La’o Hamutuk

Bulletin  |  Surat Popular  |  Topic index  |  Reports & Announcements  |  Updates
Reference  |   Presentations  |  Mission Statement  |  LH Blog  |  Search  |  Home

Esbosu Planu Estratéjiku Dezenvolvimentu RDTL 2011-2030

29 Abril 2010.  Aktualiza 11 Jullu 2011.

Link to pages in English on the 2010 draft and approved 2011 Strategic Development Plan (atualiza Setembru 2011)

Hafoin serbisu ba asuntu ne’e durante fulan balun nia laran, Primeiru Ministru Xanana Gusmão aprezenta sumáriu ida husi nia Planu Estratéjiku Dezenvolvimentu  (PEDN) 2011-2030 ho lian Ingles iha enkontru Parseiru Dezenvolvimentu iha inisiu Abril 2010. Maske sumáriu planu ida ne’e nia titulu "Husi Konflitu ba Prosperiedade,"hafoin semana balun publika iha Governu nia website, iha Ingles no Portugues, tuir mai pájina-oin sumáriu nian hakerek fali ho titulu “Dalan ba Paz no Prosperiedade” ho notas "Versaun tetum seidauk. Versaun original iha português."

Versaun kompletu husi Planu Estratéjiku Dezenvolvimentu Nasional (PEDN) sirkula iha Julhu 2011 deit (hare kraik). Maibe La’o Hamutuk hetan ona “Ezbosu Final” iha fulan Abril 2010 ne’ebe fo husi lideransa estadu balun, ne’ebe ami scan tiha no publika iha website ida ne'e iha lian Ingles. Pajina sumáriu ne’e liu 300, tabela besik 80, no figura liu 60, reprezenta revizaun boot ida no kompilasaun serbisu ida.

Infelizmente, dokumentu ne’e ninia konteudu la fo impresaun hanesan ninia apresentasaun. Husi liur, sumáriu ne’e hatudu “ hanesan fo inspirasaun ne’ebe diak” katak Timor-Leste sei sai nudar nasaun ne’ebe prósperu iha tinan 20 nia laran, sei laiha iletrasaun, iha infraestrutura ba fornesimentu bee mos ne’ebe diak, ema hotu-hotu sei hetan asessu ba tratamentu saude no edukasaun sekundaria, asessu internet liu husi rede wireless nasionál ba ema hotu, no laiha pobreza. Maibe planu esbozu ne’e rasik, ne'ebe dalabarak la konstitente ho Sumariu, hatudu buat barak ne’ebe ladun spesifiku kona-ba oinsa Timor-Leste sei atinzi vizaun inspiradora ida ne'e.

Iha loron 19 Abril 2010, Primeiru Ministru hahu hala'o "konsultasaun" kona-ba planu ne'e ho povo Timor-Leste iha rai laran hahu husi Tutuala, subdistritu ne'ebe leste liu, no ba kada subdistritu (orariu). Sosializasaun final hala’o iha Laulara (Distritu Aileu) iha loron 11 Setembru, no La'o Hamutuk partisipa iha sosializasaun ne'e no hasa'e foto balun.

Maske viajen Primeiru Ministru estimula antusiasmu no diskusaun barak—inklui kestaun karik sosializasaun ida ne’e hatudu katak kampanha eleisaun 2012 hahu ona—planu ne’e rasik hetan ezaminasaun ka analiza ne’ebe minímu los. La’o Hamutuk hein katak pájina hirak ne’ebe ami perpara iha ami nia website sei ajuda povo hodi komprende konteudu planu ida ne’e no deside rasik karik planu hirak ne’e desejavel no posivel atu atinji, hodi konsidera situasaun átual ba rekursu umanu no rekursu material ne’ebe iha Timor-Leste.

Iha loron 25 Junhu, Chefe interinu UNMIT no representante UNDP nian Finn Reske-Neilsen manda karta ida ba Primeiru Ministru hodi fo komentáriu ba sumáriu Planu Stratéjiku no fo korajen atu aumenta atensaun ba agrikultura, ema kiak sira iha área rurais, estimula investimentu, proteze ambiente lokal, jéneru, no asuntu sira seluk.

