Informasaun kona-ba Tratadu entre Australia no Timor-Leste ba CMATS(Certain Maritime Arrangements in the Timor Sea/
Aranjamentu Maritima balu iha Tasi Timor)

Konteúdu pájina ida ne’e

• Antesedénsia

• Eventu iha 2013

• Timor-Leste buka arbitrajen atu invalida CMATS

• Espionajen, protesta no hahu audiensia

• Eventu iha 2014

• Komentáriu

• Governu Australian nia deklarasaun no relatóriu

• Dokumentu legal no dokumentu sira seluk

Iha 28 Fevereiru, jornál The Australian publika opiniaun ida ne’ebé hakerek hosi Tom Clarke, ema ida ne’ebé organiza Kampaña ba Justisa ba Tasi Timor (TSJC) iha 2005, ho títulu Australia holding back East Timor- Australia dudu Timor-Leste ba kotuk. Clarke konklui “Buat ida de’it mak taka hela Timor-Leste ho ba buat ne’ebé loloos legalmente sai sira nia direitu mak Governu Australia. Australia tenke hakotu sira nia kaan-teen no oferese atu halo negosiasaun ho vontade di’ak ho Timor-Leste. Fronteira maritima ida ne’ebé permanente, sei fornese liu tan serteza ekonómiku ba nasaun rua ne’e no ba kompañia sira hodi buka atu esploita rekursu gas no petróleu. Maibé, buat importante liu mak, deside fronteira maritima tuir lei internasionál mak buat loloos ne’ebé mak tenke halo. Nee sei halo kompleta no determina luta naruk Timor oan sira nian hodi sai nasaun ida ne’ebé independente no soberania ho fronteira maritima ne’ebé kompletu.”

Editorial prinsipal iha revista Petroleum Economist iha Marsu 2013, ho nia títulu Going for Broke – Iha dalan atu ba kiak – diskute oinsá reseita petróleu falla atu hadi’ak ita nia povu nia moris. Publikasaun ne’e husu Primeiru Ministru Xanana Gusmão atu “sai pragmatiku [ba projetu Tasi Mane] no foka liu hodi oinsá asegura Sunrise ne’e dezenvolve no nia reseita sira ne’e bele uza atu hadi’ak dezenvolvimentu ekonomia naun petrolíferu ne’ebé sustentável no ba tempu naruk. Karik dezenvolvimentu naun petrolíferu ne’e labele akontese, difisil atu evita konkluzaun ida katak estadu failladu hein hela Timor-Leste.”

Iha 28 Marsu, The Global Mail publika artigu komprensivu ida hosi Hamish McDonald kona-ba istória petróleu entre Timor-Leste no Australia, inklui Sunrise: It’s Tiny, Poor, And Very Possibly Not Going To Take It Anymore – Nia Ki’ik, Kiak, No Posivel Liu Atu La Ba Hodi Foti Tan.

Timor-Leste buka arbitrajen atu invalida CMATS

Iha 23 Abril, Governu Timor-Leste formalmente notifika ba Australia katak nia ezerse nia direitu ba arbitrajen tuir Anexu B Tratadu Tasi Timor, hodi hateten katak CMATS la válid tanba Australia hala’o espionajen iha 2004 no la halo negosiasaun ba tratadu ho vontade di’ak. Maski notifikasaun ne’e la fó ba públiku, Timor-Leste akuza Australia tau aparellu hodi grava otél sira iha Australia no eskritóriu Governu Dili nian bainhira negosiador Timor-Leste diskute hela sira nia estratéjia. Timor-Leste hili eis juis Tribunal Supremu Inglaterra nian Lawrence Collins nudár sira nia reprezentante iha painél arbitrajen ba ema na’in tolu nian. Australia sei hili sira nian, reprezentante na’in rua ne’e sei hili panelista terseiru nian. Nomeasaun ba painél sei han fulan neen. No arbitrador sira sei iha fulan neen atu fó sai sira nia desizaun bazeia ba votu maioria. Governu Australia no media (mós ho audio) fó sai notifikasaun iha 3 Maiu. Iha 6 Maiu, Ministru Petróleu Timor-Leste Alfredo Pires (mós iha audio) esplika nia razaun, no jornál negosiante sira fó sai reasaun kompañia sira nian.

Advogadu Australianu Padre Frank Brennan, ema ida ne’ebé suporta kleur Timor-Leste, vizita Dili no hakerek Time to draw the line between Australia and Timor-Leste – Tempu ona atu marka liña entre Australia no Timor-Leste -- iha 13 Maiu. Kontroversu mosu iha fatin oi-oin hanesan Interfax Natural Gas Daily(servisu notísia Rúsia nian), Clayton Utz insights, The Strategist (ASPI) no Vancouver Sun iha Canada. Iha 23 Maiu, Radio ABC halo entrevista ba Ministru Petróleu Timor-Leste Alfredo Pires no Ministru Rekursu Australia nian Gary Gray. Iha 26 Maiu, Ministru Alfredo Pires informa ba media lokál katak Timor-Leste prepara hela atu lori Australia ba tribunal internasionál ida iha Abril 2014, bainhira prosesu arbitrajen ba CMATS finaliza ona. Iha loron balu tuir mai, Primeiru Ministru Xanana Gusmão klarifika katak Timor-Leste sei hein resposta hosi Australia molok lori asaun ba tribunal.

Iha Maiu 29, The Australian publika Aussie spies accused of bugging Timor cabinet – Intelijénsia Australianu sira hetan akuza katak sira tau aparellu gravasaun nian iha gabinete --Timor ho informasaun adisionál kona-ba reklamasaun kontra Australia, ho komentáriu hosi Ministru Petróleu Timor-Leste Alfredo Pires, Timor-Leste nia advogadu Bernard Collaery, eis Ministru Negósiu Estranjeiru Alexander Downer no sira seluk tan. ABC News fó sai katak Ministru Negósiu Estranjeiru Australia nian Bob Carr insiste katak nasaun rua ne’e nudár belun di’ak, maski nia lakohi atu fó komentáriu kona-ba espesífiku iha kazu ne’e. Loron tuir mai, Radio Australia fó sai komentáriu foun liu tan hosi parte rua ne’e.

Iha 4 Juñu, Governu Timor-Leste fó sai deklarasaun ida katak “relasaun tomak entre nasaun rua ne’e la’o no sei kontinua ba unidade ida ne’ebé kle’an, hakbelun ba malu, no respeita ba malu.” Iha loron tuir mai, ofisiais Australia nian sira konfirma katak sira seidauk hatán ba Timor-Leste nia pedidu ba arbitrasaun. Media sira kontinua atu tuir kontroversu, ho artigu iha The Economist no Australian Financial Review, no mós barak iha Independente no jornál seluk Timor-Leste nian. Iha 19 Juñu, Australia responde, no hili profesór direitu ida hosi Michael Reisman, Michael Reisman nudár sira nia arbitrador, (hare relatóriu iha Channel News Asia). Troka Primeiru Ministru foun iha semana balu oin mai sei la signifikante muda polítika fronteira maritima Australia nian, no eleisaun iha Setembru hare ba sei la fó mudansa di’ak. Iha 5 Jullu, portavós opozisaun Australia nian Julie Bishop vizita Timor-Leste, hatudu ninia ignoransia kona-ba tratadu CMATS.

