husi merkadu mundiál no krize global.

Rezultadu husi Índise Hamlaha Globál (Global Hunger Index) 2022 hatudu katak entre 2017 to 2021 (husi nasaun 116 ne’ebé iha dadus) iha nasaun rua de’it mak iha nivel stunting (ra’es badak) ne’ebé grave liu duke Timor-Leste. Nivel hamlaha ladún grave kompara ho krize stunting - ne’e sujere katak problema iha Timor-Leste la’ós disponibilidade ai-han de’it (maioria ema hetan montante ai-han ne’ebé nato’on atu sustenta an). Maibé kualidade nutrisaun mak problema. Kualidade nutrisaun hetan impaktu husi inklui diversidade no presu ai-han ne’ebé disponivel, no infrastrutura bee moos no saneamentu ne’ebé menus.

Soberania ai-han bele ajuda proteje povu husi krize ekonomia, inklui krize husi mudansa klimátika no rai-naruk fiskál ne’ebé Governu estimativa katak sei hasoru iha tinan 2034 (bele lee iha artigu kona-ba Rai-Naruk Fiskál iha leten).

Poténsia rekursu naturais sira ne’ebé nota iha introdusaun fó oportunidade boot hodi realiza soberania ai-han no hadi’ak povu nia moris no ekonomia. Maibé, poténsia no rekursu hirak ne’e sei fó rezultadu másimu, bainhira ita fó duni prioridade atu dezenvolve.

Dadus tuir mai, atu hatudu ita nia area potensiál, area kultivu, produtividade no produsaun ai-han to iha tinan 2021 la iha aumentu ne’ebé signifikativu.

Produtu	Area potensiál (ha)	Area kultivu (ha)	Area koleta (ha)	Produtividade (ton/ha)	Produsaun (ton)
Batar	215,747	37,281	35,496	2.4	85,626
Hare	80,578	30,528	29,154	4.1	120,135
Fonte: MAP, 2022

Númeru sira iha tabela kona-ba produsaun batar no hare, hatudu katak maske iha area potensiál boot atu hasa’e produsaun ai-han iha rai-laran, maibé seidauk utiliza no dezenvolve didi’ak inklui investe maximal ba hasa’e produsaun ai-han tantu ba batar, hare inklui produtu ai-han sira seluk. Iha tinan 2021, Timor-Leste importa ho valór kuaze tokon $54 (DGE 2021b).

Maske iha area poténsia ne’ebé boot maibé area kultivu no area koleta ki’ik liu. Tuir ami nia observasaun, liu ona dékada ida, setór agrikultura la hatudu progresu signifikativu iha produsaun ai-han, tanba produsaun no produtividade la aumenta tantu ba produtu batar no hare, inklui produtu sira seluk ne’ebé la iha dadus serteza, hanesan fehuk, talas, ai-farina, hudi, fore, koto nsst.

Artigu ida nee, La’o Hamutuk mós hakarak partilla dadus kona-ba produsaun batar no hare inklui halo komparasaun produsaun durante tinan 10 ba kotuk. Iha tabela tuir mai ita bele kompara no observa katak MAP halo ona atividade barak durante ne’e, maibé iha númeru seidauk hatudu dezenvolvimentu produsaun maximal. Ita ba haree komparasaun produsaun batar no hare husi tinan 2009 to’o 2021.

Produsaun	2009	2013	2019	2021
Batar (ton)	134,715	100,789	75,690	85,626
Hare (ton)	120,775	87,332	79,703	120,135
Fonte: MAP, 2022

Dadus produsaun durante tinan 10 ba kotuk la hatudu aumentu - realidade produsaun tun. Entaun produsaun rai laran la too atu substitui importasaun foos durante dékada ida nia laran. Maske tinan-tinan Governu no parseiru dezenvolvimentu sira gasta ona osan tokon ba tokon atu promove setór agrikultura inklui investimentu boot ba harii irrigasaun, barrajen, sosa no distribui tratór gratuita, fasilita fini, fertilizante (pupuk) la’ós orgánika no orgánika inklui instala estensionista sira iha suku no seluk tan, maibé dezempeñu setór agrikultura tinan ba tinan la hatudu rezultadu másimu.

Dadus governu nian mós hatudu katak problema kiak, in-seguransa ai-han no malnutrisaun sei aas liu iha area rural sira ne’ebé maioria povu moris hanesan agrikultór. Realidade sira ne’e, hatudu katak ita nia setór agrikultura seidauk dezenvolve loloos.