Iha inisiu fulan Agustu 2010, Timor-Leste halo pagamentu final ho tokon $2.5 dollars Amerikanu husi kontratu $2.981,680 ne’ebe Primeiru Ministru assina iha loron 1 Setembru ho kompania Surabaya PT DSI Makmur Sejahtera ba "Servisu Konsultan ba Planu Estratejiku Dezenvolvimentu Nasional." Kontratu ne'e inklui prestasoes ne'en: Planu Stratéjiku Dezimvolvementu Nasional, Planu Nasional ba Pemetaan (Spatial) Teritoriu, Enkuadramentu Estratejiku ba Infraestrutura, Planu Pemetaan Teritoriu ba Suai, Planu Pemetaan Teritoriu ba Dili no Matadalan ba Dezenhu Urbanu iha Dili.

La’o Hamutuk halibur ona dokumentu balun iha lian Ingles kona-ba pagamentu no kontratu balun hanesan ami fó sai tuir mai ne’e:

Iha fulan Novembru 2010, Governu proposta Orsamentu Jeral Estadu ba tinan 2011 ho montante tokon $985, inklui tokon $317 ba Fundu Infraestrutura foun, atu hahu implementasaun PEDN. Durante tinan 2012-2015, governu proposta atu aumenta Fundu ida ne'e ho biliaun $2.5 tan. La'o Hamutuk nia submisaun ba Parlamentu Nasionál husu Deputadu sira atu rejeita kriasaun Fundu Infraestrutura to'o PEDN hetan aprovasaun ona husi Parlamentu. Parlamentu aumenta tokon $321 no aprova orsamentu biliaun $1.3 iha fulan Janeiru 2011, inklui tokon $599 ba Fundu Infraestrutura ne’ebe sei uza atu implementa PEDN.

Iha loron Sabado 19 fulan Fevereiru tinan 2011, Konsellu Ministru aprova ona Dekretu-Lei rua ne’ebé hetan promugasaun husi José Ramos-Horta hafoin fulan ida. Dekreitu-Lei 11/2011 (Ingles ka  Portugese) atu defini estrutúra no kompetensia Agensia Dezenvolvimentu Nasional (ADN) no Dekreitu-Lei 8/2011 (Ingles ka Portugese ka ofisial)ne’ebe esplika ho detahlus kona-ba Fundu Infraestrutura.

Planu Estratejiku Dezenvolvimentu Nasional ne’e hein hela atu aprezenta ba Parlamentu iha Julhu tinan ne’e. Iha loron 22 fulan Fevereiru, Vise-Ministru Finansas Rui Hanjam fo aprezentasaun (Ingles) ba Komisaun Anti Korupsaun nia workshop atu esplika PEDN nian vizaun no objetivu. Iha loron hanesan, Primeiru Ministru Xanana Gusmão hateten ba Konsellu Seguransa ONU nian: "Hafoin halo revizaun ne’ebe klean kona-ba nesesidade no obstaklu, ami agora dadaun prepara hela ezbosu Planu Estratéjiku Nasionál ne’ebe sei apresenta ba Parlementu atu hetan aprovasaun. Ami hein bele halo lansamentu Planu ida ne’e hamutuk iha ekontru proximu ho ami nia Parseiru Dezenvolvementu sira ne’ebe tuir orariu sei hala’o iha Dili loron 12 Julhu 2011.
Iha termus makroekonomiku, Planu Estratéjiku Dezenvolvimentu Nasionál ne’e sei bazeia ba modelu tuir mai ne’e:

  • Produsaun

  • Kapasidade produsaun, no

  • Oportunidade empregu ne’ebe produtivu.

Relatóriu IMF ne’ebe fo sai iha Marsu 2011 dala barak refere ba Planu Estratéjiku Dezenvolvementu hodi esplika katak "persiza fó detalhadus no kapasidade administrativu ne’ebe limitadu impede jestaun ba investimentu públiku”.

Planu Estratejiku ne’e hetan prediksaun husi atualizasaun Banku Mundial nian iha Marsu katak ("Orsamentu 2011 fó indikasaun ne’ebe maka’as kona-ba prioridade iha governu ne’ebe sei aprezenta iha Planu Estratéjiku Dezemvolvimentu oin mai. Governu haré investimentu nudar stratéjia ka dalan ne’ebe diak atu resolve problema infraestrutura, problema kapasidade no sira seluk. Objetívu stratéjia ida ne’e atu fó kondisoens ne’ebe diak hodi kria seitór privadu ne’ebe forsa. Kritikalmente, ida ne’e sei depende ba prioridade no kualidade investimentu, maibe mos depende ba kapasidade ne’ebe inklusivu inklui makroekonomiku no admistrativu.") Iha Fevereiru, Banku Dezenvolvimentu Ázia (ADB) fó relatóriu katak "Inisiativa importante ne’ebe presiza atu hetan kompetisaun ne’ebe diak hatudu ona iha Planu Estratéjiku Dezemvolvimentu"- maske sira seidauk hare’e planu hirak ne’e.