Iha Outubru, membru painél hosi Timor-Leste no Australia hili Tullio Treves, ne’ebé moris iha Arjentina, eis juis iha Tribunal Internasionál ba Lei Tasi nian no Profesór iha Universidade Milan, Italia nudár membru terseiru ba iha painél arbitrajen nian, no nia sei sai Prezidente ba painél ne’e. Australia aseita selesaun no proposta regra ba prosedimentu nian. Jurista na’in tolu ne’ebé diferente ne’e iha fulan neen hahú hosi sira nia hasoru malu ba dala uluk nian hodi fó sai sira nia desizaun ida, ne’ebé ekspeta atu akontese iha segundu trimestral 2014 nian. Painél rona ona argumentu primeiru iha 5 Dezembru iha Den Hague, Olanda. Hakat ida iha okos ne’e atu hetan eventu tuir mai kona-ba prosesu ida ne’e.

Molok eleisaun Australia nian, nia Parlamentu hahú inkéritu ida (bele hetan submisaun 77 iha ne’e) kona-ba relasaun Australia nian ho Timor-Leste. Submisaun hosi La'o Hamutuk, Kampaña ba Justisa ba Tasi Timor (TSJC), Robert King, Damien Kingsbury no sira seluk husu Australia atu respeita soberania Timor-Leste kona-ba fronteira maritima. Hanoin diferente hato’o hosi Prokurador Jerál Australia no Ministeriu Rekursu, Don Rothwell hosi ANU, no kompañia petróleu na’in lima. Iha audiensia iha 21 Maiu, Membru Parlamentu Australia nian no testemuña ne’ebé sira hili ona troka idea ba malu no la fó informasaun loloos kona-ba asuntu fronteira, maibé perspetiva di’ak tebes hato’o hosi Joanne Wallis hosi ANU iha audiensia iha loron tuir mai: “...to’o fronteira maritima entre Timor-Leste no Australia deside ona no esploitasaun rekursu iha Tasi Timor ne’e iha konkordansia tuir dalan satisfasaun ne’ebé fó benefísiu ba malu, entaun sei iha relasaun ida ne’ebé nafatin la’o ba bei-beik....[D]alan di’ak liu ba Australia atu hadi’a sira nia relasaun ho Timor-Leste mak atu tuir lei internasionál ne’ebé tau ona iha Konvensaun ONU nian ba Lei Tasi nian no atu refere ba kestaun fronteira maritima ba tribunal internasionál ida, prefere liu ba Tribunal Internasionál ba Justisa. Komité labele haluha katak esploitasaun rekursu iha Tasi Timor ne’e buat sentrál tebes ba Governu Timor-Leste nia planu estratéjiku dezenvolvimentu, ka komité labele haluha kona-ba nivel hirus hosi Timor-Leste nian hodi preokupa ba aproximasaun Australia nian ba rekursu hirak ne’e. Australia ne’e nasaun ida ne’ebé riku liu ho estandarte moris ne’ebé as iha mundu. Timor-Leste nafatin sai nasaun ne’ebé kiak liu iha mundu ho 37% nia populasaun sei moris iha liña pobreza global. Ha’u husu ba komisaun atu konsidera hodi hatán nia obrigasaun legal no moral ba Timor-Leste bainhira ita-boot sira prepara ita-boot sira nia relatóriu. Bainhira de’it atu halo ida ne’e, nune’e ita sei iha relasaun ida ne’ebé livre, justu no hakbelun loloos nian ho ita nia viziñu ida ne’ebé besik liu ita.” Iha audiensia seluk iha 24 Juñu, Canberra Friends of Dili koko atu fó sai asuntu fronteira, maibé Membru Parlamentu sira la interese. Ho mudansa iha Governu Australia nian, inkéritu ne’e liu prazu ona, maibé posivel atu bele halo tan.

Oilex, kompañia esplorasaun hosi Australia ne’ebé nudár operadór ba Kontratu Fahe Produsaun (PSC) JPDA 06-103 iha Area Konjunta ba Dezenvolvimentu Petróleu, kaer 10% asoens iha sira nia konsorsiu ho kompañia lima seluk (bele hare detallu iha ne’e). PSC ne’ebé asina iha Novembru 2006 husu ba kompañia sira atu fura posu teste neen durante tinan hitu oin mai, maibé to ohin loron sira fura de’it posu rua ne’ebé maran no Oilex hetan husu no simu estensaun balu. Iha 12 Jullu 2013, Oilex husu ba ANP atu termina kontratu ida ne’e tanba sira laiha serteza kona-ba impaktu hosi disputa fronteira maritima ne’ebé la’o hela ohin loron. Hanesan esplika hosi Energy News, Oilex iha ona hanoin antes atu sai hosi kontratu ida ne’e tanba razaun seluk, maibé “Kapitál privadu la presiza de’it jeolojia, sira presiza serteza hosi parte Governu no ami la hanoin katak tratadu sei halo PSC bele lakon de’it buat ne’ebé loos.” Fulan ida tuir mai, Timor-Leste responde ida ne’e liu hosi komunikadu imprensa. Iha Outubru, Timor-Leste nia Ministru sira ko’alia iha jornál lokál kona-ba Oilex nia pedidu atu sai hosi kontratu ne’e, maibé sira hateten karik bainhira Oilex sai duni, entaun kompañia barak mak sei haksoit mai atu hetan oportunidade.

Bainhira Timor-Leste selebra nia aniversáriu ba Proklamasaun Independénsia nian ba dala 38 iha 28 Novembru, iha diskusaun barak kona-ba Australia no Estadus Unidus ne’ebé sub-subar tau aparellu hodi grava no rona nasaun sira seluk, inklui Timor-Leste no Indonesia. Ministru Estadu Agio Pereira loke fali debate públiku kona-ba fronteira maritima ho entrevista iha radio Australia ( (audio no transkrip) no televizaun (video no transkrip). Organizasaun báze Australia nian Kampaña ba Justisa ba Tasi Timor (TSJC) mós husu ba Australia atu estabelese fronteira ho Timor-Leste, maski eis Ministru Negósiu Estranjeiru Australia nian Alexander Downer hatún esforsu Timor-Leste nian hodi promove nia interese nasionál (audio), hanesan Tom Clarke hosi TSJC husu Australia atu Heed law of the sea and set a fair Timor border -- Tau matan ba lei tasi nian no deside fronteira Timor ida ne’ebé justu -- iha Age. World Socialist Web Site hakerek eventu barak hosi prosesu ne’e iha kontestu.