Tuir La’o Hamutuk nia hanoin no sujestaun, estratéjia atu responde ba problema hirak nee, ida mak estadu tenke tau prioridade no rekursu orsamentu boot liu ba setór produtivu no estabelese planu ne’ebé realistíku hodi diversifika ka prodús ai-han oin-oin hodi la depende de’it ba produsaun foos no batar. Tuir mai mak promove prosesamentu ai-han através husi indústria ki’ik no médiu sira, hodi transforma produtu agríkola sira bainhira tempu produsaun barak. Hametin agrikultura familiar nudár investimentu longu prazu ba hasa’e produsaun, fasilita treinamentu no kapasitasaun ba foin sa’e sira (feto no mane), agrikultór, grupu kreativu sira atu kontinua haboot produsaun.

Governu tenke muda aproximasaun emerjénsia (ajuda ai-han) ba aproximasaun hadi’ak rendimentu uma kain (livelihoods) atu fó kbiit ba povu hodi independente liu prodús ai-han ba sira nia nesesidade no tuir sira nia preferénsia produsaun hodi responde ba sira nia nesesidade báziku sira. Tuir relatóriu Fill the Nutrient Gap Timor-Leste 2019, katak atu hetan ai-han nutritivu durante fulan ida nia laran, komunidade tenke gastu orsamentu hamutuk $211 atu hetan ai-han ne’ebé ho nutrisaun di’ak. Tanba ne’e, ajuda ai-han temporáriu sei la resolve problema malnutrisaun no in-seguransa ai-han, tenke kria kondisaun no kampu servisu atu komunidade asesu ba servisu, hetan rendimentu no bele kompleta sira nia nesesidade uma kain inklui hadi’ak sira nia nutrisaun ba longu prazu.

Tenke fó prioridade mós produtu sira husi tasi, pekuária no produtu frutas atu iha balansu ba konsumu. Governu bele ajuda monitorizasaun progresu liu husi fahe estatístika kona-ba produsaun naan, ikan, modo no ai fuan. Ita la bele avalia progresu hasoru soberania ai-han bazeia ba produsaun hare no foos de’it.

Governu atuál esforsu kria ona lei no dekretu lei balun nudár kondisaun atu dudu kreximentu iha setór produsaun ai-han hodi estimula rendimentu ekonomia. Ezemplu iha ona Lei Nu.6/2022 no Dekretu Lei Nu.33/2022 ne’ebé haboot Kréditu Suave ba estimula produsaun lokál no Dekretu Lei Nu.36/2022 ne’ebé obriga kontratu públiku hotu-hotu tenke hola mínimu 75% produtu lokál se bainhira disponivel.

Kria polítika no lei hirak ne’e nudár oportunidade no mós dezafiu atu dudu kreximentu produsaun ai-han iha rai laran, tanba kria polítika no lei de’it seidauk nato’on atu hasa’e produsaun no hametin produtu lokál iha rai laran. Presiza konsidera mós kriasaun planu di’ak no realistíku, alokasaun rekursu orsamentál, no koordenasaun interministeriál inklui motiva setór privadu atu mós partisipa. Fatór tuir mai mak ema no rekursu umanu nudár xave determinante iha produtividade no produsaun, tanba presiza iha kapasidade atu utiliza fasilidade, ekipamentu no teknolojia atu ajuda promove di’ak liu tan agrikultura.

Timor-Leste hasoru dezafiu boot liga ho agrikultura, ne’ebé fó impaktu ba kuaze kada aspetu povu nia moris. Foti asaun efetivu atu hametin setór ida ne’e bele kontribui mós ba rezolusaun krize nutrisaun, dezempregu, no kiak. Konsidera ita nia situasaun atuál liga ho finansas estadu, setór agrikultura buat ida ne’ebé la bele ignora tanba impaktu negativu husi ninia frakeza sei sai maka’as liu ba iha futuru, bainhira ita nia Fundu Petrolíferu mamuk ona. Sujestaun iha leten ami hein bele fasilita diskusaun kle’an liu kona-ba oinsá mak ita bele atinje soberania ai-han iha Timor-Leste.

Saida mak ita aprende husi eleisaun 2022?