Planu ida ne’ebe elusivu ida ne’e mos nudar fokus sentral ida ba prosesu konsultasaun kona-ba Aid Effectiveness ne’ebe halao iha Dili iha fulan Marsu no Abril. Hanesan esplika iha ezbosu Country Paper ne’ebe sirkula husi Ministériu Finansa "Governu identifika ona vizaun nasional foun ida no perpara ona Planu Estratéjia Dezenvolvementu (SDP) tempu naruk nian atu resolve impedimentus ba dezenvolvimentu foun….Susesu husi Planu ne’ebe hetan foka maka’a ne’e sei lansa iha fulan Julhu depende ba ambiente ekonomia global no jeopólitika nian. SDP sei apresenta ba ema hotu-hotu, dokumentu planeamentu tinan barak ba dala uluk nian ne’ebe mosu hafoinkrizi 2006. Maske dezenvolvimentu ne’e diak no aseitavel, maibe iha konsensu jeral katak governu uza tempu barak demais atu kria planu ida ne’e. Governu responde sentimentu hirak ne’e no dehan katak historia badak Timor-Leste nian no bazeia ba esperiensia husi nasaun frajil sira seluk, tentasaun atu dedika nia rekursu importante (rekursu umanu no finanseiru) atu dezenvolve planeamentu enkuadramentu mediu-longu prazu nian rezulta ona fokus prematur ne’ebe dok atu resolve fontes konflitu tempu badak nian ba planu dezenvolvimentu tempu naruk. Governu mantein fiar katak nia iha tempu ne’ebe los." La'o Hamutuk fo komentariu iha fulan Maiu ba ezbosu Country Paper atu ejiji planimentu ba tempu naruk no hatete karak PEDN "labele hasees Timor-Leste husi frajilidade."

Iha loron 6 Abril, Ministériu Finansa fó sai verzaun foun Pedidiu ba Ekspresaun Interese atu halo selesaun ba kompania ida hodi halo planu aprovisionamente, prosesu hari’i kapasidade, jestaun, no suporta durante konstrusaun ba kontratu ho eskalaun bo’ot iha Fundus Infraestrutura nia okos. Dokumentu ida ne’e esplika katak "Kria ADN atu lori kna’ar hodi kaer projeitu ida ne’e, maibe ADN no Komisaun Aprovisionamentu formalemente seidauk estabelese hodi hatarde implementasaun projeitu barak ne’ebe tuir lolos hahu ona iha tinan 2010 no 2011. Tan ne’e, fo kontratu ba Kompania Aprovisionamentu nian sai hanesan governu nia prioridade as no kompania sira ne’ebe iha interese atu partisipa iha kontratu ida ne’e tenke halo buat hotu-hotu ne’ebe sira bele atu mobiliza sira nia ekipa ho lalais bainhira desizaun atu fo kontratu nian publika sai ona."

Hafoin enkontro kalan tomak, Konsellu Ministru aprova Plano Estratégico de Desenvolvimento de TimorLeste, nebé elabora iha dokumentu ida ho paginas atus rua resin, iha madrugada loron 1 Julhu 2011. Tuir Komunikadu ba Imprenza Governu nian, (mos Ingles no Portugese), "Plano ne ninia objectivo mak atu desenvolve infra-estruturas fundamentais, recursos humanos no hametin sociedade nia kbiit, hanesan mós hasa’e crescimento ba emprego iha sector privado no mós iha sectores industriais estratégicos – hanesan agricultura, turismo nebé naburas ho indústrias “downstream” iha sector petróleo no gás. ... Parte primeira mak capital social, nebé foca ba harí sociedade ida be saudável no instruida, hodi fó resposta ba necessidades sociais Povo nian no, nuné, promove desenvolvimento humano. Parte segunda hakarak fó garantia katak País n’e iha duni infra-estruturas fundamentais no produtivas atu harí Nação nebé sustentável, bele buras no interligada. Parte terceira abrange desenvolvimento económico hodi hetan economia próspera no moderna, nebé fó servisu barak ba Povo."

Governu haruka PED ba Parlamentu Nasional

Governu haruka proposta PED ba Deputadu sira iha loron 5 Jullu 2011, no Primeiru Ministru husu sira atu aprova iha loron neen, iha Segunda, 11 Jullu, molok enkontro Parseiru Dezenvolvimentu. Planu ida ne'e iha Capitulu hitu iha lingua Portugese. LH scan ona, no tama iha kraik. Iha loron Kinta lokraik, Governu publika SDP tomak ba Governu nia portal website iha Ingles (16 MB) no Portugese (4 MB). Sira la inklui karta introdusaun no proposta resolusaun ne'ebe haruka husi Primeiru Ministru.