Aumenta insultu ba kanek ne’ebé iha ona

Iha 3 Dezembru, media Australia nian fó relatóriu katak ASIO (órgaun intelijénsia no seguransa Australia nian) tama ba iha Bernard Collaery nia uma iha Canberra, nia nudár advogadu ida ne’ebé reprezenta Timor-Leste iha kazu arbitrajen CMATS. Ajente Australia nian mós prende no buka ema Australia ne’ebé fó sai informasaun kona-ba espionajen, ne’ebé iha planu atu fó evidénsia ba Timor-Leste iha Tribunal. Clinton Fernandes, ema ne’ebé suporta Timor-Leste, eis ofisiais militár Australia nian, hakerek katak Dealing fairly with East Timor is not charity, but justice -- Halo justu ba Timor-Leste la’ós karidade, maibé justisa”. Loron tuir mai hatudu artigu barak tan kona-ba Governu Australia nia asaun (Tempo Semanal, Guardian, Sydney Morning Herald, Radio Australia), inklui pergunta sira hosi partidu Traballista no Verde no justifikasaun hosi Primeiru Ministru Tony Abbott no Prokurador Jerál  George Brandis (deklarasaun ministerial no komunikadu imprensa). Primeiru Ministru Timor-Leste arrepende ho asaun “kontra-produtivu no la kooperativu” hosi governu Australia, no Ambassador Timor-Leste ba Australia Abel Guterres “dezapontadu loloos” hanesan fó sai iha ABC Lateline.

“ABC nia "Fact Check" uza fonte Australia nia atu konklui katak saida mak intelijénsia Australia sira halo ne’e lejítimu tanba “funsaun ida hosi ASIS nian mak envolve iha espionajen iha relasaun ho negosiasaun entre Australia ho nasaun seluk atu proteje interese ekonómiku Austrália nian” no tanba Austrália pasa ona lei ida atu fó dalan ba nia servisu intelijénsia sira atu hala’o atividade ne’ebé sei sai asaun krime bainhira hala’o hosi ema sivíl. Justifikasaun rasik hosi estadu nian hanesan ne’e mak lejítima hahalok krime sira iha mundu, hosi asasinasaun aviaun drone ba prizaun Guantanamo ba Solusaun Final Nazi ba okupasaun Indonézia nian mai Timor-Leste. Jornál The Australian mós lakon perspetiva, hodi halo editorial ne’ebé afavor ba hahalok nauk Timor-Leste hodi promove Australia nia interese polítika no ekonómiku. Debate iha Parlamentu Australia hatudu hanoin ne’ebé oi-oin.

Maski nune’e, hanesan Padre no advogadu Australianu Frank Brennan esplika, asaltu ne’ebé halo “atu hatudu ba Timor se loos mak padraun.” Maski Clinton Fernandes defende lejitimasaun asaltu nudár protesaun ba ajente intelijénsia Australia nian (audio), Kolumnis Brisbane Times, John Birmingham lamenta katak eis ofisiais ASIS ne’ebé fó sai informasaun kona-ba Australia nia espiaun ba Timor-Leste iha 2004 hanesan karik sei hetan sentensa ne’ebé la justu. Advogadu Bernard Collaery, ne’ebé nia eskritóriu hetan asaltu, esplika katak ema ne’ebé fó sai informasaun ne’e koko atu servisu tuir kanál barak maibé laiha rezultadu, maski Inspetor Jerál ba Intelijénsia nian hateten nia la hatene buat ida kona-ba asuntu ne’e, la’ós surpreza boot tanba nia gabinete iha kobertura limitadu.

Liu metade dúzia jornalista Australia kontaktu La’o Hamutuk iha 4 Dezembru. Ami esplika katak istória naruk ba Australia nia hahalok hodi nauk Timor-Leste nia petróleu hahú kedas ho deskobrimentu Woodside nian iha kampu Sunrise iha 1974, ne’ebé enkoraja Australia atu suporta invazaun Indonézia iha 1975. Australia nia kaan-teen ba riku soin iha tasi okos ba territóriu ne’ebé ilegalmente sira okupa hodi hadalan Canberra no Jakarta hodi asina Tratadu Timor Gap iha Timor oan rihun atus nia isin no ruin nia leten. Dezde 2002, Australia lakohi atu rekoñese Timor-Leste nia soberania hodi estabelese fronteira maritima ida ne’ebé legalmente válidu ne’ebé demonstra sira nia hakarak atu kontinua hetan lukru hosi fronteira maritima ne’ebé faz parte hosi okupasaun ilegál indonézia nian. Atu fó sai istória ida ne’e no kontinuasaun ba hahalok nauk 40% petróleu no gas Timor-Leste, espionajen ne’ebé foin akontese daudauk ne’e hanesan atu halakon realidade sira ne’e, hanesan Charles Scheiner husi La'o Hamutuk esplika iha Radio Nasionál ABC (audio).

Iha 5 Dezembru iha artigu barak inklui artigu rua hosi eis assessor ba Timor-Leste Paul Cleary, kona-ba istória no mehi ba Timor-Leste nia gas. Tanba audiensia inísiu ba arbitrajen hahú iha Den Hague, ne’e hatudu katak Timor-Leste iha testemuña na’in hat ne’ebé fó sai informasaun ne’e, no hateten sira nia naran ba Australia iha semana rua liu ba. Artigu barak mak hakerek kona-ba luta ne’ebé atu mai ida ne’e (World Today, Lateline, Herald Sun). Hafoin loron enkontru nian, radio ABC entrevista Embaixadór Timor-Leste Joaquim Fonseca.

Iha loron Kinta-Feira, 5 Dezembru, grupu ativista Timor-oan ida hala’o demonstrasaun pasifiku ida iha estrada sorin iha Embaixada Australia nian iha Dili nia oin. Sira nia deklarasaun hateten katak Movimentu Kontra Okupasaun Tasi Timor sei kontinua atu protesta to Australia troka nia polítika. Kliik iha foto ruma atu haboot imajen.