Timor-Leste iha nia istória rasik ba prosesu ukun rasik, liu husi konsulta popular 1999 povu Timor deside nian pozisaun polítiku liu husi eleisaun ba ukun rasik-an. Bainhira ukun rasik-an Timor-Leste hahú nia eleisaun kada tinan 5 atu hili Prezidente no Parlamentár tuir Konstituisaun RDTL artigu 65 no Lei eleisaun sira. Hahú 2021 to’o 2022, eskala prosesu eleitorál boot ba beibeik, husi 451,796 iha tempu konsulta populár iha tinan 1999 to’o 859,925 eleitor iha eleisaun Prezidente 2022.

Timor-Leste nasaun ki’ik ho populasaun uitoan maibé kandidatu no partidu ne’ebé kompete iha eleisaun kada tinan 5 aumenta ba beibeik. Hanesan ita hotu hatene iha tinan ne’e iha hili ona Prezidente da Repúblika, eleisaun ne’ebé ho nia dezafiu oi-oin, hanesan kalamidade surtu Covid-19 hamosu difikuldade bainhira atu tau ema hamutuk iha fatin ida no haktuir distánsia ne’ebé protokolu saúde hatuur.

Maske TL dala barak ona organiza no halo eleisaun maibé frakeza sira iha terrenu sei kontinua akontese. Durante hala’o observasaun ba eleisaun Prezidensiál iha tinan 2022, La’o Hamutuk observa frakeza tuir mai:

Ami observa mós falta transparénsia, tanba lejizlasaun nia frakeza la inklui auzénsia husi definisaun momoos kona-ba doasaun, laiha rekezitu sira husi divulgasaun identidade husi doadór sira no fonte sira seluk husi rendimentu finanseiru, no laiha mós rekezitu husi notifikasaun doasaun liu husi sasán sira. Laiha limite másimu husi doadór sira-nia kontribuisaun no mós ba kampaña nia despeza sira, ne’e fó sai rezultadu la hanesan husi konkursu entre konkorrente sira ne’ebé iha rekursu di’ak no la di’ak. Iha sorin seluk, CNE laiha autoridade hodi fó sansaun atu haforsa kampaña sira nia relatóriu finansiamentu.

Eleisaun nudár oportunidade hodi ejerse ita nia direitu polítika hanesan sidadaun iha estadu de direitu demokrátiku. Prosesu eleisaun atu la’o di’ak liu presiza ema hotu-hotu nia kontribuisaun. Hodi asegura eleisaun la’o di’ak liu iha futuru, no hamenus frakeza sira ne’ebé nota iha leten, iha meius oi-oin ne’ebé mak órgaun kompetente sira, partidu polítiku, no mídia bele hala’o.

Hafoin halo observasaun ba eleisaun Prezidensiál iha tinan 2022, La’o Hamutuk submete relatóriu ida ba CNE no STAE. Relatóriu ida ne’e inklui rekomendasaun espesífiku atu ajuda grupu refere atu hametin prosesu ba futuru.

Rona ami nia Radio Igualdade

Bele hetan no rona ami-nia programa Radio Igualdade ne’ebé iha oras ida inklui informasaun no komentáriu ho lian tetun husi La’o Hamutuk nia staf no peritu sira seluk kona-ba asuntu oioin.

Rona ami iha Radio Komunidade iha: Radio Mauloko Maubisse, Radio Matebian Baucau, Radio Komunidade Maliana, Radio Atoni Lifau Oecussi, Radio Voxpopuli Lospalos, Radio Povu Viqueque, Radio Cova Taroman – Suai, no Radio Boaventura Same.

La’o Hamutuk sempre simu ema nia ideia kona-ba programa radio sira-ne’e no mós prontu atu kolabora ho Radio Komunidade seluk hodi habelar informasaun ne’e luan tan.

Bele mós rona programa hotu iha ami nia website. Programa ne’ebé ami produs iha tinan 2022 haree ba topiku oi-oin, inklui: mudansa klimátika, programa Cesta Bázika, no direitus umanu.

Sé mak La'o Hamutuk?

Staff La’o Hamutuk: Bree Ahrens, Martinha Fernandes, Mariano Ferreira, Eliziaria Febe Gomes, Jonathan Gonsalves, Celestino Gusmão, Ricarda Martins, Charles Scheiner, Elizabeth da Silva, Marta da Silva, Francisco Soares

Órgaun Konsellu: Selma Hayati, Inês Martins, Pamela Sexton, Oscar da Silva, Santina Soares, Andrew da Sousa, Maxi Tahu

Iha kraik:

Tanba sá ita hasoru hela rai-naruk fiskál?