Molok Governu publika, La'o Hamutuk scan ona no tama versaun Portuguese, tuir capitulo sira:

Iha loron 11 Jullu, Parlamentu Nasional hahu debate kona-ba aprovasaun SDP, no La'o Hamutuk fahe pajina 13 ho hanoin preliminariu (also English) kona ba SDP ida ne'e.

Ami nia topiku prinsipal, hanesan hakerek iha Sumariu pajina rua (also English), tuir mai:

 

 


Restu husi pájina ida ne’e sei aprezenta diskusaun no problema hirak ne’ebe La’o Hamutuk identifika iha Ezbosu Planu ida ne’e iha 2010:

  1. Subestimar ba Timor-Leste ninia dependensia ba rendimentu petroleu
  2. Uza gas natural ba eletrisidade, no mos fa'an gas natural
  3. Riku sai liu fali imajinasaun - Timor-Leste iha duni rekursu liu Indonesia no Malaysia?
  4. Deve liu biliaun $5
  5. Ameasa direitu ba rai

Ami pronto atu simu hanoin no sujestaun ruma kona-ba oinsa atu halo analiza ida ne'e sai diak liu tan, relevante no iha valor.

Hanehan iha diagram sira iha okos atu hare ho boot.

Figura primeiru ne’e mai husi Planu Estratéjiku Dezenvolvimentu pájina 2-3. ida ne’e uza eskalaun vertikal husi “Logaritma”, ne’ebe sei halo numeru boot sira sei sai kiik liu, no numeru kiik sira sei mosu boot liu.

Figura segundu ne’e dezenha husi La’o Hamutuk ne’ebe bazeia ba dadus ne’ebe hanesan mos, uza skalaun linear ida ne’ebe fasil atu bele komprende liu. Iha kazu ne’e, kada dolar ida aumenta ba altu ne’ebe hanesan ba kada bloku iha grafiku, la bazeia ba dimensaun tomak husi bloku. Komponente rendimentu naun-petroleu kiik liu atu hanesan mos lakon hodi la hare.

1. Subestimar ba Timor-Leste ninia dependensia ba rendimentu petroleu

Hanesan La’o Hamutuk hakerek bebeik, Timor-Leste ohin loron nudar nasaun ne’ebe depende makaas ba petroleu iha mundu. Ida ne’e laos tamba ita iha mina no gas barak, maibe tamba ita nia ekonomia seluk kiik liu. Iha ami nia submisaun ba Orsamentu Jeral Estadu 2010, La’o Hamutuk esplika nia analiza katak Rendimentu Domestiku ba 2010 sei sai tokon $46.1, relativamente kompara ho tokon $87.2 ne’ebe projekta husi Governu. Iha diferensia ne’ebe boot tebes tamba Governu konta rendimentu ne’ebe selu husi ministeriu ida ba ministeriu seluk, rendimentu Bruto husi fa'an foos nian ne’ebe governu sosa ho presu as duke wainhira presu atu ba fa'an nian, rendimentu Bruto husi ajensia EDTL no APORTIL ne’ebe nia prosesu resulta osan lakon. Karik osan ne’ebe lakon mos sura, projeksaun rendimentu domestiku atual nian iha Orsamentu Jeral Estadu 2010 ne’e negative ka menus tokon $18.2. Maske, diskusaun ne’ebe tuir uzu numeru inflasaun governu nian – ne’e rigorozu liu wainhira hateten dependensia Timor-Leste nian ba petroleu ne’e halo diferensia ne’ebe kiik.

Diagram primeiru iha Planu Estratéjiku Dezenvolvimentu nian, hanesan hatudu iha liman los, hatudu komponente ne’ebe diferente husi Rendimentu Estadu husi 2002 too 2009. Maske, PED ne’e uza metodu grafiku vertical nian ho “Logartima” ne’ebe altera ka de-formasaun ba relasaun entre numeru ne’ebe boot no kiik. La’o Hamutuk halo dezenhu fila fali ho grafiku ho metodu linear, ne’ebe prudente liu hodi hatudu nivel lolos husi dependensia Timor-Leste ba rendimentu minarai, ida ne’ebe kobre 94% husi total rendimentu estadu nian durante tinan walu dahuluk husi independensia, dezenhu ne’e bazeia ba figura ne’ebe hasai husi Governu.