Demonstrasaun ne’e totálmente pasífiku, asiste hosi PNTL na’in hat ne’ebé kontrola hodi separa manifestante sira ho trafiku. Maizumenus oras ida tan, “Task Force” PNTL nian too no imediatamente tiru ho gas matan nian hodi hafahe manifestante sira, sira la ko’alia ho ema ida. Notísia prinsipál no artigu iha Diáriu Nasionál hakerek polísia ne’ebé uza forsa ne’ebé maka’as maski laiha provokasaun hosi manifestante sira. Infelizmente, korespondénte Timor-oan ida ba AFP hakerek ho falsu katak manifestante sira tuda fatuk ba iha embaixada, media Australia no media barak iha mundu hatutan no hakarak propaganda ida nee. Ofisiál altu no komandu PNTL hateten ba La’o Hamutuk no ikus mai hateten ba media katak demonstrasaun ida ne’e totálmente Pasífiku. Iha Sesta Feira dadeer ami husu ba AFP atu fó sai korresaun, no sira halo revizaun ba sira nia artigu oras 11 hafoin ida ne’e, maibé iha artigu barak mak la halo revizaun nafatin iha internet maizumenus liu rihun ida. Sekretáriu Estadu ba Seguransa Fransisco Guterres hateten ba ABC katak “polísia la presiza uza forsa, espesialmente gas matan nian,” (audio), maski jornalista la fiar nia deklarasaun katak sira la uza gas matan, hodi sita iha jornál Diáriu nian iha leten. Programa radio SBS hosi Australia (audio) mensiona halo reportajen falsu kona-ba tuda fatuk nian, maibé hateten sai saida mak objetivu hosi demonstrasaun ida ne’e. La’o Hamutuk hakerek blogue ida kona-ba Presumption of Violence – Halo asumsaun ba violénsia -- ne’ebé ema publika tutan tan iha fatin-fatin.

Aleinde ba reportajen falsu kona-ba tuda fatuk, iha media Australia nian balu mak halo kle’an sira nia koñesimentu. Iha editorial ida iha Melbourne Age halo konkluzaun katak “Karik Australia eksploita buat sira ne’ebé laiha balansu atu hetan podér ba komérsiu nian, no hala’o ida ne’e liu husi espionajen, entaun ita tenke moe tebes.” Karta balu no kolum sira ne’ebé hakerek hosi Donald Anton iha Age (versaun naruk) no hosi Richard Ackland (iha Sydney Morning Herald) inklui istória antesedénsia no foti sai duvida ba Australia nia hahalok, no Michael Leach foka sai katak imajen demokrátiku Australia nian rasik estraga hosi asaun hirak ne’ebé akontese ba Tasi Timor. Iha parte ativista nian, Shirley Shackleton fó atensaun katak Bernard Collaery nia “espíritu justisa no dignidade” sei la fasil atu intimida. iha parte seluk akadémiku Australia nian ida Sarah Heathcote “esplika” katak espionajen ne’e normal, entaun karik tribunal lalika invalida CMATS.

Iha Sesta-feira, maizumenus ema na’in 100 halibur malu iha Movimentu Kontra Okupasaun Tasi Timor iha demonstrasaun pasífika segundu nian iha Embaixada nia oin hosi tuku 2.30 to 5.30 loraik, ho kooperasaun tomak hosi polísia. Reprezentante na’in rua hosi grupu ne’e konvida atu tama ba embaixada laran atu fó sira nia deklarasaun ba Ambassador Miles Armitage, ne’ebé hateten ba sira katak nia respeita sira nia direitu atu halo manifestasaun no sei kontinua atu komunika sira nia preokupasaun ho Canberra. Maski demonstrasaun ida ne’e hetan kobertura hosi Televizaun Timor-Leste no Tempo Semanal, maibé largamente ignora loloos hosi media internasionál, karik tanba parte hotu-hotu la’o ho pasífika no iha responsabilidade. Crikey no Lusa/Sapo nia video fó sai notísia ida ne’e.

Demonstrasaun ba dala tolu hala’o iha Sábadu, iha loron aniversáriu ba dala 38 invazaun Indonézia mai Timor-Leste, ne’ebé hetan suporta hosi Australia. Bainhira Xanana fila hosi nia viajen iha rai li’ur, radio lokál entrevista nia. Segunda Feira tuir mai, Sydney Morning Herald fo sai katak Timor-Leste hatene se mak halo espionajen iha 2004 no sira hala’o ida ne’e faz parte hosi atividade servisu doasaun nian (ajudu).

Segunda loraik iha demonstrasaun ida ne’ebé boot liu, maizumenus ema na’in 200, inklui labarik barak.

Iha Segunda-Feira, 10 Dezembru, Timor-Leste husu ba ASIO atu fó fila material tomak ne’ebé sira foti hosi eskritóriu Bernard Collaery nian. Eis Prezidente Jose Ramos-Horta aumenta nia lian ba sira ne’ebé kondena ba asaun Australian, hanesan Ministru Petróleu Alfredo Pires halo ona (audio Ingles). Governu Australia atualiza sira nia avizu viajen nian, apelu ba sira ne’ebé hakarak vizita Timor atu “ezerse kauza grau altu nian iha Timor-Leste tanba situasaun seguransa ne’ebé la serteza. Situasaun bele at liu tan lahó apelu. ... Ita-boot sira tenke evita manifestasaun sira, marsa iha dalan ka hasees an hosi ema barak ne’ebé halibur malu tanba sira bele halo violénsia.” Hanesan sani na’in sira iha website hatene hela, katak laiha demonstrasaun violentu ida mak akontese iha Timor-Leste ba tinan barak nia laran.

Protesta iha loron ne’ebá, Loron Internasionál ba Direitus Umanus nian, mak ida ne’ebé boot liu, fó sai deklarasaun. Tanba demonstrasaun lor-loron nian la kontinua, maizumenus husi ne’e, ami fahe foto balu hosi ne’e. Kliik atu hare imajen ho boot.

Melbourne Age bolu espiaun Australia sira hanesan traballadór doasaun nian ne’ebé “laiha folin,” no hahalok hamoe-an ne’e ema barak hatene ona lemo-lemo. Ba ezemplu, Kolumnis Inglaterra/Kanadá Gwynne Dyer nia artigu Australia nia espionajen ba Timor-Leste ne’e halo moe-an liu atu fó sai ne’ebé publika ona lemo-lemo, iha parte seluk Mong Palatino nia hanoin iha The Diplomat fó istória báziku nian. Josephites Australia nian publika iha sira nia komunikadu “Turmoil on the Timor Sea”-- konfuzaun iha Tasi Timor -- hodi esplika oinsá ema Australia sira bele komunika ho sira nia reprezentante ne’ebé sira hili atu suporta direitu Timor-Leste nian.

Maizumenus estudante no ativista Timor oan na’in 40 durante dadeer tomak iha loron 13 Dezembru halo diskusaun ba asuntu legal, istória no estratéjia ne’ebé detallu kona-ba disputa fronteira maritima. Ita-boot sira bele download iha PowerPoint ne’ebé La’o Hamutuk hatudu ba sira (mós iha PDF). Sira mós halo demonstrasaun pasífika seluk iha embaixada nia oin iha loron 20 Dezembru.