Tabela iha okos ne’e hatudu numeru ne’ebe uza hela atu halo grafika sira ohin. Ami espera katak nai-ulun sira sira sei bazeia sira nia desizaun ho numeru sira, no hatene importansia hodi haforsa Timor-Leste nia ekonomia husi seitor naun minarai, ida ne’ebe sei hasae rendimentu domestiku, molok mina-rai maran iha tinan 15 nia laran ka menus husi ne’e.

 20022003200420052006200720082009Total 2002-2009
Rendimentu Petroleu0.1101753366111258240015986388
Taxa Domestiku1921252827313753241
Presu no Kustu uzu sira1354346835
Funan & Faan Foz0.10.10.1546182256
Ajensia Autonomu4678778956
Rendimentu Total

25

402123816521307247016896775
Persentajem husi Petroleu0.4%25%83%88%94%96%97%95%94.3%

2. Uza gas natural ba eletrisidade, no mos fa'an gas natural

La’o Hamutuk fiar katak Timor-Leste tenke hetan benefisiu ida ne’ebe masimu husi gas natural no mina-rai ne’ebe iha kampu Greater Sunrise, gas ne’ebe bele dada mai iha ita nia kosta sul ho kadoras, maske kompania minarai internasional ne’ebe hetan kontratu ba kampu ida ne’e, prefere liu ba atu halo likifasaun ba gas nian iha fasilidade LNG ida be namlele, duke dada kadoras mai iha Timor-Leste ka ba Australia. Maibe, iha Planu Estratéjiku Dezenvolvimentu nian, hateten katak gas Sunrise nian sei lori mai iha Timor-Leste, no ami halo asumsaun ida ne’ebe hanesan ba hanoin nee iha diskusaun ida ne’e.

Pájina 15 husi Sumario hateten
Timor-Leste sei dezenvolve rede eletrisidade ida ne’ebe modernu hodi liga ba nasaun laran tomak ho kapasidade eletrisidade ne’ebe sei instala minimu Giga-watt 1 iha tinan 2020, 1GW (1,000 megawatts). Rede eletrisidade sei liga ba distritu tomak, no sei uza rekursu gas natural rai ne’e nian hodi eletrifika hotu sistema nasional.
No pájina 20 hateten:
Eletrisidade: rede eletrisidade nasional sei kompleta iha tinan 2015, liga ba sidade tomak no kapital distritu sira. Sistema eletrisidade barak liu sei uza ho petroleu, fou-foun uza likidu pezadu maibe depois sei troka ba gas natural wainhira kadoras gas nian dada mai iha Timor-Leste. Fontes enerjia alternative seluk inklui, lor-matan, anin, enerjia husi manas rai nian no be’e sei inkorpora ba iha rede nasional. Governu sei instala too GW 1 iha 2020.

 

Gas hira maka sei uza atu hamoris jerador gigawat ida?

Maske Timor-Leste sei iha eletrisidade ho kapasidade GW ida, ami halo asumsaum ba rata-rata nian, maizumenus metade husi gas ida ne’e sei produs eletrisidade (rata-rata kapasidade nian 50%), ba total husi 4,383 GWh (gigawatt-hours) ne’ebe lakan ba kada tinan-tinan.

Teknolojia ne’ebe efikasia liu maka siklu kombinadu sistema ba turbin gas nian, ne’ebe sei hetan efikasia kuaze 50%. (Jerador Oliu Pezadu ne’ebe konverte ba atu uza gas sei menus efikasia, maibe ami sei optimistiku ba asumsaun 50%.) Hamoris eletrisidade 4,383 GWh, iha 50% efikasia, sei uza 29 bcf (billion cubic feet) husi gas natural kada tinan ida.

Karik jerador ne’e lakan durante tinan 30 nia laran, tuir ekspetasaun ba projeitu Sunrise nia moris, jerador sira ne’e sei konsumu 0.87 tcf husi gas natural.

Karik Timor-Leste hakarak atu uza gas husi Sunrise nudar kombustivel hodi fornese ba jerador eletrisidade ho kapasidade gigawatt ida, ida ne’e sei konsumu besik 2/3 husi rendimentu upstream” husi projeitu Sunrise nian. Gas ne’ebe sei sunu (uza ba) hodi hamoris eletrisidade ne’e labele ona ba halo likifasaun no exporta ba hodi dudu rendimentu sae.

Atu halao operasaun ba iha jerador eletrisidade ho kapasidade GW 1 durante tinan 30 nia laran sei presiza gas natural hamutuk 0.87 tcf (triliun cubic feet), hanesan ami kalkula iha box, iha liman los.

Oinsa atu fahe gas husi Sunrise

Woodside halo estimasaun katak Greater Sunrise nakonu ho 5.13 tcf gas natural ne’ebe bele rekopera fila fali. Bazeia ba La’o Hamutuk nia analiza ekonomiku husi projeitu nia upstream, ida ne’e fahe nudar hatudu iha grafika ne’ebe iha liman karuk. Timor-Leste sei hetan dolar ka gas ne’ebe ekivalente ba 1.33 tcf.

Karik gas ne’ebe pertense ba iha Timor-Leste nian sei exporta no sosa hotu, ida ne’e sei lori maizumenus biliaun $15 ba Timor-Leste husi rendimentu upstream Projeitu Sunrise nian. Maibe, karik ita uza 0.87 tcf husi gas ne’e hodi uza atu hamoris jerador eletrisidade, ne’e hamenus ita nia rendimentu besik biliaun $10.

Kampu Sunrise ne’e 20% iha Area Dezenvolvimentu Petroleu Konjunta (JPDA) nia laran no 80% iha area maritima ne’ebe Australia reklama hela. Timor-Leste sei hetan 18% husi nia 50% nudar parte rendimentu governu Timor-Leste nian (90% foti husi JPDA) hanesan 0.48 tcf.  No nia restu, 32%, sei selu ho osan tomak husi Australia ba Timor-Leste hanesan defini hela iha Tratadu CMATS nian, hamutuk biliaun $9.6.

Atu uza gas ba jerador eletrisidade nian ho kapasidade gigawatt ida, Timor-Leste sei tenki sosa fali 0.39 tcf tan husi gas Sunrise nian ho osan balun husi Australia. Karik la sura lukru husi kompania ka kustu atu halo prosesu gas nian, kustu ida ne’e too biliaun $4.4.

Planu Estratéjiku Dezenvovimentu halo asumsaun katak Timor-Leste sei hetan boot ka tomak husi nia parte ne’ebe fahe husi Sunrise nudar forma gas,  ne’ebe sei presiza kooperasaun husi Australia no kompania Konsorsiu Sunrise nian. Karik ida ne’e bele realiza, ida ne’e mos sei fo dalan ba Timor-Leste atu uza gas balun nudar suporta konsumu ba industria lokal no atividade sira seluk.

Planu Estratéjiku Dezenvolvimentu fo asumsaun katak rendimentu petroleu upstream nian sei “sae too biliaun $2 kada tinan ida hahu husi tinan 2030” ho asumsaun ida be optimistiku liu kona-ba kampu mina-rai sira be atu deskobre ba. Maibe, karik ita uza mayor parte ita nia gas natural nian husi Sunrise ba eletrisidade, oinsa asumsaun ida ne’e sai posivel?

Ita boot la bele hetan ita boot nia dosi no han dosi ida ne’e kedas.

Planu ba kapasidade jerador eletrisidade nian ho gigawatt ida ba Timor-Leste hamosu perguntas interesante seluk. Hetan utilizasaun 50% ne’ebe diskute ona iha leten, fahe ba sidadaun Timor-Leste ho miliaun rua ne’ebe ita sei hetan iha 2030, indika uzu eletrisidade nian 2,200 kwh/ema ida/tinan, ne’e sai hanesan ho Brazil, Thailandia ka Xina. Ida ne’e boot liu dalas hat kompara ho Indonesia no dala rua hanesan iha Fiji, Ecuador no Cuba.

Karik Timor-Leste uza eletrisidade boot ida ne’e no fa'an eletrisidade ne’e ho presu  EDTL dadaun ne’e ho 12.5 centimus/kwh (ne’ebe kobre ¼ husi kustu eletrisidade no distribuisaun ohin loron nian), regularmente, rata-rata uma kain ne’en husi Timor-oan sei selu $137/fulan ba eletrisidade nian. Karik ema hotu-hotu selu ona, estadu sei kobra fila fali nia rendimentu tomak ne’ebe lakon husi uza gas ba jerador.

3. Riku soin liu fali imazinasaun

Pájina 1-3 husi Planu Estratéjiku Dezenvolvimentu nian heteten Timor-Leste nia “Ekonomia be Potensial.” Timor-Leste nia riku-soin ne’ebe prova perkapita nian ba ohin loron nian $55,660 (2005), as liu kompara ho Indonesia ($13,350) no Malaysia ($55,326). Figura ne’ebe la kredivel ida ne’e referensia husi Banku Mundial nia Analiza kona-ba Timor-Leste nia Ambiente Nasaun, ne’ebe publika iha Julho 2009.