Iha 17 Dezembru, Timor-Leste lori Australia ba iha Tribunal Internasionál ba Justisa-ICJ (TL nia aplikasaun no medida ba pedidu, komunikadu imprensa Tribunal nian, mensajen tribunal ba Australia, lojistiku; no mós AAP), husu atu fó fila dokumentu sira ne’ebé ASIO ba asalta iha eskritóriu avogadu Bernard Collaery nian semana tolu liu ba., no Tom Allard hosi SMH esplika asuntu legal sira. Hanesan ita hatene ona, eis Ministru Negósiu Estranjeiru Downer defensivu. Tribunal hala’o audiensia ba kazu iha loron 20-22 Janeiru 2014, hanesan predisaun ida iha entrevista Radio ABC ho Ambassador Timor-Leste Joaquim Fonseca ho Juvinal Dias hosi La’o Hamutuk (audio 2MB). Hare iha okos atu hare nia kontinuasaun.

Iha 28 Dezembru, Kirsty Sword-Gusmão, Primeiru Ministru Timor-Leste nia fen ne’ebé hosi Australia, hakerek ninia “laran sa’e” ba Australia nia “hahalok ne’ebé sai inimigu ba povu hosi rai ne’ebé ha’u adota nudár ha’u rain.” Iha loron ne’ebé hanesan, Sydney Morning Herald fó sai detallu adisionál kona-ba asaltu iha eskritóriu advogadu Collaery nian iha semana balu liu ba, inklui analiza ida ba istória no motivasaun hosi rai rua ne’e.

La’o Hamutuk hakerek submisaun ida ba Parlamentu Australia nian iha Marsu liu ba, ami hakerek katak “ami la bele komprende tanba sá nasaun demokrátiku ida hanesan Australia, ne’ebé respeita direitus umanus no estadu direitu demokrátiku ba nia sidadaun sira, lakohi atu aplika prinsípiu sira ne’e ba nia viziñu iha nia parte norte ne’e. Keta Australia ta’uk liu atu deside fronteira ida ne’ebé justu, nune’e ita boot sira hakarak atu bosok de’it duke sai sidadaun internasionál ida ne’ebé di’ak? Tanba sá ita-boot sira kontinua atu esploita vantajen ne’ebé ita-boot sira hetan durante okupasaun Indonézia ne’ebé halo moe-an no nakonu ho ran ba ami nia rai? ... Australia tenke foti dalan legalmente no ho respeita ba malu liu hosi halo negosiasaun ida ne’ebé mai ho vontade di’ak no bainhira hala’o prosesu rezolusaun ba disputa ba ami nia fronteira maritima.” Maski iha teatru eskándalu foin lalais ne’e halo ami duvida ho ami nia argumentu ne’e, maibé atensaun foun bele ajuda atu hatán ba pergunta ne’ebé ami husu ba ne’e.

2014

Fó hanoin fali ba ema Australia sira kona-ba sira nia Governu ne’ebé kleur ona ho direitu ne’ebé falsu hodi hamriik iha Tasi Timor tanba de’it sira nia governu nia memo ne’ebé tuan ona liu tinan 25, atualmente (barak liu) loke sira nia segredu no taka dalan ba sira nia razaun atu labele define fronteira maritima (hare pájina ba imajen nian iha liman loos ka hare dokumentu kompletu). SMH fó sai kona-ba Australia ne’ebé fraku liu atu nakloke, no Paul Cleary hakerek operasaun atu tau aparellu iha 2004 iha The Australian. Iha 10 Janeiru, SMH esplora motivasaun posivel ba asaun Australia nian daudauk ne’e.

As the ICJ hearings neared (see four paragraphs earlier for case filing), commentators Michael Sainsbury, Matthew Happold, the Financial Times, Kate Mitchell/Dapo Akande and David Robie provided background, and the Timor-Leste Government issued a statement. Tom Clarke of the Australian Timor Sea Justice Campaign was interviewed on ABC television.

Bainhira audiensia iha Tribunal Internasionál ba Justisa (ICJ) besik ona, (hare ba parágrafu hat ikus ne’e ba kazu rejistu nian), komentador Michael Sainsbury, Matthew Happold, the Financial Times, Kate Mitchell/Dapo Akande no David Robie fó sai informasaun báziku nian, no Governu Timor-Leste fó sai komunikadu ida. Tom Clarke hosi Kampaña Justisa ba Tasi Timor hosi Australia hetan entrevista hosi televizaun ABC.

Molok audiensia, ICJ simu resposta narativu hosi Australia, no mós pakote dokumentu balu hosi Timor-Leste no Australia (20MB). Dokumentu ne'e inklui karta interesante no email barak entre parte hotu, no mós testu lei ne’ebé Australia fiar relevante.

Foto: (liman karuk) Advogadu Bernard Collaery no Ministru Negósiu Estranjeiru Jose Luis Guterres iha audiensia primeiru ICJ nian iha Den Hague
(liman loos) Advogadu Timor-Leste Sir Elihu Lauterpacht, Ministru Negósiu Estranjeiru José Luis Guterres no Ambassador Joaquim Fonseca.

Advogadu Timor-Leste aprezenta sira nia argumentu (oras rua ho video, transkrip) katak Australia envolve iha hahalok ida ne’ebé “nunka mais akontese, la edukadu no labele atu esplika” hodi asalta eskritóriu Bernard Collaery, hodi husu atu fó fila material sira ne’e ka tenke taka hodi ema ida labele lee (Maski Prokurador Jerál Australia nian promete katak sira sei la lee dokumentu sira ne’e (deklarasaun). Media barak mak fó kobertura ba audiensia ne’e, inklui ABC, Guardian, Global Mail no Sydney Morning Herald. Hanesan tuir oráriu tribunal nian, Australia responde iha loron 21 Janeiru (video, transkrip, SMH, Guardian, Australian), Timor-Leste halo rezumu iha dadeer 22 Janeiru (video, transkrip, ABC) no Australia iha meiudia loron hanesan (video, transkrip, Australian, SMH). Tribunal hateten sai sira nia pedidu no sei deside loron atu halo desizaun iha futuru. The Guardian hakerek asuntu importante kona-ba kazu ne’e, The Australian fó korajen ba advogadu Australia nian, no eis Ministru Negósiu Estranjeiru Alexander Downer (hetan resposta hosi Andy Alcock) no Senadór Lee Rhiannon hosi Partidu Verde publika hanoin ne’ebé la hanesan ba kontestu istória kazu nian. (Iha Fevereiru nia rohan, Australia hili Downer nudár sira nia Komisáriu Altu (Embaixador) ba Reinu Unidus.