Hare didiak ba dokumentu ida ne’e, loke iluminasaun balun. Figura sira be lista hela iha Planu Estratéjiku Dezenvolvimentu nian mai husi tabela iha liman los, foti husi relatoriu Banku Mundial nian iha pájina 5. Ita bele hare katak 85% riku soin Timor-Leste nian mak rekursu petroleu naun renovavel, ne’e bele uza dala ida deit. Timor-Leste dook liu ho Indonesia no Malaysia iha riku-soin renovavel nian hanesan rai ba agrikultura nian no ailaran, no liu-liu iha “Kapital Produs nian” (infrastrutura no industria). Banku Mundial nia relatoriu esplika ida ne’e iha textu ne’ebe akompanha hela tabela ida ne’e, no inklui detailu liu nian iha Appendix A.

 

Figura 2.1. Total Riku-Soin per Kapita iha Timor-Leste, 2005 (iha 2000 dollar)

2.2 Riku-Soin Nasional (La'o Hamutuk nia tradusaun)

Total riku-soin Timor-Leste nian per kapita nian ne’e as liu iha rejiaun ida ne’e. Rekursu naturais bele sura husi foti valor atual husi kustu rekursu nian liu husi asumsaun ida be naruk, no halo kalkulasaun ba valor lukru atual nian husi kustu sira be hanesan uza diskonte tarifa ida – iha kazu ida ne’e, uza pursentu 4). Uza metodu ida ne’e, Timor-Leste nia riku-soin total per kapita ($56,000) ne’e liu dalas tolu as liu duke rata-rata ba rejiaun ne’e no ida ne’e bele halo komparasaun ba nasaun sira ne’ebe sira nia rendimentu nasaun nian iha mediu-as hanesan Malaysia.

Riku-soin Timor-oan nian ne’e mayor parte kompostu husi riku-soin rekursu naturais ne’ebe naun renovavel. Definisaun husi total riku-soin ne’ebe uza iha relatoriu ida ne’e laos deit kapital produs nian, maibe mos kapital natural no kapital ne’ebe ita la hare. Riku-soin Timor-Leste mayor parte ne’e kompostu husi mina-rai no rezerva gas natural (85%). Plantasaun floresta no rai agrikultura nian koresponde 3% no 2% husi total riku-soin nian tu-tuir malu. (Hare figura 2.1)

Jestaun ba rekursu naturais naun renovavel nian reprezenta dezafiu boot ida ba nasaun. Desde riku-soin barak mak konsiste nudar asset natural no barak liu mak rekursu naturais naun renovavel, ida ne’e reprezenta dezafiu ida be la bai-bain ba jestaun ekonomiku rai-laran. Ho hanoin atu sustenta no hasae nivel konsumu per kapita nian ba tempu naruk, ida ne’e nesesariu atu iha riku-soin ida be la hetan redusaun. Husi perspetiva pratika nian, ida ne’e bolu atensaun ba reseitas husi rekursu naturais nian atu ba investe duke ba konsumu nian. Fundu Petroleu estabelese iha tinan 2005 iha objetivu ida ne’e dunik, hanesan Fundu ida ne’e permite atu halo transformasaun riku-soin mina-rai nian ba iha riku-soin finansial nian no preserve valor riku-soin petroleu Timor-Leste nian ba jerasaun futuru. Fundu ne’e iha asset biliaun $4.8 iha Marsu 2009.

La’o Hamutuk konkorda katak lideransa Timor-Leste tenke projeita vizaun ida be optimistiku ba nasaun ida ne’e nia futuru. Mesmu, vizaun ne’e, espesialmente wainhira ida ne’e hateten sai husi Planu nasional ne’ebe oferese hanesan “Biblia” ida ba governu agora no futuru, presiza atu tau an iha realidade. Karik ita halo analiza ida be konfuzu ho relasaun publiku nian, jerasaun futuru sei sofre husi promesa ida be fraku, ka harii ho rai henek.

4. Deve liu biliaun $5

Governu proposta atu atinzi planu ida be ambisiozu ne’e liu husi gasta liu biliaun $2 iha 2012, kresimentu kada tinan-tinan to biliaun $2.2 hahu husi 2020 (hanehan ba grafika rua iha liman los). Ida ne’e barak liu dala rua ba Estimasaun Rendimentu Sustentavel husi Fundu Petroleu, no sei kria gap ba gastus annual nian kada tinan-tinan. Tabela 2.7 (pájina 2-22) antisipa gap gastus nian hamutuk besik biliaun $6 husi tinan 2020 (hare ba grafika ida be besik iha liman los), hatudu fali hanesan atu finansia ho deve. Hanesan planu ne’e hateten “Governu dadauk ne’e eksplora opsaun ba stratejia finansiamentu ba investimentu publiku nian inklui foti osan liu nivel sustentavel (RSE) ka deve ho funan ki'ik liu.” (letra bold husi LH).

Hafoin 2002, projeksaun ne’ebe optimistiku liu ba kresimentu GDP naun-petroleu no rendimentu estadu nian ne’ebe hein atu hetan rendimentu ida be sufisiente, maske selu fila fali tusan ne’ebe sei mosu, la konsidera iha planu orsamentu nian.

Ita bele hetan komentariu klean liu iha ne'e.

5. Ameasa direitu ba rai

Esbosu Planu Estratéjiku Dezenvolvimentu (pájina  1-15) inklui uza rai Estadu nian ba “investimentu publiku no privadu nian hanesan ba dezenvolvimentu turismu ka petroleu.” Governu mos intende hela (pájina  4-38, 4-39) atu reklama no halo jestaun ba hektare 12,000 husi rai agrikultura ne’ebe uluk ne’e iha rejime Portugal no Indonesia nia okos, ne’ebe momentu ne'eba ho forsa dudu ses familia barak husi rai ne’eba. Ema agrikultor kiik rihun ba rihun ne’ebe depende ba rai ida ne’e ba sira nia aihan no satan sira nia moris. Karik Estadu aluga rai ida ne’e ba iha kompanha ka ba ema ida be la iha osan ida be naton, familia sira ne’e sei la bele suporta sira nia moris ba tempu naruk.

Ezemplu ida hatudu hela oinsa povo sei hetan afeita

Iha tinan 2005 governu konkorda atu aluga rai hektare 3,000 ne’ebe nain ba plantasaun ne’e Kompanha SAPT husi Portugal ba kompanha Timor Global ba tinan 50. Area plantasaun ida ne’e iha Fatu Besi ne’e produs aihan, no satan ema nia moris no/ka uma ba ema maizumenus nain 16,000 iha suku 5. Ohin loron ne’e Timor Global uza maizumenus hektare 100 husi rai ida ne’e, no iha intensaun atu haluhan ba tan.

Lei ba rai ne’ebe dadaun ne'e iha prosesu aprovasaun fo poder ba Estadu atu kontrola area boot husi rai ida ne’e, maske Uniaun Agrikutura Ermera (UNAER) no grupo sira seluk halo advokasia ba direitu agrikultor sira ba rai ida ne’e.

Esbosu Planu Estratéjiku Dezenvolvimentu ne’e mos proposta (pájina 4-197 ba 4-201) atu reloka uma kain sira hodi kuda hare iha area sira be foin dadauk ne’e nia irigasaun no fasilidade sira seluk hetan rehabilitasaun. Governu sei fo rai hektare rua ba kada uma kain ida, iha esperansa atu halo ba familia 5,000 ba distritu walu. Sei oferese mos rai ba distritu tolu seluk, inklui Covalima, ne’ebe iha area trasmigrasaun no agrikultura ida ne’ebe boot molok 1999. Durante okupasaun nian, governu Indonesia reloka ema transmigrante Indonesia nian nain 25,000, no mos ema Timor-oan, ho programa ida be hanesan. Rai ba transmigrasaun ida ne’e dala barak hadau husi ema ida be nain ba rai tradisional, barak husi sira sei nafatin ezizi rekonhesimentu ba sira nia direitu ba rai.

Planu Estratéjiku Dezenvolvimentu ne’e sosializa hela iha tempu ida be hanesan wainhira Parlamentu konsidera lei balun ne’ebe sei defini titulu ba rai no wainhira Estadu bele foti ema ida nia rai. Wainhira konsidera hamutuk ho esbosu lei sira, PED hamosu parte ida husi pakote ida ne’ebe sei permite Estadu atu foti rai privadu no proteze forsa, maibe la proteze direitu ba rai husi ema sira ne’ebe vulneravel.

 

The Timor-Leste Institute for Development Monitoring and Analysis (La’o Hamutuk)
Institutu Timor-Leste ba Analiza no Monitor ba Dezenvolvimentu
Rua dos Martires da Patria, Bebora, Dili, Timor-Leste
P.O. Box 340, Dili, Timor-Leste
Tel: +670-3321040 or +670-77234330
email: 
info@laohamutuk.org    Web: http://www.laohamutuk.org    Blog: laohamutuk.blogspot.com