Iha Janeiru 28, ICJ fó sai Orden ida (tuir fali mai ho komunikadu imprensa ida) hodi rejeita pedidu Australia nian atu suspende prosesu ba kazu ne’e to kazu arbitrajen remata. Orden ne’e aseita pedidu Timor-Leste nian atu mantén kazu ne’e la’o ba oin no halo oráriu ida ba Timor-Leste atu hatama argumentu narativu iha 28 Abril no husu ba Australia atu hatán iha loron 28 Jullu, ho prosesu tuir mai sei tuir tan. Tribunal sei deside pedidu Timor-Leste nian ba medida provisional iha 3 Marsu, hanesan Kampaña ba Justisa ba Tasi Timor iha Australia hateten sai.

Bainhira jornal Australia nian preokupa ba grafiti-pintura iha parede iha sira nia embaixada iha Dili, Senadór Scott Ludlum hosi Partidu Verde, ezije faktus husi Prokurador Jerál no xefe ASIO nian ba informasaun kona-ba asaltu iha eskritóriu Collaery (video iha YouTube parte 1, parte 2).

Iha 3 Marsu, Tribunal Internasionál ba Justisa fó sai sira nia Orden preliminaria (rezumu, komunikadu imprensa) ba medida provisional nian, aseita reklamasaun barak hosi pedidu Timor-Leste nian maibé la husu ba Australia hodi fó fila material sira ne’ebé sira prende. Juiz na’in 12 hosi na’in 16 fó orden katak:

• Australia tenke garante katak konteúdu hosi material ne’ebé sira prende ne’e labele uza iha kualkér dalan ka kualkér tempu hosi ema ka grupu ruma atu hatún Timor-Leste to kazu ohin loron ne’e finaliza

• Australia tenke falun dokumentu sira no dadus eletróniku ka kualkér kópia ne’ebé sira prende to’o desizaun Tribunal tuir mai;

Juiz Cancado-Trindade (Brazil) konkorda ho Orden maibé nia hakerek opiniaun ketak hodi rekomenda katak Australia atu fó fila material sira ne’ebé sira prende ba ICJ atu seguru liu tan. Juiz Keith (NZ), Greenwood (Reinu Unidus), Donoghue (Estadus Unidus) no Callinan (Australia) hakerek opiniaun ne’ebé la aseita, no sujere katak tenke fó fiar ka fleksibilidade liu tan ba Australia kona-ba material sira ne’ebé sira prende.

Juiz na’in 15 (la inklui juiz ad hoc Ian Callinan ne’ebé hili hosi Australia) fó orden katak:

• Australia hodi labele halo interferénsia iha kualkér meius ba komunikasaun entre Timor-Leste ho nia ekipa advogadu ne’ebé iha relasaun ho Arbitrasaun tuir Tratadu Tasi Timor 20 Maiu 2002 ne’ebé pendente hela entre Timor-Leste no Australia, ho kualkér negosiasaun bilateral iha futuru hodi preokupa ba delimitasaun maritima, ka ho kualkér prosedimentu seluk ne’ebé iha relasaun entre Estadu rua ne’e, inklui kazu prezente ne’ebé hato’o iha Tribunal.

Desizaun ne’e provisional no iha relasaun de’it ba pedidu Timor-Leste nian ba “medida urjénsia,” no “laiha dalan ba prejulgar” ba desizaun final ne’ebé sei foti maizumenus liu fulan neen tan. Nudár dalan atu bele simu malu, diplomatikamente desizaun ne’ebé hetan apresiasaun hosi Governu Australia, Governu Timor-Leste no Kampaña Justisa ba Tasi Timor. Media Australia sira hahú fó sai informasaun ne’ebé prefere liu ba sira nia nasaun (artigu AAP nian iha 7 News inisiálmente fó títulu “Australia wins UN court fight”-Australia manán iha Tribunal ONU- maibé ikus mai sira muda ba “Aust to keep docs but not spy on Timor: ICJ”- Australia atu rai hela dokumentu maibé labele halo espionajen ba Timor: ICJ). Radio Nasionál ABC halo entrevista ho Clinton Fernandes (audio) ne’ebé tau desizaun ne’e iha nia kontestu loloos. SMH bolu rezultadu ida ne’e nudár “derrota boot” ba Prokurador Jerál Brandis, iha parte seluk ABC no Guardian mós fó objetivu ne’ebé razoavel, hanesan mós ba kobertura barak iha loron balu tuir mai, inklui Stop Spying On Timor, Court Tells Australia – Hapara halo Espionajen ba Timor-Leste, Tribunal Hateten ba Australia- (New Matilda hosi Tom Clarke hosi TSJC, mós iha versaun naruk nian), ICJ orders Australia to stop spying on East Timor (SBS)-ICJ fó orden ba Australia atu hapara espionajen ba Timor; mós iha entrevista audio ho Ambassador Joaquim Fonseca no Tom Clarke), Timor Leste’s request for provisional measures: ICJ orders materials seized by Australia sealed until further notice - Pedidu Timor-Leste ba medida provisional: ICJ fó orden atu matéria sira ne’ebé Australia prende tenke falun to iha instrusaun tuir mai (Matthew Happold iha blogue EJIL), Australia ordered by The Hague to stop spying on Timor-Leste – Australia hetan orden hosi Hague atu hapara espionajen ba Timor-Leste (UK Telegraph) (versaun naruk liu), Xanana Gusmão: Ita Manan Ona Australia (Suara Timor Lorosa'e) no UN Rules against Australia in Favour of East Timor – Desizaun ONU kontra Australia a favor ba Timor-Leste -- (International Business Times), no mós iha Vietnam no mundu tomak.

Hafoin halo reflesaun ba semana ida, advogadu feto na’in rua hosi Washington hakerek analiza: Can the ICJ Avoid Saying Something on the Merits About Spying in Timor-Leste vs. Australia? -- Bele ka lae ICJ atu hateten méritu balu kona-ba espionajen iha Timor-Leste verso Australia? (Ashley Deeks) no artigu balu tan iha Susan Simpson nia blogue, inklui How Australia Overplayed Its Hand in the Timor Sea - Oinsá Australia halo luan sira nia okupasaun iha Tasi Timor no mós The Historical Context of Australia's Political and Legal Strategy in the Timor Sea - Kontestu istória hosi estratéjia polítika no legal Austrália nian iha Tasi Timor, no mós Timeline of Events leading up to TL's ICJ Claim - Kalendariu ba Eventu lori sai klaim TL nian iha ICJ. Ba buat ida ne’ebé kómiku liu mak ne’ebé presiza nota mak, Eis Senadór Australia Bill O'Chee ne’ebé akuza Timor-Leste halo espionajen kontra Australia ne’ebé ho di’ak hetan rejeita hosi Binoy Kampmark. Iha parte legal nian, kompañia legal Steptoe & Johnson analiza implikasaun hosi desizaun ICJ nian ba kazu seluk ba arbitrasaun estadu no investidór sira, no iha parte seluk Clinton Fernandes sujere katak negosiasaun ho vontade di’ak nudár xave atu labele iha disputa entre nasaun rua ne’e.

Kazu arbitrajen CMATS hala’o iha Den Hague (hare iha leten ba nia istória). Iha 18 Fevereiru 2014, Timor-Leste aprezenta nia argumentu no evidénsia substantive primeiru. Australia sei fó resposta iha 19 Maiu, no ronde segundu ba Timor-Leste atu fó dokumentu (18 July) no Australia (18 Agostu) sei fó informasaun báziku ba audiensia hosi 27 Setembru to’o 2 Outubru molok painél sira fó sai desizaun. Iha 23 Fevereiru, Radio Nasionál ABC nia Background Briefin-g fó sai dokumentáriu ho minutu 40  (transkrip, audio, pájina web) hodi ezamina espionajen durante 2004-2005. Iha programa, peritu direitu ANU Donald Anton (bele download nia artigu ASIL) esplika katak “karik alegasaun ba tau aparellu gravasaun sub-subar ne’e prova duni, Australia iha pozisaun ne’ebé klaru ona nudár nasaun primeiru ho tratadu ida ne’ebé nia rasik negosia deklara sai inválidu tanba ho nia hahalok fraude/joga fo’er”.

Iha 17 Marsu, Televizaun ABC nia programa Four Corners fó sai a dokumentáriu ida “Drawing the Line” – Marka Lina- iha asuntu hirak ne’e (transkrip), hanesan hateten iha prevista ida ne’e kona-ba governu Australia ne’ebé besik liu ba kompañia petróleu sira. ABC promove programa ida ne'e ho ameasa husi Canberra kontra Timor-Leste, bazeia ba Timor-Leste nia memo internal haklekar sai, ikus mai fahe husi Timor-Sea Justice Campaign. Ofisiais balun husi Timor-Leste halo sala bainhira sira kritika Australia haruka mensagem ida ne'e liu media, maski jurnalista husi ABC aprende informasaun ne'e hafoin Governu Timor-Leste hetan komunikasaun.

To ohin loron Timor-Leste selu besik tokon $20 ba kustu advogadu sira ba kazu ida ne’e (inklui tokon $5.8 iha Marsu 2014), no despeza nee sei kontinua. Tokon $11.8 gasta ona iha 2013 liu fali tokon $10 ne’ebé orsamentu ba servisu legal nian iha tinan 2013, no despeza iha 2014 sei besik atu serteza katak liu tokon $10 iha alokasaun. Portal Aprovizionamentu iha de’it informasaun uitoan kona-ba tokon $2.3 iha kontratu ne’ebé ajudika ba Bernard Collaery dezde 2010 (inklui rihun $289 iha Novembru liu ba) no kontratu ho tokon $1.5 asina iha fulan ne’ebé hanesan ho DLA Piper Australia, maibé kontratu sira seluk seidauk iha Portal. Aleinde ba kustu legal nian, Timor-Leste gasta montante barak ba viajen, konsultan sira, no tempu ofisiál governu nian, maibé laiha informasaun sufisiente ida ne’ebé ita bele hetan.

Susan Simpson kria Google Earth Bookmark ne’ebé iha valor duni no hakerek artigu ida (orijinál iha online) hodi hatudu oinsá akordu barak ne’e marka ona liña iha Tasi Timor dezde tinan 42 liu ba, laho deside fronteira maritima ida ne’ebé permanente.

Iha 19 Marsu, peskizadór Prezidensia Guteriano Neves publika Istória badak no Estatuta Tasi Timor ho hanoin atu aumenta media no públiku nia hatene kona-ba informasaun báziku ba asuntu ne’e. Jornál Independente tau nia artigu iha pájina primeiru, no iha pájina seluk tau artigu kona-ba polítiku na’in Timor-oan sira ne’ebé kondena maka’as ba reportajen ABC nian iha semana kotuk kona-ba Australia nia avizu diplomátika nian.

Iha Tempu hanesan, Primeiru Ministru Xanana Gusmão fó palestra iha Jakarta International Defense Dialogue. Nia hateten ba distintu sira iha asembleia ne’e, inklui sira ne’ebé mai hosi Australia: “Maski nune’e, atu iha kooperasaun [ba seguransa maritima] ne’ebé onestu no sériu, ne’e importante tebes atu iha determina ita nia fronteira maritima entre nasaun sira, tuir lei internasionál, iha dalan ne’ebé klaru laho mai ho kualkér razaun seluk.
   “Ne’e ofensivu tebetebes atu hare oinsá nasaun balu, tanba sira nasaun boot, riku liu ka iha arma militár boot, sempre sai ida ne’ebé la justu ba sira nia viziñu sira, partikulármente bainhira nia viziñu sira ne’e ki’ik no kiak.
   “Lei Internasionál sempre involve, iha desizaun sira ne’ebé halo iha relasaun ba nasaun seluk. Maibé lei internasionál simplesmente hatún ka haluha tiha, bainhira lei ida ne’e atu asegura benefísiu ekonomia boot sira atu selu prinsípiu hosi polítiku justu no valor universal ba direitu iguál no obrigasaun entre povu no nasaun.”

Iha 20 Marsu, Kampaña ba Justisa ba Tasi Timor observa aniversáriu ba tinan 12 bainhira Australia dada an hosi prosesu legal ba fronteira maritima nian, hanesan reportajem husi SBS radio. Loron sanolu tuir mai, Kampana publika memo Timor-Leste ne'ebe haklekar sai kona-ba ameasa Australia nian.

Revista online Australia ba direitus umanu nian Right Now foin dadauk ne'e publika sai artigu balu ne'ebe relevante, inklui Timor's Oil (Tom Clark), Bugged: Espionage in East Timor (Sayomi Ariyawansa), Walking Together: Australia’s Chequered History in Timor-Leste (Leona Hameed & Charles Scheiner), Having it Both Ways: Australia's Conflicted Position in the Timor Sea (Sarita Ryan),  no Cutting the Gordian Knot - Solving the East Timor v Australia Dispute (Clinton Fernandes).

Iha Abril, Sydney Morning Herald sita advogadu ba Timor-Leste ne'ebe hateten katak karta ida iha Janeiru hosi Australia ba Timor-Leste atu suporta ConocoPhillips ba disputa taxa Bayu-Undan hodi halo ligasaun kazu taxa nian ho prosesu arbitrajen CMATS nian ne'ebe lao dadauk ne'e, forsa pedidu Timor-Lete nian ba arbitrajen tuir Tratadu Tasi Timor.

Hafoin semana rua, painel arbitrajem iha kazu CMATS hatete ba Australia katak sira tenke fo lisensa ba sasin eis-ASIS atu fo evidensia ba sira nia prosesu. Australia kansela ninia pasaporte tiha ona, hanesan esforsu atu prevene nia bele fo ninia testemunha. Karik teknologia bele loke dalan seluk.

Komentáriu no Analiza (foun liu mak uluk). Liga iha ne'e atu hetan komentariu iha Ingles.

• Komentáriu ne’ebé foun liu ka iha lian Ingles liga husi testu iha leten.

• Istória badak no Estatuta Tasi Timor husi Guteriano Neves, 19 Marsu 2014

• Programa Radio Igualdade husi La'o Hamutuk kona ba Tratadu CMATS (audio, 7MB) (Jan 2014)

• Australia tenke respeita soberania Timor-Leste ho fronteira lina klaran aprezentasaun ba ativista sira (5MB PowerPoint ka 2MB PDF), 13 Dez. 2013

• Tansá Timor-Leste-Australia Seidauk iha Fronteira? husi Juvinal Dias ba TLSA (mos 3 MB PowerPoint ka 1.4MB PDF), Outubru 2013

• LH nia aprezentasaun kona-ba Tratadu CMATS ba jornalista sira (Tetum: 4MB PowerPoint ka 2MB PDF), 21 Fev. 2013

• Terminasaun Tratadu CMATS no nia implikasaun ba Timor-Leste husi LH iha jornal lokal, (11 Fev. 2013)

• Pájina índise kona-ba Projetu Petróleu no Gas Greater Sunrise depois 2010 (mos English)

• Analiza osan hira mak Australia nauk hosi Timor-Leste liu hosi kampu petróleu Laminaria-Corallina (Fevereiru 2014)

• Faktu LH: Fronteira Marítima Tasi Timór: Seidauk resolve! Agustu 2009

• Livru LH LNG Sunrise iha Timor-Leste: Mehi, Realidade no Obstákulu sira (mos English ka Bahasa Indonesia), Fevreiru 2008

• Artigu Buletin LH kona-ba ratifikasaun CMATS, Junu 2007 (Bahasa Indonesia)

• Submisaun La'o Hamutuk ba Parlamentu Australia (Ingles), 16 Marsu 2007
  Komisaun publika relatóriu ida no submisaun hitu kona-ba CMATS, inklui hosi (hotu Ingles)

  • East Timor and Indonesia Action Network (ETAN/USA)

  • Timor Sea Justice Campaign (TSJC/Australia)

  • Robert King (istória naruk dezde negosiasaun 1960s)

  • Rob Wesley-Smith

  • Clinton Fernandes no Scott Burchill

  Submisaun tomak bele download hosi http://www.aph.gov.au/house/committee/jsct/6_7_february2007/subs.htm.
  Komisaun fó sai Relatóriu #85 iha Juñu 2007. CMATS chapter ka Introdusaun (Ingles).

• Now you CMATS, now you don't. Hosi Dr. Mark Byrne, UNIYA iha New Matilda, 5 Marsu 2007

• Karta La'o Hamutuk ba Parlamentu Timor-Leste kona-ba Tratadu  CMATS, 14 Fevreiru 2007

• Enkontru públiku La'o Hamutuk kona-ba Tratadu CMATS, (Bahasa Indonesia) 18 Janeiru 2007

• La'o Hamutuk nia analiza komprensivu iha Bulletin istória no signifikasaun hosi Tratadu CMATS, (Bahasa Indonesia) Abril 2006

• Deklarasaun La'o Hamutuk kona-ba Tratadu CMATS, Janeiru 2006

• Karta La'o Hamutuk ba Parlamentu RDTL kona-ba Tratadu CMATS, Marsu 2006

• ETAN/U.S. statement on CMATS Treaty, Janeiru 2006

• Timor Sea Justice Campaign (Australia) release on Treaty, Janeiru 2006

• Pergunta no Hatán Tratadu CMATS (Ingles) husi Jeffrey J. Smith, Janeiru 2006 (PDF)

Matéria Governu no Parlamentu Australia (kronolojia, hotu Ingles)

• Australia notifika órgaun sira ba tratadu nian iha Marsu 2002 katak Australia sai ona hosi mekanizmu legal atu rezolve disputa fronteira maritima (komunikadu imprensa):

  • UN Convention on Law of the Sea:  Deklarasaun, Analiza ba Interese Nasional
  • International Court of Justice: Deklarasaun,  Analiza ba Interese Nasional

• Australia nia Analiza ba Interese Nasional kona-ba Timor Sea Treaty no kona-ba Exchange of Notes (June 2002)

• Australia nia Analiza ba Interese Nasional kona-ba Sunrise International Unitization Agreement (Marsu 2003)

• Australia nia Analiza ba Interese Nasional kona-ba CMATS (Fevreiru 2007) (PDF)

• Tratadu no informasaun ne’ebe iha relasaun iha website ofisial Governu Australia nian

• Parliamentary media release kona-ba enquerido ba CMATS (8 Fevreiru 2007)

• Transkrip (Hansard) of first and second readings of CMATS iha Parlamentu Australia (14 Fevreiru 2007)

• Karta husi Alexander Downer ba Parlamentu nia Komisaun kona-ba Tratadu atu halo "National Interest Exemption" (22 Fevreiru 2007)

• Komunikadu imprensa fo hatene katak Tratadu CMATS no IUA mai en vigor ona (23 Fevreiru 2007)

• Transkrip audiensia Komisaun Parlamentu kona-ba Tradadu sira (26 Fevreiru 2007)

• Transkrip (Hansard) debate kona-ba CMATS iha Parlamentu Australia (28 Fevreiru 2007)

• Transkrip (Hansard) debate kona-ba CMATS iha Senadu Australia (22 Marsu 2007)

• CMATS capitulu husi relatorio Parlamentu Australia nia Komisaun kona-ba Tratadu sira, Marsu 2007 (hare leten ba sumisaun sira) 

Dokumentu legal no dokumentu sira seluk (kronolojia)

• Tratadu Tasi Timor (Portuguese) (Ingles) (asina no vigora iha retroativu ba May 2002)

• Lei Zona Maritima Timor-Leste (Setembru 2002)

• Akordu Unitizasaun Internasionál ba Sunrise (Ingles) (asina iha Marsu 2003, vigora iha Fevreiru 2007) (mós Portuguese)

• Tratadu CMATS (Ingles) (asina iha Janeiru 2006, vigora iha Fevreiru 2007) (Bele print ho PDF)  (mós Portuges)

• United Nations Convention on the Law of the Sea halo iha Montego Bay iha loron 10 Dezembru 1982 (asinaturas)

• Vienna Convention on the Law of Treaties (23 Maiu 1969)

Liga ba índise artigu sira iha website kona-ba petróleu no gas natural
 

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua D. Alberto Ricardo, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: laohamutuk@gmail.com    Web: http://www.laohamutuk.org    Blog: laohamutuk.blogspot.com